Read MUKANDA WANZAMBI 1 Timotea 3 Bible Online

1 Timotea 3 - MUKANDA WANZAMBI bible

1 Timotea 3

¹Izu idi datela kwitiya, delawu nawu, Muntu nakeŋi mudimu wakutala akwawu nakeŋi mudimu wawuwahi.

²Dichi mukwakutala akwawu chiŋa yobula hakumwinkela Muloŋa, wukweti mumbanda wumu hohu, wadihembaŋa, wawundisha mumesu, walumbuluka, wadiishaŋa ŋeji, wukweti kashinslii kakuleja akwawu,

³wabula ndombu, hetanaŋaku; ilaŋa wawunda, hakweti ntadi nawakwawuku, wabula kufwila mali;

⁴muntu wayulaŋa chachiwahi mwitala dindi yomweni, wukweti anyanindi amwovwahilaŋa nakalemesha kalala.

⁵Neyi muntu wabula kwiluka kuyula mwitala dindi yomweni, indi chipompelu chaNzambi wukuchihemba ŋahi?

⁶Bayi ekala kadizaku, wakenda kadinka wanta, hakuholokela mwatanyinayi diyabolu.

⁷Chiŋa ashimunaŋawu chachiwahi kudi antu adi hanzi, wakenda kaholokela mukusawuka, nakufwa mumuhetu wadiyabolu.

⁸Mwomumu niankoŋi ekali nakalemesha, hiyakwamazu ayeduku, hiyasweja kunwa walwaku, hiyafwila kuheta chatamaku;

⁹akwata kunsaŋu yakwitiya kwakukuhwelela yakujinda, nachinleji chamuchima chitooka.

¹⁰Antu owu asambili kuyishinshika; neyi anabuli hakuyinkela Muloŋa, akalakali mudimu wawukoŋi.

¹¹Mwomumu niambanda chiŋa ekali nakalemesha, bayi akwakutuŋula akwawuku, ababalaŋa, ashinshikaŋa muyuma yejima.

¹²Ankoŋi ekali nawaŋodi jawu, iwu nawindi iwu nawindi, nakuyula anyanawu niakwetala dawu chachiwahi.

¹³Muloŋa antu akukalakala chachiwahi mudimu wawukoŋi, akudimwena kulema kwalala, nikusweja kuumika mukwitiya kwakukuhwelela kwamudi Kristu Yesu.

¹⁴Nakusonekeli yumiyi nakukuhwelela nami nakenza kudeyi mafuku anu.

¹⁵Neyi nakasweja kulaba, nalondi nami wakeluki mwakwililawu antu mwitala daNzambi, chochipompelu chaNzambi wamumi, chochishimi nihakolela nsaŋu yalala.

¹⁶Nsaŋu yakwakama Nzambi yajindiluwu yasweja kulema nankashi, hiyatadikewaŋaku; Nzambi amwekesheluwu mumujimba, ayiŋishiluwu mudi Spiritu, amwenuwu kudi aŋelu, ashimwinuwu munyuza, etiyiluwu mumpata yamunu mwishina, atambwiluwu mwiwulu mulubanji lwakulema.