Read MUKANDA WANZAMBI Jakobo 4 Bible Online

Jakobo 4 - MUKANDA WANZAMBI bible

Jakobo 4

¹Indi majita namadombu mukachi kenu afumaŋa hanka? Afumaŋa kuyuma yimwatiyaloŋa kuwaha yaletaŋa njita muyidi yenu.

²Mwafwilaŋa yuma, kuyimona nehi; mwajahaŋa nikutiya lwisu, kutwesha kumwenamu yuma nehi; mwalwishaŋa nakwasa njita. Chimwabulaŋa kutambula, muloŋa mwabulaŋa kulomba.

³Chimwalombaŋa, kutambula nehi, muloŋa mwalombaŋa chatama, kulonda mwakayikisaŋani nayuma yimwatiyaloŋa kuwaha.

⁴Enu ayivumbi, himuneluki nenu wubwambu wampata yamunu mwishina wukweti nkunyi naNzambuku? Dichi muntu wukukeŋa kukwata wubwambu nampata yamunu mwishina, nadibalumuni dehi kwikala mukwankunyi naNzambi.

⁵Mwatoŋojokaŋa nenu mukanda wajila wahoshaŋa tuhu, tahindi? Spiritu washakamishiliyi mudetu wafwilaŋa nalwisu, tahindi?

⁶Hakwila yena wavulishaŋa luwi. Dichi chakwilayi nindi, Nzambi wadikaŋaŋa nawakwakudinka wanta, hakwila akwakudizoza wayinkaŋa a luwi.

⁷Dichi mwovwahilenu Nzambi, hakwinza diyabolu dikaŋenu nindi, niyena wukuyitemuka.

⁸Kundamenu kwakwihi naNzambi, niyena wukukundama kwakwihi nanenu. Enu akwanshidi, isukenu kumakasenu; enu akwanyichima yiyedi, tookeshenu munyichima yenu.

⁹Tiyenu kumuchima bwi, neŋenu, dilenu. Kuseha kwenu kubalumuki kuneŋa, nikuzaŋalala kwenu kubalumuki kudihomba kumesu.

¹⁰Dizozenu kumesu aMwanta, niyena wukuyitohesha.

¹¹Enu ana kwetu, bayi mudituŋaulaŋaku. Muntu wukutuŋiula mana kwindi hela kumusompesha, natuŋiuli nshimbi nikujisompesha. Neyi eyi wukusompesha nshimbi, hiwuneli mukwakwila nshimbuku, chiŋa mukwakujisompesha.

¹²Mukwakuhana nshimbi nikusompesha yowu wumu hohu bweŋi, yowu natweshi kuhandisha nikukisaŋana; indi eyi yeyinyi mwaka wusompeshi mukwenu?

¹³Ehe-e! Enu mwelaŋa nenu, Hela lelu, hela kumadiki tukuya kumukala wakampanda, twakashakamaku mwaka wumu, twakalandujola nakuhetelaku;

¹⁴kutoŋa yimukumona kumadiki himunayilukuku. Wumi wenu wudi ŋahi? Enu mudi mbundu, yamwekanaŋa mpinji yantesha, kukasumuka yinahiti dehi.

¹⁵Chachiwahi kwila nenu, Neyi Mwanta neteji tukuhanda, tukwila mwenimu hela mwenomu.

¹⁶Ichi dinu, chimwadinkaŋa wanta himukudisamba; kudisamba kwejima kumwadisambaŋochu kwatama.

¹⁷Dichi muntu neluki kwila mwamuwahi, yena kwilamu nehi, chinekali dehi nshidi yindi.