Read MUKANDA WANZAMBI 2 Pitrosi 2 Bible Online

2 Pitrosi 2 - MUKANDA WANZAMBI bible

2 Pitrosi 2

¹Ilaŋa mukachi kawantu mwanyamukili niatuprofwetu akutwamba, nimukachi kenu nawa mwakekala ankuluŋaŋa akutwamba, akaletelamu kwambula kwakukisaŋana kwitiya hambadi, hiyakudikala Mwanta wayilandili, nakudikokela kujilumuka kwaswayi.

²Amavulu akalonda muyuma yakubajama yelaŋawu; hansaŋu yawenowu akatena njila yansaŋu yalala chatama.

³Akadihetesha kudenu nalwisu, namazu akudimbana; kusompesha kwawu kwakufuma kumwaka hikukulabaku, nikujilumuka kwawu hikukuya namutuluku.

⁴Nzambi walekeli kwanakena aŋelu havulumwinuwu, hakuyumbila mukaluŋa kachinana nakuyisha mumena amwidima wabwi, kulonda kuyisweka akashiki kukusompesha.

⁵Walekeli kwanakena mpata yamunu mwishina yahashankulu, hakuhemba Nowa mukwakushimuna kuloŋa, nawakwawu atanu nayedi, haleteliyi dibaji mumpata yawantu asekeshelaŋa Nzambi.

⁶Wabalumwini nyikala yaSodoma naGomora hiyikwikala kwawuti hohu, hakuyihisha yijilumuki, nakuyilisha chuma chakutalilahu antu akusekesha Nzambi.

⁷Wapulwishili Loti muntu waloŋa, watiyilaŋa kubajama kwawantu atama kumuchima bwi.

⁸Muloŋa yena muntu waloŋa, chashakaminiyi mukachi kawu nakumona nikutiya, watiyilaŋa kutama nankashi kumuchima windi waloŋa hefuku hefuku, nanyidimu yakuluwalala yakoŋelaŋawu.

⁹Komana Yehova weluka kupulwisha akwakumwakama mukweseka, weluka kusweka abula kuloŋa mukubabesha, akashiki kwifuku dakusompesha;

¹⁰chikuswejela antu endaŋa mwaya chisemwa chaheseki, nakufwila yamajilu, nakudiwula wanta. Akola hamesu, akeŋa mwaya nyichima yawu, hiyazaalaŋa woma wakutena alema chatamaku;

¹¹kutoŋa aŋelu ayibadika kukola niŋovu, hiyayisompeshaŋa nakuyihosha chatama kumesu aYehovaku.

¹²Hakwila wena adi neyi anyama akadi maana, asemukila yowu kuyikwata nakuyijaha, atenaŋa yuma yabula kwilukawu chatama, akanoŋela mukunoŋa kwawu;

¹³hiyakutambula wufwetu wanyidimu yawu yatama. Atiyaloŋa kuwaha nakuluŋa namwa ana; himahuji namabeka, aluŋaŋa kumawijawu akukeŋaŋana, hadyaloŋawu nanenu.

¹⁴Akweti mesu asweja wuvumbi; abulaŋa kutwesha kuleka nshidi; akokolaŋa akwawu azeya munyichima; akweti nyichima yenjilila lwisu; hiyakwakushiŋewa.

¹⁵Anashiyi njila yaloŋa, anapwapuki, analondi njila yaBalami mwana kaBeyori, wakeŋa eli wufwetu wakuluwa;

¹⁶hiyakumukonkolola namuloŋa windi, chimbulu wakahoshaŋa nakuhosha nezu damuntu, hakulekesha kwandala kwaandeliyi yena kaprofwetu.

¹⁷Hituseloki twakadi meji, himbundu yalelokaŋa nampepela yaŋovu; wena diwu anaswekeluwu mwidima wamukaluŋa wiyila bwi.

¹⁸Muloŋa chahoshaŋawu mazu akuhemesha akudisamba, hiyakukoka antu nakufwila kwatama kwachisemwa chaheseki nikubajama; antu anakeŋi kupuluka mudi awa ashakama mukuluwaŋesha.

¹⁹Ayikanaŋa nawu mukufuma muwuduŋu, kutoŋa awenawu hiyanduŋu jakutoka muloŋa neyi muntu anamwimiki mushindu kudi mukwawu, neli dehi nduŋu yanowu namwimiki mushindu.

²⁰Muloŋa antu anapuluki dehi kumajilu ampata yamunu mwishina, nanochu chanamwilukuwu Mwanta, yowu Chamwinu Yesu Kristu, neyi akuyikasamu cheŋi ayimika mushindu, kukuminina kwawu kukubadika kutama hadiŋuwu hakusambila.

²¹Neyi abulili kwiluka njila yakuloŋa mutenowu dihu; Ilaŋa chatama chakwila wena ayiluka dehi, hela, kwamuntu wumuku hiyakufuntamu nakushiya kuleja kwajila kwayilejeluwu.

²²Aneli mwaya chishimu ichi chalala chakwila nawu, Kawa nafuntili cheŋi masanjilindi, Yishi nimukaji waŋulu anawe.