Read MUKANDA WANZAMBI Jakobo 3 Bible Online

Jakobo 3 - MUKANDA WANZAMBI bible

Jakobo 3

¹Enu ana kwetu, bayi mwikala ankuluŋaŋa amavuluku; muloŋa tuneluki netu twakamona kusompesha kwakubadika.

²Muloŋa wejimawetu twaluwaŋa muyuma yayivulu. Muntu wukubula kuluwa mukanwa diyi muntu walala chikupu, natweshi kufumba nimujimba wejima.

³Dichi chitwashaŋa nyibulu namutunwa twawatuwalu kulonda atwovwahili, hitukuteŋulula ninyijimba yawu yejima.

⁴Toŋojokenu nimaatu nawa; hela asweja kutoha, ahuŋumukaŋa nampepela jasweja Ŋovu, ilaŋa ayiteŋululaŋa natuyilapu twanyanya nankashi, kwejima kwanakeŋuwu akwakuteŋulula.

⁵Dimu nawa niidimi hikachidi kamujimba kanyanya, kadisambaŋa yuma yamaneni. Toŋojokenu mpata kutoha yahaŋa nakesi kantesha!

⁶Idimi hikesi, himpata yaheŋa mukachi kayidi yetu, datamishaŋa mujimba wejima, dabutulaŋa kesi kayuma yamujimba yejima, dabutuka dehi kesi kakaluŋa kachinana.

⁷Muloŋa antu afwomona dehi nyichidi yawanyama niatujila yejima, niyuma yakayilaŋa, niyuma yamukaluŋalwiji; ninodu anayifwomoni.

⁸Hakwinza idimi kwosi muntu watweshaŋa kudifwomonaku; hichuma chatama chakanookaŋa, denzala dehi wulembi wafwana.

⁹Twakiswilaŋa nachu Mwanta, yowu Tata; twashiŋaŋa nachu antu aleŋeluwu adifwana naNzambi.

¹⁰Kukanwa kokamu himukwidika ninkisu nikushiŋana. Enu ana kwami, kwila mwenimu chinjila.

¹¹Kaseloki kasefukaŋa meji amawahi nialula kudisu dodimu, tahindi?

¹²Enu ana kwami, mutondu wachikuyu wukutwesha kusoŋa maolive? hela muvinyu wukutwesha kusoŋa mawundu achikuyu, tahindi? Nochu hela meji alumpuka hiyakutwesha kubalumuka amawahuku.

¹³Wudi nama ana nakashinshi mukachi kenu hinyi? Amwekeshi nyidimu yindi nanochu chashakamaŋayi chachiwahi, nakudizoza mwaya maana.

¹⁴Hakwinza neyi mukweti ndulu nikufwilaŋana munyichima yenu, bayi mudisamba nakutwambila nsaŋu yalalaku.

¹⁵Maanawa ahamaseki, amujimba, awademoni; hidiwu afumaŋa mwiwuluku.

¹⁶Kwekala ichima nakufwilaŋana, diku kwekala nikuluwaŋana ninyidimu yatama yejima.

¹⁷Hakwila maana afumaŋa mwiwulu, kusambila amawahi, nkumininaku awunda, ovwaha, anyakala kutiya, enzala luwi nanyikabu yayiwahi, hiyaheta ntadi hela wufwikŋuku.

¹⁸Antu awunda akuwaŋa kuwunda, aaŋulaŋa kuloŋa.