Read MUKANDA WANZAMBI 1 Pitrosi 2 Bible Online

1 Pitrosi 2 - MUKANDA WANZAMBI bible

1 Pitrosi 2

¹Dichi lekenu nkunyi yejima, nimakasu ejima, niwufwikŋi, niichima, nikuhosha kwatama kwejima.

²Fwilenu mayeli awuspiritu akadimakasu, neyi anyikeki anavwaliki katataka, kulonda mukuli nachu mushiki kuwamwinu;

³neyi munatompi Mwanta nenu muwahi.

⁴Mwenzaŋa kudi yena ilola dadumi, chalala adilekeli kudi antu, ilaŋa kudi Nzambi dakutonda, dalema.

⁵Enu nawa, hiyakuyituŋa mwikali itala dawuspiritu, neyi malola amomi, kulonda mwikali wupristu wajila, himulambu laŋa yimuna yakuketula yawuspiritu yakutiyisha nachu Nzambi kuwaha mudi Yesu Kristu.

⁶Muloŋaneli mumukanda nawu, Tiyenu hinukusha muZiyona ilola dakwiwombu dalema, datondewa, dalema wuseya; muntu wukumukuhwelela, hiyakumutiyisha nsonyuku.

⁷Dichi enu mwakuhwelelaŋa mwamumona kulema nankashi; hakwila antu ajikwa nawu, Ilola dalekeli antuŋi dabalumukili kwikala namutu wewombu;

⁸nawu, Ilola dakuhukana, nilwilola lwakudimbwisha. Muloŋa wena adimbukilaŋa kumazu nansaŋu yakujikwa kwawu; mwenomu dimu mwayifuukwililuwu.

⁹Hakwila enu mumuza watondewa, muwupristu wawanta, mumuchidi wajila, mumuza wambala waNzambi; kulonda mutiyakeshaŋa kashinshi kakeni kayena wayitambikili nindi mufumi mumwidima, mwiŋili muchejeji chindi chakuhayama.

¹⁰Enu hamwaka himwadiŋi muzaku, ilaŋa katataka mwela dehi muza wambala waNzambi; hiyayitiyilili luwuku, ilaŋa katataka ayitiyila dehi luwi.

¹¹Enu akwetu twwakeŋa a, nayilembeleli chimuneli enyi niakwakwenda mwambala, nami lekenu kufwila kwachisemwa chaheseki kwatama, kwalwishaŋa nawumi.

¹²Hela ajentili ayituŋalaŋa nawu mwelaŋa chatama, shakamenu chalumbuluka mukachi kawu; kulonda chakumonawu nyidimu yenu yayiwahi akamulemeshi Nzambi mwifuku dakumona kukala.

¹³Ovwahilenu mawanta ejima akubuzawu antu, hansaŋu yaMwanta Yesu; hela mwanta walukanu, Muloŋa diyi wabadika;

¹⁴hela anguvulu akutemeshawu kudi yena mwanta, nindi ababeshi akwakwila chatama, ahameki akwakwila chachiwahi.

¹⁵Muloŋa dichi chanakeŋiyi Nzambi, nindi mumweneshi kuyamba kwawantu akadi maana nakwila chachiwahi.

¹⁶Himudi anduŋuku; hakwila chimunabuli wuduŋu bayi chila chuma chakubuta nachu nkunyuku; shakamenu neyi anduŋu jaNzambi.

¹⁷Lemeshenu antu ejima. Keŋenu ana kwenu. Mutiyenu Nzambi woma. Lemeshenu mwanta wetuŋa.

¹⁸Enu aŋamba, ovwahilenu anyanta jenu nawoma hohu; bayi amawahi nawawunda hohuku, chiŋa niazuwa nawa.

¹⁹Neyi muntu wukwiteja kumona yihuŋu, nakukaba chakadi muloŋa, nanochu chadiyi kumesu aNzambi, dichi chachiwahi.

²⁰Neyi hakuyetelawu kuluwa mukudiwunjika hichikweti kuyihamekaku; hakwila neyi hakuyikabishilawu kuloŋa mukudiwunjika, chumichi chatiyishaŋa Nzambi kuwaha.

²¹Dichi chayitambikililuwu, muloŋa Kristu niyena wayimweneni yihunu, wayishiyilili chuma chakutalilahu, kulonda mwendi mumahaji indi.

²²Yena havulumwinuku; mukanwa kindi himwadiŋi makasuku.

²³Yena chanamutukiluwu, hafuntishili cheŋi matukaku; chamweniyi yihuŋu hazuwiluku, ilaŋa wadikunjikili kudi yena wasompeshaŋa chaloŋa.

²⁴Yena yomweni wasendeli nyiloŋa yetu mumujimba windi hamutondu, kulonda etu tunafwi dehi kunshidi tuhandili kuloŋa; anayikuswishi nanyinkakambu yindi yena.

²⁵Muloŋa mwapwapukilaŋa neyi anyikoku, ilaŋa katataka munafunti kudi Kabiŋa, Mukwakuhemba wumi wenu.