Read MUKANDA WANZAMBI Maheberu 2 Bible Online

Maheberu 2 - MUKANDA WANZAMBI bible

Maheberu 2

¹Dichi twadi kusweja kusha muchima kunsaŋu oju jitwatiyili, twakenda kahuŋumuka.

²Muloŋa neyi mazu ahosheluwu nawaŋelu akoleli, ninyiloŋa yejima nikujikwa kwejima kwatambwili wufwetu waloŋa,

³indi etu tukupuluka ŋahi, neyi tukusekesha wamwinu watoha chi kuma hichi? Wamwinu wásambilili kushimunawu kudi Mwanta, atukolesheleluwu kudi antu atiyili.

⁴Nzambi nawa hakushimuna wunsahu hamu nawena, nayinjikijilu, nayihayamisha, nanyidimu yaŋovu yeŋi nayeŋi, nayamukunkulu yaSpiritu Wajila, mwaya muchima windi yomweni.

⁵Muloŋaŋelu hidiwu ovwahishililiyi iseki dawantu dakenza ditwatenaŋetuku.

⁶Muntu wumu washimuna dehi kumukanda wajila wumu nindi, Muntu hichumanyi mwaka wumushi kumuchima, hela mwana kamuntu mwaka wumuhempuli?

⁷Wamwilishili wakuminamu chanti hadi aŋelu, wamuvwikili chibaŋula chakulema nimpuhu, wamushilili kuyula nyidimu yakumakaseyi;

⁸wamwovwahishili yuma yejima yiikali kwishina danyendu yindi. Nanochu chanamwovwahishiliyi yuma yejima, hanashiyi chuma chakubula kumwovwahilaku. Katataka kanda tumoni yuma yejima kumwovwahila.

⁹Ilaŋa tunamoni Yesu, elishiluwu wakuminamu chanti hadi aŋelu, kulonda akatompeli antu ejima kufwa naluwi lwaNzambi, anamuvwiki dehi chibaŋula chakulema nimpuhu, nanochu chamweniyi makabi akufwa.

¹⁰Muloŋa chamuteleleli yena mwiniyuma yejima, kwekala yuma yejima, kufundisha nlomboli yawamwinu wawu namakabi, kulonda ekali welukamu chikupu nanochu chakushikijayi anyana amavulu kukulema.

¹¹Dichi yena wajilikaŋa, ninawa anajilikuwu, wejima wawu afuma kudi yowumu hohu; dihu hanafumi kubula kutiya nsonyi yakuyitena nindi ana kwami;

¹²nindi, Nukushimwina ana kwami ijina deyi; nukukwimbila tumina twakukuhameka mukachi kachipompelu.

¹³Cheŋi nindi, Ami nakamukuhwelela. Cheŋi nawa nindi, Talaku ninami nianyana ananyinkiyi Nzambi.

¹⁴Chelawu anyana ekala nanyijimba yamashi, dichi niyena nawa hakwikala mwomumu; kulonda chakufwayi yena, abalumuni diyabolu wadiŋi naŋovu yakufwa ekali chimwaŋaji;

¹⁵apulwishi ejima adiŋi muwuduŋu wawoma wakufwa nyaka yawu yejima.

¹⁶Muloŋa chalala hakwataŋa kunsaŋu jawaŋeluku, nakwati kunsaŋu jawanyana kaAbarahama.

¹⁷Dichi chamuwahilili yena kwikala neyi ana kwindi muyuma yejima, kulonda ekali kapristu muneni waluwi nakashinshi kunsaŋu yaNzambi; ekali ifutu danyiloŋa yawantu.

¹⁸Chakabiliyi yomweni nakumweseka, yena natweshi kukwasha antu akwesekawu.