Read MUKANDA WANZAMBI 2 Timotea 1 Bible Online

2 Timotea 1 - MUKANDA WANZAMBI bible

2 Timotea 1

¹Ami Pawulu, kapostolu kaKristu Yesu mwaya muchima waNzambi, mwaya kukana kwawumi wamudi Kristu Yesu,

²nidi nakukusonekela mukanda, eyi mwanami Timotewu nakeŋa. Luwi nikwanakena nikuwunda kwakufuma kudi Nzambi Tata, nikudi Kristu Yesu, Mwanta wetu.

³Namusakililaŋa Nzambi, inakalakelaŋa nachinleji chamuchima chitooka, neyi chamukalakeleluwu ankakulula jami, nanochu chinabulaŋa kunookesha kukwanuka mukulembelela kwami.

⁴Wufuku nimwaana, chinaanukaŋa madilu eyi, nafwilaŋa kukumona, kulonda nisweji kuzaŋalala.

⁵Naanukaŋa kukuhwelela kweyi kwakadi kudimbana; kwokukuhwelela kwásambilili kwikala mudi nkaka yeyi wamumbanda Lowisi, nimudi mama yeyi Yunisi, neluki nami kwekala nimudeyi nawa.

⁶Dihu hanafumi kukwanukisha nami wupepi chamukunkulu chaNzambi chekala mudeyi, chiwatambwili hinakunaŋikili makasami, chili muzuzu.

⁷Muloŋa Nzambi hatwinkeli spiritu yawomaku, chiŋa yaŋovu nakukeŋa nikuwundisha mumesu.

⁸Dichi bayi wutiya nsonyi yawunsahu waMwanta wetuku, hela kutiya nsonyi hansaŋu yamami muntu windi akasawu. Kumina dakumona kukala nansaŋu yayiwahi, mwaya Ŋovu jaNzambi;

⁹watwamwinini, watutambikili nakutambika kwajila, bayi chakunyidimu yetuku, ilaŋa mwaya kufuukula kwindi kwatufuukwililiyi, niluwi lwatutiyililiyi mudi Kristu Yesu henohu nyaka yamunyima yejima yichidi kanda,

¹⁰hakwila katataka analumwekeshi dehi nakumwekana kwaChamwinu chetu Kristu Yesu, wabalumwini kufwa kwikali chimwaŋaji, namwekeshi hatooka wumi nikubula kutoka, nansaŋu yayiwahi.

¹¹Diyi nsaŋu yankunjikawu niikali mukwakuyishimuna, nikapostolu kayu, nimuleji wayu.

¹²Hansaŋu iyi dihu hanafumi ami kukaba mwenimu; hela chochu, hinatiyaloŋa nsonyuku, muloŋa neluka yena nakuhwelela, neluki chikupu nami yena natweshi kuhemba chikilu chinamwinkeli kuhemba, ndo nikwifuku odu.

¹³Ikalaku namazu akukolesha iwatiyili kudami, mwayawu mwayawu, mukukuhwelela nikukeŋa kwekala mudi Kristu Yesu.

¹⁴Chijikilu chachiwahi chakukunjikiluwu, chihembi naSpiritu Wajila washakama mudetu.

¹⁵Muneluki chananlekuwu dehi kudi ejima adi muAsiya, niaFwigelu naHemoni hamu.

¹⁶Mwanta atiyili wushona akwetala daOnesifwolu, wankwashili kakavulu, hatiyili nsonyi yeleŋi damuku.

¹⁷Chadiŋiyi muRoma wankepakeŋeli nankashi, hakunwana.

¹⁸Eyi wuneluki chachiwahi yuma yayivulu yankalakeleliyi kuEfwesesa. Mwanta amwiteji awani luwi kudi Mwanta hefuku odu.