Read MUKANDA WANZAMBI Maheberu 6 Bible Online

Maheberu 6 - MUKANDA WANZAMBI bible

Maheberu 6

¹Dichi tulekenu kuhosha nsaŋu jaKristu jatachi, tukulenu tupami. Bayi twala cheŋi chikuku chakubalumuka mumuchima nakuleleanyidimu yafwa, nichakumwitiya Nzambi,

²nichakuleja nsaŋu jakuwelawela nŋakunaŋika makasa nŋakusaŋuka afu nŋakusompa kwahaya nyakaku.

³Neyi Nzambi neteji tukwila mwenomu.

⁴Muloŋa wenawa amweni dehi chejeji, atompeli chamukunkulu chamwiwulu, atambwili yaSpiritu Wajila,

⁵atompeli mazu aNzambi nawu amawahi, niŋovu janyaka yakenza,

⁶neyi wena akulekamu, hiyakutwesha kuyovwahisha cheŋi abalumuki mumuchimaku, Muloŋadi nakupopela Mwana kaNzambi kukulusu munyichima yawu chachiliha, enda amusawula hatooka.

⁷Muloŋa iseki dinanwi nvula yanokaŋa kakavulu, dikusoŋesha yisakola yatela kudya awa anadidimi, adikiswilaŋa kudi Nzambi.

⁸Ilaŋa neyi dikusoŋesha nyiŋa nanzonzonzu akudisekesha, keŋa dishiŋewi; kukumisha kweseki odu hikusukuma.

⁹Hakwila enu akwetu twakeŋa a, hela tunahoshi mwenimu, tunayikuhweleli netu mukweti yuma yabadika iyi kuwaha, yuma yenzaŋa nawamwinu.

¹⁰Muloŋa Nzambi waloŋa, hakavulamena mudimu wenu hela kukeŋa kumwakeŋa eli ijina dinduku, nanochu chimwakalakeleli akwakujila, nihanu muchidi kuyi kalakela.

¹¹Tunakeŋi netu wejima wenu hamuntu hamuntu mudikwatishi chalala chochimu, kulonda musweji kuchiŋeja, ndo nikunsa.

¹²Mubuli kushimpokela, chiŋa mwimbujoli wenawa akuswana yikaninu nakukuhwelela nakudiwunjika.

¹³Chamukaninuwu Abarahama kudi Nzambi, chabuliliyi mukwawu wamubadika, hakudisanyika yomweni,

¹⁴nindi, Chalala kukisula nakakukiswila, kuvuhsha nakakuvulishila anyaneyi.

¹⁵Chadiwunjikihyi nakutatakena, hakutambula chikaninu.

¹⁶Antu asanyikaŋa kwawu ayibadika; ntadi jawu jejima ajiketulaŋa nakusanyika, kulonda kukoleshamu chikupu.

¹⁷Chochimu niNzambi, chakeŋeliyi kuleja chachiwahi answana jachikaninu chimwabulaŋa kubalumuka mwatoŋweliyi, hakushaku kusanyika;

¹⁸kulonda nayuma yiyedi yakabalumukaŋa, yabulaŋa kutweshayi Nzambi kutwamba, tumwenuku kukundeja kukweti Ŋovu, etu tunatemukili kwakupulukila, tukwati kukuchiŋeja kwanatushiluwu kumbidi.

¹⁹Kuchiŋejoku kwemikishaŋa wumi wetu, neyi chikuŋu chakwimikisha nachu watu; kwalala, kwakola, kweŋila mwamweni mwajila mwakujika nehina;

²⁰mwenomu mweŋilayi Yesu, mukwakuyaloŋahu dehi kumbidi hansaŋu yetu, anamukunjiki dehi kwikala kapristu muneni wahaya nyaka wafwana neyi Melekizedeki.