Read MUKANDA WANZAMBI 2 Timotea 4 Bible Online

2 Timotea 4 - MUKANDA WANZAMBI bible

2 Timotea 4

¹Nakuleji kumesu aNzambi ni kumesu aKristu Yesu, wakasompesha amomi niafu, nanochu chakamwekanayi nawanta windi,

²nami, shimunaku mazu nihanawahi nihanabuli kuwaha, kumina dakushimuna ho-o; konkololaku, hosholaku, konkomwenaku, nakudiwunjika nawu nikuyileja.

³Muloŋa mwaka wamba kenza akaleka kutiyilila kuleja kwalala; akaheta matu owaŋa, akadivulishila ankuluŋaŋa aya mwaya kufwila kwawu kwatama;

⁴akatotomona nsaŋu yalala kumatu awu, akasenukila kutuheka.

⁵Ilaŋa eyi ikalaku wababala muyuma yejima. Kumina dakumona kukala; ilaku mudimu wakushimuna nsaŋu yayiwahi; kalakalaku mudimu weyi wumanishi chikupu.

⁶Ami keŋa antwali niikali himulambu wakuhuŋununa; mpinji yami yakuya yinashi ki dehi.

⁷Nalwi njita yayiwahi; namanishi njila yakutemukila; nahembi kwitiya kwakukuhwelela.

⁸Kufumisha kulelu anantentekeli chibaaba chakuloŋa, chakanyinkayi Mwanta, mukwakusompesha waloŋa, hefuku odu. Hakanyinkami hohuku, wakenka niantu ejima akeŋa kumwekana kwindi.

⁹Esekaku kwinza swayi kudami;

¹⁰muloŋa Demasi nanshiyi dehi, nakeŋi yamakonu, nayi dehi kuTesalonika. Kereseni nayi dehi kuŋalŋa, Titusa nayi kuDalamatiya.

¹¹Nidi naLuka hohu. Inzaku naMaku muloŋa wankwashaŋa kumudimu.

¹²Tikikusa namutemeshi kuEfwesesa.

¹³Chiwukwinza wusendaŋa kahuma kinashiyili kudi Karapu kuTirowasi, ninyikanda, nakeŋi nankashi yayitembi.

¹⁴Muchi wansumbu Alesanderi, wankoŋeli chatama nankashi, Mwanta wakamulubwila yashika munyidimu yindi.

¹⁵Eyi nawa mubabeli, muloŋa waswejeli kudikaŋa namazu etu.

¹⁶Chinadihakwilili ehakusambila, hikwadiŋi muntu niwumu wankwashiluku, ejima anshiyili; nalombi nami bayi ayinkelaku muloŋaku.

¹⁷Ilaŋa Mwanta waŋimenenuku, wankolesheli, kulonda nsaŋu yisweji kushimununewa kudami, ajentili ejima atiyi. Ampulwishili mukanwa kamutupa.

¹⁸Mwanta wakampulwisha kunyidimu yatama yejima, wakanhemba nimoniwanta windi wamwiwulu. Kulema kwikali kwindi haya nyaka nanyaka. Amena.

¹⁹Ŋimwishili aPirisila naAkwila niakwetala daOnesifwolu.

²⁰Erasitusi washeli kuKorinda; Tirofwimusa namushiyili kuMiletusa nayikatu.

²¹Esekaku kwinza aha hakwila mashika kanda enzi. Ebulusa, niPudensa, niLinusa, niKaludiya niana kwetu ejima anakwimwishi.

²²Mwanta ekali naspiritu yeyi. Luwi lwikali nanenu.