Read MUKANDA WANZAMBI 1 Pitrosi 3 Bible Online

1 Pitrosi 3 - MUKANDA WANZAMBI bible

1 Pitrosi 3

¹Mwomumu ninenu ambanda, shakamenu nakwovwahila anfumu jenwenu aweni; kulonda, hela amu anabuli kwovwahila mazu, akayikoki chakadi mazu, nanochu chakushakamawu aŋodi jawu;

²chaku monawu chimukushakama nawoma, chakubula kubajama.

³Bayi mudi wahisha chakumujimba nakuyindayinda nsuki, hela nakudikudeka yingelingeli yawuru, hela nakuvwalavwala mahinaku.

⁴Chiŋa mudiwahishi mumuchima wamuntu wamukachi, naspiritu yayovu yawunda yabulaŋa kutoka, dichi chalema nankashi kumesu aNzambi.

⁵Dimu mwadiwahishililuwu nawa ambanda ajila ahamwaka, amukuhweleleli Nzambi, ovwahilili anfumu jawu aweni;

⁶neyi chovwahililiyi Sara Abarahama, hakumutena nindi mwanta. Enu muneli anyanindi, neyi mukwila chachiwahi nákubula kutiya woma hela kufwa mutentu.

⁷Mwomumu ninenu amayala, shakamenu nawaŋodi jenu mwaya maana, nakulemesha mumbanda nenu diyi wakuminamu Ŋovu, nanochu chimunekali akwakuswanina luwi lwawumi hamu; kulonda mubuli kukaŋesha kulomba kwenu.

⁸Nkumininaku, toŋojokenu wejima wenu mwomumu, nakutiyila akwenu wushona, nakukeŋaŋana neyi chamwivumu denu, nakwikala nanyichima yaluwi, nayitoŋojoka yakudizoza.

⁹Bayi mutamisha mukwenu nanochu chanakutamishiyuku, hela kunamutuka nanochu chanakutukiyuku. Chinjila kwila mwenomu, chiŋa kukiswila nkisu; muloŋa anayitambikili kuswana nkisu.

¹⁰Muloŋa nasoneki nawu, Muntu wukukeŋa wumi nakumona mafuku amawahi, ahembi idimi dindi dibuli kuhosha yatama, ninyivumbu yindi yibuli kuhosha yamakasu;

¹¹aambuki kuyuma yatama, eli mwamuwahi; akeŋakeŋi kuwunda akuhaŋi chakuhaŋa.

¹²Muloŋa mesu aYehova atalaŋa antu aloŋa, nimatu indi atiyililaŋa chakulembelelawu; ilaŋa mesu aYehova adikaŋaŋa nawantu elaŋa chatama.

¹³Neyi mukukabila kwila mwamuwahi, ochu wukuyila chatama hinyi?

¹⁴Hakwila neyi mukumona yihuŋu hansaŋu yakuloŋa, munakooleki; bayi musha muchima hawoma wayitiyishaŋawuku, hela kuyakama;

¹⁵chiŋa mujiliki Kristu munyichima yenu nenu diyi Mwanta, mutweshi kwakula mafuku ejima antu ejima akuyihula nsaŋu yakuchiŋeja kumwachiŋejaŋa; nakudizoza nawoma.

¹⁶Ikalenu nachinleji chamuchima chachiwahi; kulonda, chakuyituŋulawu nakutena chatama kushakama kwenu kwakuwahi kwamudi Kristu, atiyi nsonyi.

¹⁷Muloŋa neyi muchima waNzambi wuneteji nindi mumoni yihuŋu nanochu chimwelaŋa chachiwahi, dichi chinabadiki kuwaha; bayi nanochu chimwelaŋa chatamaku.

¹⁸Muloŋa Kristu nawa wamweni ihuŋu hansaŋu yanyiloŋa, kamu hohu, waloŋa kukoola áheŋa, kulonda atushikiji kudi Nzambi. Amujahili mumujimba ilaŋa amuhandishili muspiritu,

¹⁹mwayililiyi nakushimuna kudi aspiritu amukaleya;

²⁰wenawa wowu ajikwili hamwaka, hadiwunjikiliyi Nzambi nakuchiŋilila mafuku aloŋeshelaŋayi Nowa watu, mwahandilili antu antesha, wowu atanu nasatu, kumeji.

²¹Wena meji owu hichifwikija chachipapatishu chayihandishaŋa; hichakufumisha nachu majilu amujimbaku, ilaŋa chakumwekesha nachu kudi Nzambi chinleji chamuchima chachiwahi, nakusanuka kwaYesu Kristu mudi afu.

²²Yena waya dehi mwiwulu, wekala kuchikasa chaNzambi chachidiilu; aŋelu niakwawanta niakwaŋovu anamwovwahishiluwu.