Read MUKANDA WANZAMBI 1 Timotea 6 Bible Online

1 Timotea 6 - MUKANDA WANZAMBI bible

1 Timotea 6

¹Antu ejima ekala mumpanda yawuduŋu, alemeshaŋa ankaka jawu chalala, kulonda ijina daNzambi nikuleja kwindi kubuli kutukewa.

²Akweti ankaka jawu etiya, bayi ayidiwula nanochu chaneluwu ana kwawuku, akumini dakuyikalakela chakubadika, Muloŋa wena, adyaloŋa kunyidimu yawu, etiya akeŋewa. Yileji yumiyi nakuyikonkomwena.

³Muntu wukuyileja mwacheŋi, wukubula kwiteja mazu aMwanta wetu Yesu Kristu akukolesha, nikuleja kwaya mukwakama Nzambi,

⁴nadinki dehi wanta, heluka chumaku, wata muchima kukwihujola nikukufwila ntadi jansaŋu jamazu, jaletaŋa ichima, nindombu, nimatuka, nikanaŋanaŋa kakuta akwawu muchima;

⁵nintadi jawantu atoka dehi muyitoŋojoka yawu, abula kwiluka nsaŋu yalala, atoŋojokaŋaa nawu kwakama Nzambi hichuma chakuheta nachu.

⁶Kwakama Nzambi, nikutiya kuwaha, hikuheta kwakweni;

⁷Muloŋa hitwaleteli chuma munu mwishinaku, nichitwakafumamu hitwakatwesha kusenda chumaku.

⁸Dichi neyi tukweti yakudya niyakudivwika, yumiyi yinawani.

⁹Ilaŋa ntu akukeŋa nawu aheti, akudimbukila mukweseka, akufwa mumuhetu, akufwila yuma yawusupi yayivulu yakatishaŋa, yajiyishaŋa ntu mukukisika nimukunoŋa.

¹⁰Kufwila mali diwu muji wayuma yatama yejima; diyi nsaŋu yinasenwishi amakwawu mukwitiya kwakukuhwelela, anadipwiki yihuŋu yayivulu, zwa nikwishinadi.

¹¹Ilaŋa eyi muntu waNzambi, temukaku yumiyi. Kabilaku nikuloŋa, nikwakama Nzambi, nikukuhwelela, nikukeŋa, nikutatakena, nikwovwaha.

¹²Lwaku njita yayiwahi yakukuhwelela; kwataku kuwumi wahaya nyaka wakutambikililuwu, wuwetejeli kwiteja kwakuwahi kumesu awayinsahu amavulu.

¹³Nakushiiki kumesu aNzambi, wahandishaŋa yuma yejima, ni kumesu aKristu Yesu, wetejeli kwiteja kwakuwahi kumesu aPontusi Pilatu,

¹⁴nami, hembaku lushiiku chakadi ihuji hela hakukwinkela muloŋa, nichakamwekanayi Mwanta wetu Yesu Kristu.

¹⁵Akamumwekesha hampinji yindi kudi yena mukwaŋovu, inka windi wankisu, yowu Mwanta wawanyanta antúumba, yowu Mukulumpi wawakulumpi;

¹⁶diyi kanka windi wakafwaŋa washakamaŋa muchejeji chakaŋanya muntu kushikaku; hikwekala muatu wamumonahu dehuku, hela kutwesha kumumona nehi. Mpuhu niŋovu yahaya nyaka yiikali yindi. Amena.

¹⁷Yileji akwakuheta amakonu neyi, bayi muditoŋojoka nenu mwalemaku, bayi mukuhwelela maheta abulaŋa kushakamaku; chiŋa kusha muchima kudi Nzambi wasweja kutwinka yuma yejima nindi tuluŋi nachu.

¹⁸Yileji neyi, ilenuŋa chachiwahi, swejenu kwila nyidimu yayiwahi kulonda mumonaŋa yakukwasha nachu akwenu, ikalenu nanyichima yakuhana;

¹⁹nakudilumbikila yakutuŋa nachu kunyaka yakenza, kulonda mwakakwati kuwumi, wowu wumi walala chikupu.

²⁰Eyi Timotewu, hembaku lushiiku lwakushiikiluwu; futalelaku kubobola kwakadi kujila, nintadi jamaana, ijina damaana dakutwamba;

²¹amakwawu anetejumu anasenuki mukwitiya kwakukuhwelela. Luwi lwikali nanenu.