Read MUKANDA WANZAMBI Jakobo 2 Bible Online

Jakobo 2 - MUKANDA WANZAMBI bible

Jakobo 2

¹Enu ana kwami, bayi mwikala nakwitiya Mwanta wetu Yesu Kristu walema, nakwakama antu kumesuku.

²Muloŋa neyi muchipompelu chenu mukwijila muntu wavwala kazeya kawuru nimahina amawahi, mwiŋila nawa nikazweŋi wavwala mahina atama,

³enu himukulemesha owu wavwala mahina amawahi, himukwila nenu, Shakamaku hanu hahawahi; himukumwila kazweŋi nenu, Imanaku oku; indi kwiji, Shakamaku hamaseki kunyendu yami.

⁴Chimwelaŋa mwenomu, mwaambulaŋa mukachi kenu, munekali akwakusompesha nayitoŋojoka yatama.

⁵Tiyenu enu ana kwami nakeŋa, Nzambi watondeli atuzweŋi abula yuma yamunu mwishina kwikala akwakuheta mukukuhwelela, nianswana awanta wakaniniyi antu amukeŋa

⁶Hakwila enu munadiwuli kazweŋi. Akwakuheta hidiwu ayikabishaŋenu nakuyikokela muyota yakusompelaku?

⁷Hidiwu nawa atukaŋa ijina dalema dayitenaŋawuku?

⁸Neyi mwovwahilaŋa lushimbi lwawanta lwamwaya mukanda wajila wakwila nawu, Keŋaku mukwenu neyi chiwadikeŋa eyi aweni; mwelaŋa chachiwahi.

⁹Hakwila neyi mwaakamaŋa antu kumesu mwavulumunaŋa, lushimbi ilu lunayihishi, muneli dehi akwanyiloŋa.

¹⁰Muloŋa muntu wukuhemba nshimbi jejima, Ilaŋa hakuluwa muchuma chimu, nahi kunshimbi jejima.

¹¹Muloŋa yena welili nindi, Kwila wuvumbi chinjila; diyi nawa welili nindi, Kujaha muntu chinjila. Nochu neyi wunabuli kwila wuvumbi, ilaŋa wunajahi mukwenu, wunamotoki dehi nshimbi.

¹²Hoshenuŋa nakwila mwatelela antu akasompeshawu nalushimbi lwawaana.

¹³Muntu wukubula kutiyila akwawu luwi akumusompesha chakadi luwi; luwi lwemikaŋa kusompesha mushindu.

¹⁴Enu ana kwami, neyi muntu wukwila nindi ni kweti kwitiya, ilaŋa kwila nyidimu nehi, chikukwashana ŋahi? Kwitiyoku kukutwesha kumuhandisha, tahindi?

¹⁵Neyi mana kwenu hela muhelenu wudi nawuvu, nabuli yakudya yalelu,

¹⁶mwinenu wumu hakumwila nindi, Endaku chachiwahi, tiyaku iyena, ikutaku; hakwila kumwinka yuma yakumujimba yanakaankiliyi nehi, chikukwashana ŋahi?

¹⁷Dichi nikwitiya kwakadi nyidimu kukudifwila kanka waku.

¹⁸Kwiji kukwikala muntu wukuhosha nindi, Eyi wukweti kwitiya, ami ni kweti nyidimu; nleji kwitiya kweyi kwakadi nyidimu yeyi, ninami nukukuleja kwitiya kwami nanyidimu yami.

¹⁹Eyi wetiyaloŋa neyi Nzambi wekala wumu; welaŋa chachiwahi. Ademoni niwena etiyaloŋa, hiyakuza ala nikuzaala.

²⁰Eyi muntu wabula maana, ilukaku neyi kwitiya kwakadi nyidimu kwamukunkulwayi.

²¹Nkakulula yetu Abarahama, chalambwiliyi mwanindi Isaka hakameŋa haloŋeli nanyidimuku, tahindi?

²²Wunamoni kwitiya kwakoŋeli chimu nanyidimu yindi, nikwitiya kwelili kwalala nanyidimu.

²³Dimu mwalumbulukila mukanda wajila welili nawu, Abarahama wamwitiyili Nzambi, amufuukwililichu nawu hikuloŋa, hiyakumutena nawu ibwambu daNzambi.

²⁴Munamoni komana muntu waloŋaŋa nanyidimu, bayi nakwitiya hohuku.

²⁵Mwomumu nichivumbi Rahaba nawa waloŋeli nanyidimu, hatambwiliyi antemesha nakuyifuntisha njila yacheŋi.

²⁶Chafwa mujimba wakadi spiritu, dichi nikwitiya kwakadi nyidimu kwafwa.