Read MUKANDA WANZAMBI 1 Timotea 5 Bible Online

1 Timotea 5 - MUKANDA WANZAMBI bible

1 Timotea 5

¹Bayi wuhoshola mukulumpuku, kumina dakumulembelela neyi hitata yeyi; nianyikwenzi amayala neyi hiyana kweyi;

²niakulumpiwambanda neyi hiyamama jeyi; niansanda awambanda neyi hiyaheleyi, nákubula kubajama hela hanti.

³Lemeshaku ambanda anekali anfwila chikupu.

⁴Nfwila wamumbanda wukweti anyana hela ezukulu, wena asambili kudiza kumwekesha kwakama Nzambi kudi ayawu, akwashi anvwali jawu; dichichuma chamonaŋayi Nzambi kuwaha.

⁵Nfwila washala kanka windi chikupu, wakuhwelelaŋa Nzambi, wakakelaŋaa mukulembelela nakulomba nimwaana niwufuku.

⁶Hakwila nfwila washakama nakuluŋa hohu, wafwa dehi iku wuchidi mumi.

⁷Yileji yumiyi nawa, kulonda abuli hakuyinkela muloŋa.

⁸Muntu wukubula kukwasha ayindi, kusweja akwetala dindi, naleki mwaya kwitiya kwakukuhwelela, nabadiki wabula kwitiya kutama.

⁹Kusoneka mumbanda hamukanda wawanfwila, chiŋa nabadiki munyaka makumi atanu nadimu, chiŋa nawa wasumbukili kamu hohu;

¹⁰ashimunaŋawu nawu welaŋa nyidimu yayiwahi; naleli anyana, nadiishi aŋeji, naweleshi nyendu yawakwakujila, nakwashi amonaŋa kukala, nakakeli kwila yayiwahi yejima.

¹¹Bayi kusoneka anfwila achidi ansandaku, muloŋa chakulekawu kukeŋa Kristu, akufwila kusumbuka cheŋi;

¹²akutanya nanochu chakulekawu kukuhwelela kwawu kwatachi.

¹³Hiyakuleka kukoŋa mudimu, hiyakuyaloŋa nakukimboka kumatala namatala; hiyakukumina dakuleka kukoŋa mudimu hohuku; akwikala akwansachi hiyatuvuba nawa, nakuhosha yuma yajila kuhosha.

¹⁴Dichi nakeŋi nami ansanda awambanda asumbuki, avwali anyana, ayuli mumatalawu, abuli kushila chilumbu nsaŋu yakutuŋula;

¹⁵Muloŋamakwawu anasenuki dehi nakulonda Satana.

¹⁶Mukwakwitiya wukweti anfwila, ayikwashuku, himudimu wachipompeluku; mudimu wachipompelu wakukwasha anfwila hachikupu.

¹⁷Akulumpi ayulaŋa chachiwahi, ekali atela kuyilemesha chakubadika, chiswejeli awa akalakalaŋa nakushimuna nikuleja akwawu mazu aNzambi.

¹⁸Muloŋa mumukanda wajila nawu, Bayi wukasa kukanwa kaŋombi hakuhulayi tidikuku. Nawu, Mukwakukalakala nateli wufwetu windi.

¹⁹Bayi witeja muntu kwinka mukulumpi muloŋaku, chiŋa kwikala ayinsahu ayedi hela asatu.

²⁰Antu akuvulumuna, yikonkololi kumesu awantu ejima, kulonda akwawu atiyi woma.

²¹Nakuleji kumesu aNzambi, ni kumesu aKristu Yesu, ni kumesu awaŋelu atondewa, nami hembaku yumiyi chakadi kutonda hakachi kawantu, wubuli kwila chuma chakulemesha muntu wumu mukwawu wumudiwuli.

²²Bayi wunyakala kunaŋika muntu makasaku; bayi wudumbila munyiloŋa yawakwenuku; dihembi eyi aweni wikali wajila.

²³Bayi wunwaŋa meji hohuku, nwaŋa nituvinyu twanti nansaŋu yevumu deyi nichiwakatakataŋa.

²⁴Nyiloŋa yawantu amakwawu yamwekanaŋa hatooka, yayaloŋahu dehi kukusompesha; nyiloŋa yawantu amakwawu yayilondelaŋa.

²⁵Mwomumu nawa, kudi nyidimu yayiwahi yamwekanaŋa hatooka, niyinabuli kumwekana hatooka hiyikutwesha kujindikaku.