Read MUKANDA WANZAMBI 1 Timotea 1 Bible Online

1 Timotea 1 - MUKANDA WANZAMBI bible

1 Timotea 1

¹Ami Pawulu, kapostolu kaKristu Yesu, mwaya kuleja kwanlejeluwu kudi Nzambi Chamwinu chetu, niKristu Yesu kuchiŋeja kwetu,

²nidi nakukusonekela mukanda, eyi Timotewu mwanami walala mukwitiya. Luwi nikwanakena nikuwunda kwakufuma kudi Nzambi, yowu Tata, nikudi Kristu Yesu, Mwanta wetu.

³Chinakeŋeli kuya muMasidoniya, nakwilili nami wushali kuEfwesesa, kulonda wuleji antu amakwawu neyi, chinjila kuleja antu nsaŋu jacheŋi.

⁴Yileji neyi, chinjila kutiyilila tuheka hela nsaŋu janyiyachi yakakumana, jaleta kwakwihujola hohu, hijakwashaŋa mudimu waya mukukuhwelela, watukunjikiluwu kudi Nzambuku.

⁵Hakwila mwakulejeluwu mwalonda kukeŋa kwakufuma mumuchima wutooka, nachinleji chamuchima chachiwahi, nikukuhwelela kwakadi kudimbana.

⁶Chanalekuwu yumiyi, amakwawu anasenukili dehi mumbadi, nakuya nakubobola tuhu;

⁷anakeŋi kwikala ankuluŋaŋa janshimbi, kutoŋa hiyeluka chakashinshi hela mwahoshaŋawu hela mwakoleshaŋaawuku.

⁸Ilaŋa tuneluki netu nshimbi jajiwahi, neyi muntu wukujovwahila;

⁹muloŋa tuneluki netu nshimbi hijajililili muntu waloŋaku; chiŋa akwakuluwalala, niakwawinyi, niasekesha Nzambi, niakwanshidi, niakadi kujila, niajilola, niajahaŋa atata jawu nawamama jawu,

¹⁰niambanji, niayivumbi, niaditamishaŋa nawakwawu amayala, nianyitumbula, niantwambi, niashimunaŋa wunsahu wakutwamba; hela chuma chikwawu chabula kuya mwaya kuleja kwalala,

¹¹mwomwaya nsaŋu yayiwahi yakulema kwaNzambi wankisu, yankunjikiluwu.

¹²Nasakilili Kristu Yesu, Mwanta wetu, wanyinkeli Ŋovu, nanochu chanweniyi kushinshika, hakunkunjika kumudimu windi;

¹³kutoŋa yami nadiŋi mukwakutuka Nzambi, mukwakukabisha akwawu, mukwawinyi; ilaŋa antiyilili luwi muloŋa nachilili nakuyamba, nichidi kanda niitiyi.

¹⁴Luwi lwaMwanta wetu lwanswejeleli nankashi nakukuhwelela nikukeŋa kwamudi Kristu Yesu.

¹⁵Izu idi datela kwitiya, datela kutambula chikupu, delawu nawu, Kristu Yesu wenjili munu mwishina nakwamwina akwanshidi. Hadi akwanshidi, yami nabadikahu.

¹⁶Hansaŋu iyi antiyilili luwi, kulonda mudami nabadika, Yesu Kristu amwekeshi mwejima mwadiŋi nakudiwunjikayi, niikali wakutalilahu antu akumukuhwelelaŋa, atambuli wumi wahaya nyaka.

¹⁷Kudi Mwanta wantúumba wahaya nyaka, wakatokaŋa, wakamonewaŋa, diyi Nzambi kanka windi, kwikali nimpuhu ni kulema haya nyaka nanyaka. Amena.

¹⁸Eyi mwanami Timotewu, nukukukunjikila lushiiku ilu mwomwaya wuprofwetu wakutenenenuwu dehi, wulwi nachu njita yayiwahi.

¹⁹Wukwati kukukuhwelela nikuchinleji chamuchima chachiwahi; amakwawu analekumu dehi, anajiyishi dehi kukuhwelela kwawu.

²⁰Antu adi ochu diwu aHimenusa naAlesanderi, inenkeli Satana kulonda adizi kuleka kutuka Nzambi.