Read MUKANDA WANZAMBI 1 Pitrosi 1 Bible Online

1 Pitrosi 1 - MUKANDA WANZAMBI bible

1 Pitrosi 1

¹Ami Petulu kapostolu kaYesu Kristu nidi nakuyisonekela mukanda, enu atondewa munekali enyi, munaŋalaŋeni muPontu, nimuljalŋa, nimuKapadosiya, nimuAsiya, nimuBitiniya,

²mwaya kwiluka kwelukilaŋahu dehi Nzambi Tata, mukujila kwaSpiritu, kulonda kwovwahila nikusampula mashi aYesu Kristu. Luwi lwikali nanenu, nikuwunda kuyivulili.

³Amukiswili Nzambi yaMwanta wetu Yesu Kristu, yowu Tata yindi watuvweli chachiha tukwati kukuchiŋeja kwakúumi nakusaŋuka kwaYesu Kristu mudi afu, mwaya luwi lwindi lwasweja.

⁴Watuvweleli niwuswana wakatokaŋa wakadi kujilola, wabulaŋa kuŋamu ka, wanayiswekeluwu enu mwiwulu;

⁵enu anayihembi naŋovu yaNzambi nakukuhwelela, kulonda wamwinu wukukeŋa kumwekeshawu hanyaka yakukuminina.

⁶Mwomu twazaŋalelaŋa, hela katataka anayineŋeshi mpinji yantesha nakweseka kweŋi nakweŋi, neyi kwakuyikwasha nachu;

⁷kulonda kweseka kwesekaŋawu kukuhwelela kwenu, kwabadika kulema kwawuru wanoŋaŋa, hela awesekaŋa nakesi, akumoni nawu kwaleta kuhameka ni kulema nimpuhu hakamwekanayi Yesu Kristu.

⁸Yenowu munabuli kumona mwamukeŋa; hela katataka himwamumonaŋaku, chimwamukuhwelelaŋa mwazapalalaŋa namuzaŋalu waweni wakaŋanya kushimunewa, wukweti nilubanji lwakulema.

⁹Himukutambula chimwakuhweleleli wowu wamwinu wawumi wenu.

¹⁰Atuprofwetu aprofweteli nakuyitenena luwi, ehujolelumu nakukabila, nawu ashinshiki mwaya wamwinowu.

¹¹Akabilili nawu ashinshiki chuma hela mwaka wenyikiliyi Spiritu yaKristu wadiŋi mudi wena, chashimwinaŋayi dehi makabi aKristu ni kulema kukukeŋa kulondelamu.

¹²Ayilejeli nawu hiyadiŋi nakudikalakela awenawuku, adiŋi nakukalakelenu nsaŋu iyi yakuyilejawu katataka, kudi awa ayishimwinaŋa nsaŋu yayiwahi naSpiritu Wajila atemesheluwu chakufuma kwiwulu. Nsaŋu iyi aŋelu akeŋaŋa nawu abandami atalumu.

¹³Dichi dikwatishenu munyichima yenu, babalenu, chiŋejenu chalala luwi lwakayiletelawu hakamwekanayi Yesu Kristu.

¹⁴Neyi anyana ovwahilaŋa, bayi mulondeja mwaya kufwila kwakukulu kwakuyamba kwenuku;

¹⁵hakwila chelayi yena wayitambikili wajila, enu nawa ikalenu ajila mumwelilaŋa mwejima;

¹⁶muloŋa anasoneki nawu, Dŋilikenu mwikali ajila, muŋa ami najila.

¹⁷Dichi neyi mukumutambika nenu Tata, yena wasompeshaŋa antu ejima mwaya nyidimu yawu chakadi kwakama kumesu awu, komana shakamenu nyaka yenu yawenyi nawoma hohu;

¹⁸nakwiluka nenu, chayikúuliluwu kukwenda kwenu kwamukunkulwayi kumwatambwili kudi ankakulula jenu, hiyayikúulili nayuma yatokaŋaku, hela siliva nawuru,

¹⁹ayikúulili namashi alema, adi neyi amwana kamukoku wakadi hatamayi hela ihuji, wowu mashi aKristu.

²⁰Yena amwilukilaŋahu dehi chikuku champata yamunu mwishina chichidi kanda, ilaŋa anamumwekeshi kunsa yanyaka hansaŋu yenu.

²¹Mudi yena enu munakuhweleli Nzambi wamusapwili mudi afu, wamulemesheli; kulonda kukuhwelela kwenu nikuchiŋeja kwenu kwikali mudi Nzambi.

²²Keŋaŋanenu chakumuchima chacheni, muloŋa munatookeshi dehi nyichima yenu nakwovwahila nsaŋu yalala; kulonda mukeŋi anakwenu chakadi kudimbana.

²³Muloŋayivweli chachiha, bayi nambutu yatokaŋaku, chiŋa nambutu yabulaŋa kutoka, wowu mazu aNzambi ahandaŋa, ashakama haya nyaka.

²⁴Muloŋa antu ejima adi neyi matahu, nikuwahakwawu kwejima kudi neyi wuluya wamumatahu. Matahu omaŋa, niwuluya wahulukaŋa,

²⁵hakwinza mazu aYehova saŋa ashakaminawu haya nyaka. Wowu mazu ansaŋu yayiwahi ayishimwininuwu.