Read MUKANDA WANZAMBI 1 Pitrosi 4 Bible Online

1 Pitrosi 4 - MUKANDA WANZAMBI bible

1 Pitrosi 4

¹Ochu chamweniyi Kristu yihuŋu mumujimba, ninenu nawa diko leshenu nayitoŋojoka yoyimu; muloŋa muntu namoni yihuŋu mumu jimba naleki dehi nshidi;

²kulonda mafuku anashali mumujimba mubuli kushakama mwaya kufwila kwawantu kwatama, chiŋa mwaya muchima waNzambi.

³Muloga mafuku ahamwaka awanini nakukoŋa mwakeŋaŋawu aJentili, nakwenda nakubajama, nakufwila kwatama, nakusweja kunwa walwa, nakuhaŋana yisela, nakusweja kudya, nakwila yishimashima yakupesha akishi.

⁴Dichi wena anahayami chimwabulaŋa kuya nawu lufuchi mukubajama kwasweja; enda ayitena chatama.

⁵Wena amba kashimunamu kudi yena nashakamini kusompesha amomi niafu.

⁶Dihu hafumini kushimuna nsaŋu yayiwahi hela kudi afu, kulonda akayisompeshi chasompeshaŋawu antu mumujimba, akahandili Nzambi muspiritu.

⁷Ilaŋa yuma yejima keŋa yikumi; dichi wundishenu mumesu, babalenu kulonda mulombi;

⁸chasweja kulema yowu kukeŋaŋana chacheni mukachi kenu; Muloŋa kukeŋa kwabutaŋa nyiloŋa yayivulu.

⁹Ikalenu nakudyaŋana chakadi kutoba.

¹⁰Wejima wenu kalakelenu akwenu mwaya chamukunkulu chimunatambuli, neyi atulama amawahi aluwi lwaNzambi lweŋi nalwegi.

¹¹Muntu wukushimuna, ashimuni neyi Nzambi diyi wukuhosha; muntu wukukalakala, akalakali naŋovu yahanaŋayi Nzambi; kulonda muyuma yejima Nzambi alemi mudi Yesu Kristu, diyi wukweti kulema niwanta haya nyaka nanyaka. Amena.

¹²Enu akwetu twwakeŋa a, bayi muhayama chakuyesekawu nakesi kanenzi mukachi kenu nakuyikabisha, nenu kunatuwani chuma chacheŋuku.

¹³Chiŋa kuzaŋalala nanochu chimuneli akwakutambwila makabi chimu naKristu; kulonda hakamwekanayi mulubanji lwakulema kwindi, mwakazagalali namuzaŋalu wasweja nankashi.

¹⁴Neyi akuyisawula hansaŋu yejina daKristu, munakooleki; Muloŋa Spiritu yaNzambi wakulema wekala hadenu.

¹⁵Ilaŋa mukachi kenu bayi mwikala muntu wukumona yihugu nansaŋu yakwikala mbanji, hela ikombi, hela mukwakukoŋa chatama, hela kavubaku;

¹⁶Ilaŋa neyi wukumona yihuŋu nansaŋu yakwikala mukwaKristu, bayi atiya nsonyuku; amulemeshi Nzambi mwŋi inidi.

¹⁷Muloŋa mwaka washika dehi wakwila kusompesha hikukutachikila kwitala daNzambi. Dichi neyi chikusambila kudetu, indi awa ákubula kwovwahila nsaŋu yaNzambi yayiwahi akakumina hadihi?

¹⁸Neyi mukwakuloŋa wukuhanda chakukabakana hohu, indi muntu wakadi Nzambi, mukwanshidi, wakakumina hadihi?

¹⁹Dichi antu akumona yihuŋu mwaya muchima waNzambi elaŋa mwamuwahi, akunjiki wumi wawu kudi Nleŋi washinshika.