Read MUKANDA WANZAMBI Maheberu 12 Bible Online

Maheberu 12 - MUKANDA WANZAMBI bible

Maheberu 12

¹Dichi dinu ninetu nawa, chanatunyeŋumukuwu kudi ivu dawayinsahu dikumaha, tutentekenu yuma yikutulemenaŋa yejima, ninshidi oyu yanyakalaŋa kutulamata, tutatakenenu nakutemuka njila yanatupiminuwu,

²nakutalisha mesu kudi Yesu, diyi mukwakubuza, diyi mukwakumanisha kwitiya kwakukuhwelela. Yena hansaŋu yamuzaŋalu wamushililuwu kumesu indi hakúumikila kulusu, hakudiwula nsonyi, nashakami kuchikasa chachidiilu chetanda daNzambi dawanta tenta-a.

³Toŋojokenu yeniwu wetejeli ntadi jawakwanshidi jasweja jadikaŋiluwu nindi, kulonda mubuli kuzeya nakuyekela munyichima yenu.

⁴Muchidi kanda mudikaŋi nakulwa nanshidi mumwenahu mashi.

⁵Munavulameni kukonkomwena kwayilejeluwu neyi chayilejaŋawu anyana nawu, Eyi mwanami, bayi wudiwula mwakufumbaŋayi Yehovaku; chakukukonkololawu kudi yena bayi wuzeyaku;

⁶muloŋa Yehova wafumbaŋa antu akeŋayi, wajipulaŋa anyana ejima atambulaŋayi.

⁷Itejenu kuyifumba, muloŋa Nzambi wayifumbaŋa neyi chafumbaŋawu anyana; indi mwananyi abulaŋa kufumbawu kudi tata yindi?

⁸Ilaŋa neyi abulaŋa kuyifumba kufumba kwamonaŋawu antu ejima, komana himudi anyana amwitalaku, mudi anyana amuchiputa.

⁹Cheŋi nawa, atata jetu ahamaseki atufumbilaŋa, twayilemeshelaŋa; komana tubuli kubadika kwovwahila Tata yawaspiritu kulonda tuhandi?

¹⁰Chalala wena atufumbili mafuku antesha mwamwenuwu kuwaha; hakwila yena nalondi kutukwasha, kulonda tutambuli kukujila kwindi.

¹¹Kufumba kwejima hikwatiyishana kuwaha hanuku, kwaneŋeshaŋa; hakwila kukukuminina kukusoŋesha nyikabu yakuwunda yaleta kuloŋa, kudi antu akwovwahilamu.

¹²Dichi ololenu makasa analepuki nimanuŋu anabuli Ŋovu.

¹³Ololenu njila ŋamu kwenda kulonda abalakataŋa abuli kuchiŋumuka, chiŋa ayuki.

¹⁴Londenu kuwunda nawantu ejima ni kujila, muntu wukuchibula hamba kamona Mwantaku.

¹⁵Shinshikenu habuli kwikala muntu wukukaŋanya kutambula luwi lwaNzambi; habuli kumena muji walula hiwukuyikabisha, niantu amavulu hiyakujilola;

¹⁶habuli kwikala chivumbi, hela muntu wasekesha yajila, neyi Esawu walandishili wuswana windi nakudya kwakudya hohenohu.

¹⁷Muneluki nkumininaku chakeŋeliyi nindi aswani nkisu, hela wayikeŋeli chacheni namadilu, amulekeli; muloŋa hamweni muwubalumwinuku.

¹⁸Himunenzi kumpidi yatweshekeli kukwata chikasa, yabidimini kesuku; himunenzi kukwiyila, nikumwidima, nikumpepela yenenuku;

¹⁹himunenzi kwizu dampiŋa yikuvuma, nikwizu dahosheli mazuku; izu odu chaditiyiluwu alembeli nawu bayi dihosha nanetu mazu amakwawuku.

²⁰Muloŋa ochu chayilejeluwu nawu, Hela neyi kanyama wukudata kumpidi oyu, akamwasoli malola; hiyatwesheli kwiteja mwoku.

²¹Kutalahu kwadiŋi kukweti woma nankashi; dichi Mosi welili nindi, Natiyi woma waweni, hinukuzaala nikuzaala.

²²Ilaŋa munenzi kumpidi yaZiyona kuŋanda yaNzambi wamumi, yowu Yerusalema yamwiwulu, kumazaza awaŋelu aweni akachindewaŋa;

²³munenzi kwanahwiluwu ejima, kwokuchipompelu chawawedi asonekawu dehi mwiwulu, kudi Nzambi mukwakusompesha antu ejima, kudi aspiritu jawantu aloŋa anawahishuwu dehi chikupu,

²⁴kudi Yesu ihaku dachitiyaŋenu chachiha, kumashi akusampula ahoshaŋa yuma yayiwahi yakubadika yahoshaŋa mashi aAbeli.

²⁵Babalenu mwakenda kaleka wukuhosha. Muloŋa wena chalekeluwu wayikonkomweneni hamaseki abulili kupuluka, indi etu tukupuluka ŋahi neyi tukufutalela yena wukukonkomwena kwiwulu?

²⁶Henohu izu dindi dakankishili iseki, hakwila hanu nakani nindi, Kunashali kapampa kakwawu kamu hinakakankisha iseki hohuku, nakakankisha niiwulu.

²⁷Ichi chaneliyi nindi, Kunashali kapampa kamu; chaya mukwila nawu oyu yuma yakakankishawu, kafwampi yuma yaleŋeluwu, nindi akayifumishaku, kulonda yuma yikubula kukanka yakashaluku.

²⁸Dichi chitukutambula wanta wakakankishewaŋa, tusakililenu kulonda tukalakeli Nzambi nakumutiyisha kuwaha nawoma wakwakama Nzambi;

²⁹muloŋa Nzambi yetu hikesi kanoŋeshaŋa.