Read MUKANDA WANZAMBI 2 Timotea 2 Bible Online

2 Timotea 2 - MUKANDA WANZAMBI bible

2 Timotea 2

¹Dichi eyi mwanami, dikoleshi muluwi lwekala mudi Kristu Yesu.

²Nsaŋu jiwatiyili kudami mukachi kawayinsahu amavulu, jikunjiki antu ashinshika akatwesha kuleja akwawu nawa.

³Kumina dakuumika mukukala, neyi ishidika daKristu Yesu wamuwahi.

⁴Hikwekala ishidika wudi kunjita wadikasaŋa nansaŋu yamunu mwishinaku, kulonda atiyishi kuwaha yena wamusonekeli muwushidika.

⁵Neyi muntu wukudipaka nawakwawu, chiŋa adipaka mwaya yijila yakudipaka, mukunkulwayi hiyakumuvwika chibaabaku.

⁶Mukwakudima wakalakalaŋa, diyi wakasambili kudiilaku.

⁷Shinshikaku munukuhosha, muloŋa Mwanta wukukuleja mwalumbulukila yuma yejima.

⁸Anukaku Yesu Kristu, mwana kaDavidi, wasaŋuka mudi afu, yoyi nsaŋu yayiwahi yinashimunaŋa ami.

⁹Nsapwiyi diyi namwena kukala nikunkasa neyi nimuntu wanyiloŋa, ilaŋa mazu aNzambi hiyayikasaŋaku.

¹⁰Hinukukumina dakuyimwena akwakutondewa yihuŋu yejima, kulonda niwena nawa akatambuli wamwinu wekala mudi Kristu Yesu, ni kulema kwahaya nyaka.

¹¹Izu idi datela kwitiya, delawu nawu, Neyi twafwili nindi, twakahanda nindi nawa;

¹²neyi tukukaba, twakekala nindi muwanta; neyi tukudikala netu hitwamwilukaku, niyena nawa wakadikala nindi hinayilukaku;

¹³neyi tukubula kushinshika, yena kwindi saŋa ashinshikilayi; yena hakutwesha kudikala yomwenuku.

¹⁴Yanukishi yumiyi; yileji kumesu aMwanta neyi, bayi mufwilaŋa ntadi yamazuku, hiyakwashaŋaku, yaluwaŋeshaŋa antu akutiyaloŋamu.

¹⁵Kabilaku kudi mwekesha kumesu aNzambi, wumuntu anesekuwu dehi, mukwakukalakala wakadi hakutiyila nsonyi, nakulumbulula mazu ansaŋu yalala mwayawu mwayawu.

¹⁶Tondolwelaku kubobola kwakadi kujila, muloŋa antu abobolaŋa ochu akuyaloŋa munjila yakusekesha Nzambi ho-o.

¹⁷Mazu awu akuya nakutotoloka neyi chelaŋa dimboŋola; dichi chaduwu aHimenusa naFwiletu.

¹⁸Antu owu anasenuki dehi munsaŋu yalala, chaneluwu nawu kusaŋuka kwamudi afu kunahiti dehi, anakunduli kukuhwelela kwawakwawu.

¹⁹Hakwila chikuku chaNzambi saŋa chakolela ngu, chi kweti mufunda wakwila nawu, Yehova weluka antu indi; nawu, Ejima akutena ijina daYehova afumi kukuheŋa.

²⁰Mwitala deneni himwekalaŋa nsaba jawuru nasiliva hohuku, mwekalaŋa nawa janyitondu namawumba; jikwawu jampuhu, jikwawu jakadi mpuhu.

²¹Muntu wukuditookesha nakwambuka kuyumiyi, wukwi kala nsaba yampuhu, yajila, yatela kukoŋa nachu Mwanta, yaloŋeshelawu nyidimu yayiwahi yejima.

²²Temukaku kufwila kwatama kwawukwenzi; kabilaku kuloŋa, nikukuhwelela, nikukeŋa, nikuwunda, hamu nanawa atambikaŋa Mwanta nanyichima yitooka.

²³Lekaku kwihujola kwawusupi kwakadi maana, muloŋa wuneluki dehi kwaletaŋa kwantadi hohu.

²⁴Nduŋu yaMwanta, chinjila kufwila ntadi, chiŋa ekali wamwovu nawantu ejima, wukweti kashinshi kakuleja akwawu, ekali mukwakutiyilila akwawu,

²⁵afumbi akwantadi mwanaheŋeluwu, namuchima wawunda; hadaha Nzambi wakabalumuna nyichima yawu akeluki nsaŋu yalala chikupu;

²⁶akwatawu dehi kudi diyabolu asomoki mumuhetu windi, eli muchima waNzambi.