Read MUKANDA WANZAMBI Maheberu 10 Bible Online

Maheberu 10 - MUKANDA WANZAMBI bible

Maheberu 10

¹Nshimbi jikweti mwevulu wayuma yayiwahi yikwinza, hidiyi yuma yayeni muyekalilaku. Dihu hafumaŋa kukaŋanya kuwahisha chikupu antu akundaminaŋa kwakwihi, nayimuna yaketulaŋawu yimu hohu hamwaka hamwaka.

²Mutenowu aleka dehi kuyilambula. Akwakudifukula, neyi anayitookeshi dehi, chinleji chawu chamuchima hichikuyihisha cheŋi nanyiloŋaku.

³Muyimunoyu mwekala kwanukisha nyiloŋa hamwaka hamwaka.

⁴Muloŋa mashi awaŋombi amayala niawampembi hiyanatweshi kufumisha nyiloŋa hela hantuku.

⁵Dichi chenjiliyi mumpata yamunu mwishina hakwila nindi, Kukuketwila chimuna hela kukulambula himulambu, hiwayikeŋeli kweyuku, hiwukunloŋeshela mujimba.

⁶Eyi hiwunakeŋi nyilambu yamukuma yakushita, hela nyilambu yahanshiduku.

⁷Hinukwila nami, Tala, ami nenzi dehi nakwila muchima weyi, eyi Nzambi; chochanasonekuwu mumukanda wakuvuŋa nakuntenami.

⁸Chanasambiliyi dehi kuhosha nindi, Yimuna yakuketula nanyilambu, hela nyilambu yamukuma yakushita niyahanshidi, yalambulaŋawu mwaya nshimbi, hiwayikeŋeli kweyuku; hela kuyitiya kuwaha hiwayitiyili kuwahaku.

⁹Hakuhosha cheŋi nindi, Tala, ami nenzi dehi nakwila muchima weyi. Hakufumisha chatachi kulonda akoleshi chamuchiyedi.

¹⁰Nawena muchimowu anatujiliki nahimulambu wamujimba waYesu Kristu walambwiliyi kamu hohu bweŋi.

¹¹Chalala atupristu ejima emanaŋa hefuku hefuku nakukalakala, nakulambula kakavulu yimuna yakuketula yoyimu, yabulaŋa kutwesha kufumisha nyiloŋa hela hanti;

¹²hakwila yena, chanadilambuliyi ekali chimuna chakuketula chahanyiloŋa chimu chahaya nyaka, hakushakama kuchikasa chaNzambi chachidiilu;

¹³kufumisha henohu hakutalila hamba kabalumunawu akwankunyi nindi kwikala itanda dakunyendu yindi.

¹⁴Muloŋa yena nawahishi chikupu antu anajilikuwu, nahimulambu wumu chahaya nyaka.

¹⁵NiSpiritu Wajila nawa hakutushimwina wunsahu,

¹⁶muloŋa chanahoshiyi dehi nindi, Tiyenu chitiyaŋenu chinakatiyaloŋana nawu hakamana mafuku owu; dimu mwaneliyi Yehova nindi, Nakasha nshimbi jami muyitoŋojoka yawu, nakajisoneka munyichima yawu.

¹⁷Hakuhosha cheŋi nindi, Hinamba kaanuka nawa cheŋi nyiloŋa yawu hela kuluwa kwawuku.

¹⁸Kwekala kwanakena antu yumiyi hikwekala nawa cheŋi kulambula himulambu wahanshiduku.

¹⁹Dichi dinu enu ana kwetu, chitunabuli woma wakwijila mwajila namashi aYesu,

²⁰nanjila yayiha yatubuzililiyi, yayumi, yamwihina daku jika, wowu mujimba windi;

²¹chitukweti kapristu muneni wakuyula mwitala daNzambi,

²²tukundamenu kwakwihi namuchima walala, naku kuhwelela kwakweni, nanyichima yetu yakusampwila dehi, kulonda chinleji chamuchima chatama chitooki, namujimba wetu wakuwelesha dehi meji amawahi.

²³Tukakelenu kwiteja kwakuchiŋeja kwetu mbe, kwakenda kahumeka, muloŋa wakanini washinshika.

²⁴Tuditoŋojokenu muntu himuntu, kulonda tusaŋumuni akwetu kukeŋaŋana nakwila nyidimu yayiwahi.

²⁵Bayi tuleka kupompa neyi chelaŋawu amakwawuku, chiŋa kudilejaleja, chisweji nankashi nanichi chimunamoni ifuku odu hidikwinza nakuswila kwakwihi.

²⁶Muloŋa neyi tukuvulumuna chakukeŋamu, iku tweluka dehi nsaŋu yalala, hikunashali chimuna chikwawu chakuketwila nyiloŋaku;

²⁷kunashali kwawoma waweni wakutalila kusompesha ni kesi kabidima kakanoŋesha ayilumbu.

²⁸Muntu nadiwuli nshimbi jaMosi, chakumushimunawu kudi ayinsahu ayedi hela asatu, wukufwa chakadi luwi.

²⁹Muntu nadati Mwana kaNzambi, natoŋojoki mashi achitiyaŋenu amujilikiluwu nachu nindi hiyajilaku, nasawuli Spiritu waluwi, munatoŋojoki nenu akabula kumufuukula nawu nateli kubabesha kwabadikaku, tahindi?

³⁰Muloŋa twamwiluka yena welili nindi, Yami nukutenda, yami nukufweta. Cheŋi nawa nindi, Yehova wakasompesha antu indi.

³¹Hi chuma chi kweti woma kuholokela mumakasa aNzambi wamumi.

³²Ilaŋa nukenu mafuku akusambila, himwelili munamoni dehi chejeji, chimwatatakeneni mukulwisha nankashi namakabi;

³³iku antu adi nakutala chakuyisawulawu nakuyikabisha, iku munadibombi nawakwenu aweni mwomumu.

³⁴Mwatiyilili luwi antu adiŋi munyonji; chayibuwiluwu mahetenu kudi antu, mwovwahililumu nakuzaŋalala, nakwiluka enu aweni nenu mukweti iheta dabadika kuwaha dakakumaŋa.

³⁵Dichi bayi muleka kuumika kwenuku, kukweti masomu abadika akayisomonawu.

³⁶Chiŋa mutatakena kulonda chimukwila muneli dehi muchima waNzambi mwakatambuli chikaninu.

³⁷Nawu, Hanashali hanti nakwinza yena elaŋawu nawu wakenza, hakalabaku.

³⁸Cheŋi nawu, Muntu wami waloŋa wuku handila kukwitiya kwakukuhwelela; hakwila neyi yena wukufuntamu, muchima wami hiwukumutiya kuwahaku.

³⁹Hakwila etu kwetu hitudi akwakufuntamu kulonda tunoŋuku; tukweti kwitiya kwakutambula wamwinu wawumi.