Read MUKANDA WANZAMBI Maheberu 9 Bible Online

Maheberu 9 - MUKANDA WANZAMBI bible

Maheberu 9

¹Hela chitiyaŋenu chatachi nichena chadiŋi nayijila yakukalakela nachu Nzambi, nimalala ampata yamunu mwishina.

²MuIoŋa mutabana-koyu yatachi yatuŋiluwu mwadiŋi inoŋu, nimesa, nimankendi akutenteka kumesu aNzambi, mwatenaŋawu nawu Mwajila.

³Kwishinadi dehina dakujika damu chiyedi, kwadiŋi tabanaka yatenaŋawu nawu Mwamweni Mwajila;

⁴mwadiŋi cheŋa chawuru chakusendela insensi, nichimbaŋu chachitiyaŋenu chakulamika nawuru chejima kwi-ndo, mwadiŋi inuŋu yawuru yamanina, nimbwechi yaAroni yasapukili, nimalola awubasa achitiyaŋenu.

⁵Hewulu dachimbaŋu hadiŋi akerubi alubanji lwakulema nakubuta hetanda daluwi. Kutena yumiyi katataka hachuma hachuma, kutwesha nehi.

⁶Chakwilawu analoŋeshi dehi yumiyi, atupristu hiyakwijila mutabanaka yatachi hefuku hefuku nakukalakala nyidimu yayu.

⁷Ilaŋa yamuchiyedi kapristu muneni hakwijila ŋamu inka windi hamwaka wumu kamu, hamwaka wumu kamu, chiŋa namashi akulambula hamujimba windi yomweni, nihansaŋu yakuluwaluwa kwawantu amakwawu.

⁸Spiritu Wajila washimwini nachu, nindi njila yakwijila Mwamweni Mwajila yachidiŋi kanda ayimwekeshi, hachidiŋi kwimana tabanaka yatachi.

⁹Yumiyi hichishimu chamakonu. Alambulaŋa yamukunkulu nakuketula yimuna yikukaŋanya kuwahisha chinleji chamuchima wamuntu wadifukulaŋa,

¹⁰nanochu chanatenuwu yakudya nakunwa, nakuwelawela kweŋi nakweŋi; hiyijila yawuntu hohu nichamba kabalumunawu yuma yejima yiikali yayiha.

¹¹Hakwila chanenziyi Kristu, kapristu muneni wayuma yayiwahi yikwinza, natabanaka yabadika kulema, yabadika kuwaha, yakadi kwila namakasa, hiyakuleŋa kwamunuku,

¹²hakwijila Mwajila kamu hohu bweŋi, bayi namashi ampembi nawanyana kaŋombuku, ilaŋa namashi indi yomweni, chanamoniyi chakukuula nachu chahaya nyaka.

¹³Neyi mashi awampembi ni aŋombi amayala nimawuti eyoŋa daŋombi wamukaji akusampwilawu antu ajilola dehi, akujilika yuma yawuntu,

¹⁴komana mashi aKristu, wadilambwili kudi Nzambi chakadi hatamayi, mwomudi Spiritu wahaya nyaka, akubadika nankashi kutookesha chinleji chenu chamuchima, chambuki kunyidimu yafwa kulonda kukalakela Nzambi wamumi.

¹⁵Dichi yena neli dehi ihaku dachitiyaŋenu chachiha, kulonda awa anatambikuwu akatambuli chikaninu chawuswana wahaya nyaka, nanochu chikunafwi dehi muntu wakuyikúula kunyiloŋa yadiŋi yakuchitiyaŋenu chatachi.

¹⁶Muloŋa kudi kushiika kwashiikaŋa muntu wuchidi wamumi; kushiikoku kwilamu chiŋa yenowu muntu nafwi dehi.

¹⁷Muloŋa kushiikoku kwikala naŋovu chiŋa yenowu muntu nafwi dehi; hachidiyi muntu wamumi hikwekalaŋa naŋovuku.

¹⁸Dichi hela chitiyaŋenu chatachi, hiyachilikili chakadi mashuku.

¹⁹Cheliliyi Mosi nayileji dehi antu ejima nshimbi jejima, hakunona mashi awanyana kaŋombi niyawampembi, nameji, nawanda wuchinana, nachiputa chanamutuntamu, hakusampwila mukanda waweni niantu ejima.

²⁰Hakwila nindi, Talenu mashi achitiyaŋenu chanatiyaloŋaniyi Nzambi nanenu.

²¹Dichi nitabanaka niyuma yanyidimu yayu yejima, hakuyisampwila mashi mwomumu.

²²Ami nami, mwaya nshimbi hanashali hanti nakutookesha yuma yejima namashi. Chakadi kupwekesha mashi kwosi kwanakenaku.

²³Dichi chawahili kutookesha yifwikija yayuma yamumawulu nayijiliyi, hakwinza yuma yamumawulu yayeni, chiŋa ayitookeshi nayimuna yakuketula yabadika yeniyi kuwaha.

²⁴Muloŋa Kristu hepilili mumalala akutuŋa namakasa, akufwikŋa neyi malala awenuku, ilaŋa wepilili mwiwulu mwamweni, kulonda kutumwekena katataka kumesu aNzambi;

²⁵bayi nakudilambula yomweni kakavuluku, neyi cheŋilaŋayi kapristu muneni mwajila hamwaka hamwaka, namashi akwila himashi induku.

²⁶Neyi dimu, mutenowu wakaba dehi kakavulu kufumisha haaliluwu chikuku champata yamunu mwishina. Ilaŋa katataka anamumwekeshi kamu holiu, kunu kunsa yanyaka, kulonda afumishi nshidi nakudilambula yomweni neyi chimuna chakuketula.

²⁷Dichi dinu chaneluwu antu anayifuukwili kufwa kamu, nkumininaku hikusompesha;

²⁸mwomumu niKristu nawa chanahimulambu luwu kamu kukoola nyiloŋa yawantu amavulu, wakamwekana kamuchiyedi, kulonda akayamwini antu amutalilaŋa, bayi hansaŋu yanshiduku.