Read MUKANDA WANZAMBI Tite 2 Bible Online

Tite 2 - MUKANDA WANZAMBI bible

Tite 2

¹Hakwila eyi lejaku nsaŋu jata mukuleja kwakoleshaŋaa.

²Akulumpi amayala chiŋa ekali ababala, akweti kalemesha, awundisha mumesu, akola mukwitiya, nimukukeŋa, nimukutatakena.

³Akulumpi awambanda niwena chiŋa endi mwendelaŋawu akwakujila; bayi ekala akwakutuŋula akwawuku; bayi asweja kunwa walwaku; ekali akwakuleja akwawu yuma yayiwahi,

⁴afumbi ansanda kukeŋa anfumu jawu nikukeŋa anyanawu;

⁵ekali awundisha mumesu, akadi kubajama, akwakukalakala kumatalawu, akwaluwi, akwakwovwahila anfumu jawu aweni, kulonda mazu aNzambi abuli kutukewa.

⁶Konkomwena anyikwenzi niwena ekali awundisha mumesu.

⁷Dimwekeshi wikali wakutalilahu munyidimu yayiwahi yejima; kuleja kweyi kwikali kwakadi kubomba nayatama, kwakalemesha.

⁸Hoshaku mazu alala akaŋanya kutanyishewa, kulonda kutiyisha nsonyi muntu wukukeŋa kuleta ntadi, abuli kumona chuma chakututena chatama.

⁹Yileji aŋamba ashakami nakwovwahila anyanta jawu, nakuyitiyisha kuwaha muyuma yejima, chakadi ntadi.

¹⁰Bayi eya wukombi wawunyemunyemuku, ilaŋa amwekeshi kashinshi kakawahi, kulonda awahishi kuleja kwaNzambi, Chamwinu chetu, muyuma yejima.

¹¹Muloŋa luwi lwaNzambi lwaletaŋa wamwinu wawantu ejima, lunamwekani dehi.

¹²Lwatufumbaŋa nawu tuleki kusekesha Nzambi, nikufwila yatama yampata yamunu mwishina, tushakami nyaka yinu nakuwundisha mumesu, nikuloŋa, nikwakama Nzambi;

¹³nakutalila kuchiŋeja kwatiyishaŋa kuwaha, nichakamwekana lubanji lwakulema kwaNzambi yetu muneni, Chamwinu chetu Yesu Kristu;

¹⁴yowu wadiheni hadetu kulonda atukuuli kukuluwa kwejima, aditookesheli antu akudihetela, akuta nyichima hanyidimu yayiwahi.

¹⁵Lejaku yumiyi nakukonkomwena nakukonkolola naŋovu yejima. Bayi witeja muntu kukudiwulaku.