Read MUKANDA WANZAMBI Maheberu 4 Bible Online

Maheberu 4 - MUKANDA WANZAMBI bible

Maheberu 4

¹Dichi chanatushiyiluwu chikaninu chakwijila mukunooka kwindi, tutiyenu woma hakenda kamwekana mwinenu wumu wukufwana neyi nakaŋanyi kushikamu.

²Chalala ninetu anatushimwini nsaŋu yayiwahi neyi chayishimwininuwu niwena; ilaŋa mazu atiyiluwu hiyayikwashiluku, muloŋa antu atiyili abulili kubombelaku kukuhwelela.

³Dichi etu tunakuhweleli tweŋilaŋa mukunookoku kwateneniyi nindi, Chinazuwili nasanyikili nami hiyakeŋila mukunooka kwamuku; kutoŋa chalala nyidimu yamanini kufumisha haaliluwu chikuku champata yamunu mwishina.

⁴Muloŋa hamukanda wajila hacheŋi nateni ifuku damu chitanu nachiyedi nindi, Chamanishiliyi Nzambi nyidimu yindi yakoŋelaŋayi yejima, hakunooka hefuku damu chitanu nachiyedi.

⁵Wahoshelumu cheŋi nindi, Hiyakeŋila mukunooka kwamuku.

⁶Dichi dinu kunashali kwijila amakwawu, hakwila wena ásambilili kushimwinawu nsaŋu yayiwahi akaŋenyi kwijila muloŋa wakujikwa,

⁷hakutena cheŋi ifuku dimu mudi Davidi, henohu munahiti dehi nyaka, nindi, Lelu. Mwomwanahoshiyi dehi nindi, Lelu neyi mukutiya izu dindi bayi muchinchikisha nyichima yenuku.

⁸Muloŋa neyi Yoshuwa wayinkeli kunooka, Nzambi hadi kutena nawa cheŋi ifuku di kwawu kukukumininaku.

⁹Dichi kudi antu aNzambi kunashali kunooka kwalala.

¹⁰Muloŋa muntu nepili dehi mukunooka kwindi, niyena naleki nawa nyidimu yindi, nanooki dehi neyi chanookeliyi Nzambi hamanishiliyi nyidimu yindi.

¹¹Dichi tushenu muchima hakwijila mukunookoku, hakenda kamwekana muntu wukudimbuka nakulondeja mwajikwiluwu wena.

¹²Muloŋa mazu aNzambi amomi, akweti Ŋovu, atwa chakubadika mpoku yakabali yikweti wumwemu kuyedi, apwikaŋa nakwambula wumi naspiritu, manuŋi namanji, asweja kushinshika yitoŋojoka niyafuukulaŋa muchima.

¹³Kwosi chuma chaleŋeluwu chinabuli kumwekana kumesu induku, yuma yejima yidi nzekesi, yidi hatooka kumesu ayena itwamba kadimona nindi.

¹⁴Dichi chitukweti kapristu muneni naŋandakani dehi mawulu, yowu Yesu, Mwana kaNzambi, tukakelenu kwiteja kwetu mbe.

¹⁵Muloŋa tukweti kapristu muneni watweshaŋa kutiya wushona chitwazeyazeyaŋetu, niyena amwesekeli muyuma yejima neyi chatwesekaŋawu etu, ilaŋa mudi yena nshidi nehi.

¹⁶Dichi tukundamenu kwakwihi netanda daluwi chakadi woma, tutambuli kwanakena, tumoni luwi lwakutukwasha hitukumona kukala.