Read MUKANDA WANZAMBI Tite 1 Bible Online

Tite 1 - MUKANDA WANZAMBI bible

Tite 1

¹Ami Pawulu, nduŋu yaNzambi, kapostolu kaYesu Kristu mwaya kukuhwelela kwawantu aNzambi atondewa, nikwiluka chikupu nsaŋuyalala yaya mukwakama Nzambi,

²nakuchiŋeja wumi wahaya nyaka, watukaninuwu kudi Nzambi wabula kutwesha kutwamba, hadiŋi nyaka yamunyima yejima yichidi kanda;

³ilaŋa hamwaka watoŋweliyi yomweni, hakumwekesha izu dindi munsaŋu yankunjikiluwu kushimuna, mwaya kuleja kwanlejeliyi Nzambi, Chamwinu chetu;

⁴nidi nakukusonekela mukanda, eyi Titusa mwanami walala mukwitiya kwakukuhwelelakwokumu. Luwi lwikali naneyi nikuwunda kwakufuma kudi Nzambi Tata nikudi Kristu Yesu, Chamwinu chetu.

⁵Diyi nsaŋu nakushiyilili muKereta, kulonda wuloŋeshi yuma yasheli, wukunjiki awakulumpi kumudimu wakutala akwawu munyikala yejima, neyi chinakulejeli.

⁶Neyi kwekala muntu wabula hakumwinkela muloŋa, wukweti mumbanda wumu hohu, wukweti anyana etiya akadi kuyitenena nsaŋu yakubajama hela yakuluwalala, mukunjiki yenowu.

⁷Mukwakutala akwawu, chiŋa yobula hakumwinkela muŋa, nanochu chadiyi kalama kaNzambi. Muntu wadikaŋa, hela wanyakala kuzuwa, hela mukwandombu, hela mukwakwetana, hela mukwakufwila kuheta chatama, bayi ekala mukwakutala akwawuku.

⁸Chiŋa ekali wadiishaŋa ŋeji, wakeŋa a yayiwahi, wawundisha mumesu, waloŋa, wajila, wadihembaŋa.

⁹Chiŋa ekali wakakela mazu atela kwitiya ayilejeluwu, kulonda atweshi kukonkomwena antu mwaya kuleja kwalala, akonkololi akwantadi.

¹⁰Muloŋa kudi antu amavulu, asweja akwakwalama, hiyakwakuluwalala nakutavula mukanwa, nakudimbana; chiŋa ayimweneshi.

¹¹Antu awa aluwaŋeshaŋa matala amavulu, nakuleja yuma yabula kutela kuleja antu; alonda kuheta chatama.

¹²Mwinawu, kaprofwetu kawu wumu, welili nindi, AKereta hiyantwambi mafuku ejima, hiyanyama atama, hiyankópi afwa hakudya.

¹³Wunsahu iwu walala. Yikonkololi naŋovu hansaŋu oyu, kulonda akoli mukwitiya kwakukuhwelela.

¹⁴Bayi atiyilila tuheka twawaYudeya, hela kuleja kwawantu anasenuki dehi munsaŋu yalalaku.

¹⁵Kudi antu ajila yuma yejima yikwikala yajila; kudi antu ajilola abula kwitiya, kwosi chuma chikujilaku; ilaŋa yitoŋojoka yawu nichinleji chawu chamuchima chajilola hohu.

¹⁶Ahoshaŋa nawu twamwiluka Nzambi, ilaŋa nyidimu yawu yaya mwacheŋi, ashimana, ajikwa; kuyeseka nanyidimu yayiwahi yejima anekali antu akinjikewa.