Read MUKANDA WANZAMBI 2 Pitrosi 1 Bible Online

2 Pitrosi 1 - MUKANDA WANZAMBI bible

2 Pitrosi 1

¹Ami Shimona Petulu, nduŋu nikapostolu kaYesu Kristu, nidi nakuyisonekela mukanda, enu munatambuli kukuhwelela kwalema wuseya, kwokumu naniku kutunatambuletu, mukulaŋa kwaNzambi yetu nikwaChamwinu Yesu Kristu.

²Luwi lwikali nanenu, nikuwunda kuyivulili mukwiluka kwakwiluka Nzambi niMwanta wetu Yesu.

³Ŋovu yawuNzambi windi yinatwinki yuma yejima yaya mumu nawumi nikwakama Nzambi, ichi chitunamwiluki yena watutambikili nakulema kwindi yomweni, nakashinshi kindi kakeni,

⁴kanatwinkiyi nachu yikaninu yindi yasweja kutoha, yikweti wuseya walema; kulonda mwikali akwakutambula chisemwa chakudi Nzambi nayikaninu oyu; nanochu chimunapuluki dehi kukutoka kwekala mumpata yamunu mwishina, kwafumaŋa kukufwila kwatama.

⁵Eŋa, dikwatishenu nankashi hansaŋu yeniyi; mukukuhwelela kwenu vulishilenumu kashinshi kakeni; mukashinshi vulishilenumu kwiluka;

⁶mukwiluka vulishilenumu kudi hemba; mukudihemba vulishilenumu kutatakena; mukutatakena vulishilenumu kwakama Nzambi;

⁷mukwakama Nzambi vulishilenumu kukeŋaŋana; mukukeŋaŋana vulishilenumu kukeŋa kwakweni.

⁸Dichi neyi yumiyi yikwikala mudenu nakuvulilamu, yikuyilekesha kwikala ankópi, hela akwákubula kusoŋa nyikabu, mushiki mukumwiluka Mwanta wetu Yesu Kristu.

⁹Muloŋa muntu wukubula yumiyi naputi mesu, wamonaŋa yakwakwihi hohu, navulameni dehi chamutookesheluwu nyiloŋa yindi yayikulu.

¹⁰Dichi enu ana kwetu, dikwatishenu nakukolesha kutambika kwayitambikiluwu, nikutonda kwayitondeluwu; muloŋa neyi mukwila yumiyi himwamba kadimbukaku.

¹¹Neyi mukwila mwenimu akayenzulwila muwiŋililu wakwijila chachiwahi muwanta wahaya nyaka, waMwanta wetu yowu Chamwinu Yesu Kristu.

¹²Dichi nakeŋi nami niyanukishi yumiyi mafuku ejima, hela mwayiluka, hela mwakola dehi munsaŋu yalala yimwekala nayu.

¹³Natoŋojoki nami chachiwahi kuyihizumwisha nakuyanukisha hinichidi mwitenti[1] idi;

¹⁴muloŋa neluki nami keŋa nifumi swayi mwitenti dami idi, mwomwanle jeliyi Mwanta wetu Yesu Kristu.

¹⁵Eŋa, nukudikwatisha, kulonda chinakafumahu mwakatweshi kwanuka yumiyi mafuku ejima.

¹⁶Chitwayilejeli Ŋovu nikwinza kwaMwanta wetu Yesu Kristu, hitwalondeli mwaya tuheka twakufuukula namaanaku; ilaŋa twadiŋi ayinsahu akumona wukeleŋi windi namesu.

¹⁷Muloŋa watambwili kudi Nzambi Tata mpuhu ni kulema, henjili kudi yena izu dafumini mulubanji lwakulema kwabadika, delili nindi, Diyi Mwanami nakeŋa, natiyaloŋa kuwaha nankashi mudi yena.

¹⁸Izu odu dafumini mwiwulu, twaditiyili etu aweni hitwadiŋi nindi hampidi yajila.

¹⁹Tukweti mazu awuprofwetu akola chakubadika; chachiwahi enu kushinshikamu neyi hiinoŋu datoŋekaŋa mumwidima nichikukucha, nichikusela ntanda munyichima yenu.

²⁰Sambilenu kwiluka nenu kwosi wuprofwetu wahamukanda wajila wukweti kuwulumbulula kwakanka wawuku.

²¹Muloŋa kwosi wuprofwetu wenzahu dehi chakufuma kumuchima wamuntuku; ilaŋa antu ahosheli chakufuma kudi Nzambi, chakuyihoshesha kudi Spiritu Wajila.