Read MUKANDA WANZAMBI Jakobo 5 Bible Online

Jakobo 5 - MUKANDA WANZAMBI bible

Jakobo 5

¹Ehe-e, enu akwakuheta! Tumpenu nakukaluka nyiteti nayihuŋuyimukukeŋa kumona.

²Mahetenu atoka dehi, mahinenu adiika dehi kudi tunzembula.

³Wuru wenu nisiliva yenu yakwata dehi ndala, nindala yayu yakayishimuna wunsahu watama, yakadya nyijimba yenu neyi kesi. Munadilumbikili maheta mumafuku akukumisha.

⁴Tiyenu, wufwetu wawantu akalakeli, amunini mumahenu, wumunakakeli chawukombi, hiwukubilela; nimabila anawa amunini anepili dehi mumatu aYehova wamazaza.

⁵Munashakami nakuluŋa hanu hamaseki; munaditiyishi kuwaha; munaditoheshi neyi yimuna yikukeŋa kujahawu.

⁶Munahishi mukwakuloŋa, munamujahi; yena kudikaŋa nanenu nehi.

⁷Dichi enu ana kwetu, diwunjikenu nichakenzayi Mwanta. Toŋojokenu ndimi chatalilaŋayi nyikabu yayiwahi yahamaseki, wadiwunjikaŋa nichiyakayinokela nvula yatachi niyakukuminina.

⁸Dichi ninenu diwunjikenu, dikoleshenu munyichima yenu, muloŋa kwinza kwaMwanta kudi kwakwihi.

⁹Enu ana kwetu, bayi muditobeshaŋaku, kulonda abuli kuyisompesha; taleŋu, mukwakusompesha nemani kuyisu kachi.

¹⁰Enu ana kwetu, imbujolenu atuprofwetu ahosheli mwijina daYehova, chamwenuwu yihuŋu nichadiwunjikiluwu.

¹¹Toŋojokenu chitwatenaŋa antu atatakeneni, netu akooleka. Munatiyi mwatatakeneniyi Yoba; munamoni nimwakumishaŋayi Yehova, chaswejaŋayi Yehova kutiyila antu wushona niluwi.

¹²Enu ana kwami, chuma chasweja kulema yowu kubula kusanyika hela iwulu hela iseki hela yuma yacheŋi; kwiteja kwenu kwikala yowu, Eŋa; nikukanisha kwenu kwikala yowu, Nehi; kulonda abuli kuyisompesha.

¹³Omu mukachi kenu mudi wamonaŋa yihuŋu, tahindi? Alombi kwindi. Mudi wazaŋajalaŋa tahindi? Embaŋa kwindi nakusakilila.

¹⁴Omu mukachi kenu mudi wakata, tahindi? Atambiki awakulumpi achipompelu, amulombeli, amuwayishi manji mwijina daMwanta.

¹⁵Kulomba kwakukuhwelela kukuhandisha wakata, niMwanta wukumukolesha; neyi navulumuni akumwanakena.

¹⁶Itejenu mumunavulumuni, muntu ashimuni kudi mukwawu; dilombelenu muntu namukwawu kulonda mukoli. Kulembelela kwamuntu waloŋa kwekala naŋovu yakukoŋa nachu yuma yayivulu.

¹⁷Elija wadiŋi muntu watiyaloŋa mutwatiyaŋetu; walombeli nankashi nindi nvula yibuli kunoka; hiyanokeli hamaseki nyaka yisatu natukweji tutanu nakamuku.

¹⁸Walombeli cheŋi, niiwulu hidikunokesha nvula, nimaseki hiyakusoŋesha nyikabu yawu.

¹⁹Enu ana kwami, neyi mukachi kenu mudi muntu nasenuki munsaŋu yalala, mukwawu hakumubalumuna mumuchima,

²⁰owu muntu wukubalumuna mukwanshidi munjila yindi mwanasenukiyi, elulu nindi nahandishi muntu mukufwa, nabuti nyiloŋa yayivulu.