Read MUKANDA WANZAMBI Tite 3 Bible Online

Tite 3 - MUKANDA WANZAMBI bible

Tite 3

¹Yanukishi antu ashakami nakwovwahila anyuli niakwawanta, nakwila mwakuyilejawu; anyakali kwila nyidimu yayiwahi yejima,

²nákubula kutena muntu chatama, nákubula kufwila ntadi; ekali amwovu adizoza nankashi kumesu awantu ejima.

³Muloŋa etu aweni hakusambila twadiŋi asupa, ajikwa, adimbewa; twadiŋi anduŋu jakufwila kweŋi nakweŋi, nanyizaŋalu yeŋi nayeŋi. Twashakamini nankunyi, niichima, nakuhelewa nakuhelaŋana.

⁴Chikwamwekeni kukokweja kwaNzambi, Chamwinu chetu, nikukeŋa kwindi kwakeŋa ayi antu,

⁵watwamwinini, bayi nanyidimu yakuloŋa yitwelili etu awenuku, ilaŋa mwaya luwi lwindi, nakuwelesha kwakuvwalika kwakwiha, nakutubalumuna twi kali amaha kudi Spiritu Wajila,

⁶atwichililuwu nankashi kudi Yesu Kristu, Chamwinu chetu;

⁷kulonda chanatubalumunuwu dehi naluwi lwindi, twi kali aloŋa, atubalumuni kwikala answana amwaya kuchiŋeja wumi wahaya nyaka.

⁸Izu idi datela kwitiya. Dichi nakeŋi nami wudikoleshumu naŋovu, kulonda antu anamwitiyi Nzambi, ashi muchima mukwila nyidimu yayiwahi. Yumiyi yayiwahi yakwashaŋa antu.

⁹Tondolwelaku kwihujola kwawusupi, ninyiyachi, nikufwila ntadi, nikuzuŋila nshimbi; mwenimu himwakwashaŋaku, himwekala chumaku.

¹⁰Muntu akonkomwenawu dehi kamu hela kayedi, chochadikaŋavi hohu, muleki.

¹¹Wuneluki dehi muntu wudi ochu nasenuki dehi munjila, navulumuni, naditanyishi dehi yomweni.

¹²Chinakakutemeshela Atemasi, hela Tikikusa, wakadihindaŋa kwinza kudami kuNikopoli, muloŋa natoŋojoki nami diku kwakanchelukila chishi ka.

¹³Yishinjikŋuku chachiwahi aZenasi mukwanshimbi, niApolosi munjila yawu; bayi abula chumaku.

¹⁴Antu etu adizi kulemesha nyidimu yayiwahi, kulonda adimweni yuma yawu nikukwasha akwawu.

¹⁵Antu ejima nidi nawu kunu anakwimwishi. Ŋimwishili antu atukeŋa mukukuhwelela. Luwi lwikali nanenu wejima wenu.