Read MUKANDA WANZAMBI Maheberu 8 Bible Online

Maheberu 8 - MUKANDA WANZAMBI bible

Maheberu 8

¹Nochu mwenimu namutukuhosha chaya mukwila netu tukweti kapristu muneni wudi ochu, washakama dehi kuchikasa chachidiilu chetanda dawanta daMukeleŋi mumawulu;

²yena Kristu mukwakukalakala mumalala, nimutabanaka yalala yalemenuwu kudi Mwanta bayi kudi muntuku.

³Muloŋatupristu amaneni ejima ayikunjikaŋa kumudimu wakulambula yamukunkulu nikuketula yimuna, dichi chinawahi niyeniwu ekali nachuma chakulambula.

⁴Neyi wadiŋi hamaseki hadi kutwesha kwikala kapristu nihantuku, muloŋa kwekala amakwawu alambulaŋa yamukunkulu mwaya nshimbi.

⁵Chuma chakalakalaŋawu wena hichuma chakufwikija nachu, himwevulu wayuma yamwiwulu; muloŋa chakeŋeliyi Mosi kutuŋa tabanaka, amukonkomweneni nawu, Wutalaŋa chiŋa wakela mwejima mwaya chesekelu chayu, chiyakulejeluwu hampidi.

⁶Hakwilichi yena natambuli dehi mudimu wabadika nankashi kuwaha, nanochu chaneliyi hiihaku dachitiyaŋenu chabadika kuwaha, chanatiyaŋenuwu nayikaninu yabadika kuwaha.

⁷Muloŋa neyi chakusambila chabulili hatama hiyadi kukeŋakeŋa chamuchiyeduku.

⁸Muloŋa chayimweniyi kuluwa, Yehova hakwila nindi, Tiyenu, kwakenza mafuku inakatiyaloŋana chitiyaŋenu chachiha namutaŋa waIsarela nimutaŋa waYuda.

⁹Hichakaya mwaya chitiyaŋenu chinatiyaŋeni nawankakulula jawu, ifuku dinayikwatili kuchikasa nakuyifumisha mwituŋa daEjipituku; chena chitiyaŋenochu achijahili, ninami hinayishili kumuchimaku; dimu mwanahoshiyi Yehova.

¹⁰Yehova nindi, Tiyenu chitiyaŋenu chinakatiyaloŋana namutaŋa waIsarela hakamana mafuku owu; nakasha nshimbi jami muyitoŋojoka yawu, nakajisoneka munyichima yawu. Nakekala Nzambi yawu, niwena akekala antu ami.

¹¹Hiyakadilejaleja nawa cheŋa, iwu nakuleja mukwawu, iwu nakuleja mana kwindi, nindi, Ilukaku Yehovaku; muloŋa akaŋiluka wejima wawu, kufumisha kudi wakadi kulema, ndo nikudi wasweja kulema.

¹²Muloŋa ami nakayanakena kuluwa kwawu, ninyiloŋa yawu hinakayanuka nawa cheŋuku.

¹³Chanateniyi chitiyaŋenu ochu nindi chachiha, komana chatachi nachilishi dehi chachikulu. Hakwila ochu chikuya nakunoŋa, chela dehi chanyaka, keŋa chimini.