Read MUKANDA WANZAMBI 1 Timotea 4 Bible Online

1 Timotea 4 - MUKANDA WANZAMBI bible

1 Timotea 4

¹Spiritu nahoshi chalumbuluka nindi, kunyaka yakukuminina amakwawu akasenuka mukwitiya kwakukuhwelela, akatiyilila aspiritu akutwamba, ninsaŋu jalejaŋawu ademoni,

²niwufwikŋi wawantu akutwamba, chinleji chawu chamuchima chaha dehi, chidi neyi anachochi nachikuŋu chakesi;

³alekeshaŋa kusumbula nakusumbuka, alekeshaŋa niyuma yakudya, yaleŋeliyi Nzambi nindi akwakwitiya, eluka nsaŋu yalala, ayitambuli nakusakilila.

⁴Muloŋa yuma yejima yaleŋeliyi Nzambi yayiwahi, kwosi chuma chadi kulekawuku, neyi akuchitambula nakusakilila;

⁵chikuwaha namazu aNzambi nakulomba.

⁶Neyi wukuyanukisha ana kwetu yumiyi, wukwi kala mukwakukalakala waKristu Yesu wamuwahi, wadyaloŋa chachiwahi mazu aya mukwitiya kwakukuhwelela, nikuleja kwakuwahi kuwunalondi.

⁷Chiŋa wuleka twanu twawatushinakaji awambanda twabula kujila. Dikoleshaŋa wushiki mukwakama Nzambi.

⁸Muloŋa kukolesha mujimba kwawahishaŋa mpinji yantesha, ilaŋa kwakama Nzambi kwawahishaŋa muyuma yejima, kukweti kukana kwawumi wakatataka nikwawumi wakenza.

⁹Izu idi datela kwitiya, datela kutambula chikupu.

¹⁰Dichi twakabakenaŋa nakulwisha, Muloŋa tunashi chikuhwelela chetu hadi Nzambi wamumi, diyi Chamwinu chawantu ejima, wasweja kwamwina akwakukuhwelela.

¹¹Yileji yumiyi nakukoleshamu.

¹²Bayi witeja muntu adiwuli wukwenzi weyuku; chiŋa wikali wakutalilahu akwakwitiya nimukuhosha, nimukushakama, nimukukeŋa, nimukukuhwelela, nimukubula kubajama.

¹³Shaku muchima kukutaŋila amakwawu nikukukonkomwena, nikukuleja, ndo nichinakenza.

¹⁴Bayi wudiwula chamukunkulu chiwekala nachu, chakwinkeluwu kuwuprofwetu, chiwatambwili hakukunaŋika makasa awakulumpuku.

¹⁵Dikwatishi muyumiyi, wudinkumu chikupu, kulonda chiwukuyaloŋa kumbidi chimwekanaŋa kudi antu ejima.

¹⁶Dihembi eyi aweni, wuhembi kuleja kuwalejaŋa akwenu. Kakelaku mwenimu, Muloŋa chiwukwilamu wukudamwina eyi aweni niantu akukutiya.