Read MUKANDA WANZAMBI 2 Pitrosi 3 Bible Online

2 Pitrosi 3 - MUKANDA WANZAMBI bible

2 Pitrosi 3

¹Enu akwetu twakeŋa a, iwu himukanda wamuchiyedi wunidi nakuyisonekela. Munyikanda yejima yiyedi nalondi kuhizumwisha nachunyichima yenu yalala nakuyanukisha;

²kulonda mwanuki mazu ahosheluwu dehi atuprofwetu ajila, nikuleja kwaMwanta yowu Chamwinu, kwahosheliyi mudi apostolu jenu.

³Sambilenu kwiluka nenu hamafuku akukuminina kwakenza akwakuseha nakuseha, nakwila mwaya kufwila kwawu aweni kwatama;

⁴nawu, Indi kwinza kwindi kwakaniniyi kwokudihi? Muloŋa chochakaminuwu ankakulula tulu, yuma yejima chochiyekala, neyi chiyadiŋi hatachi haleŋeluwu yuma.

⁵Muloŋa kwonti kwawu kwanuka nawu mawulu adiŋi kwoku chachikulu, niiseki datuŋilewi nameji mukachi kameji, nezu daNzambi.

⁶Mpata yamunu mwishina yadiŋuku yajiminini mumeji, yanoŋeli nezu odu;

⁷hakwinza mawulu niiseki aduku katataka, anayiswekeli kesi nezu dodimu, anayiswekeli ifuku dakusompesha nikujilumuka kwawantu asekeshaŋa Nzambi.

⁸Hakwila enu akwetu twakeŋa a, bayi muvulamena ichichuma chimuku, Yehova wamonaŋa ifuku dimu didi neyi ikombakaji danyaka, niikombakaji danyaka didi neyi ifuku dimu.

⁹Mwanta halabaŋa kwila chuma chakaniniyi, neyi chatenaŋawu antu kulabaku, ilaŋa hakudiwunjika nenu, hanakeŋi muntu niwumu kunoŋaku, nakeŋi antu ejima abalumuki munyichima.

¹⁰Ilaŋa ifuku daYehova dakenza neyi chenzaŋa ikombi; denodu ifuku mawulu akahita nalushindu lwalweni, niyuma yejima yakasuŋunuka neyena dakesi, niiseki niyuma yidumu yakasukuma bwi.

¹¹Ochu chineli yumiyi yejima yakasuŋunuka chochichi, shakamenu nakujila nakwakama Nzambi,

¹²nakutalila nakukeŋa nankashi chakenza ifuku daNzambi dakasuŋunuka mawulu hakabutukawu kesi, dakasuŋunuka yuma yejima neyena dakesi.

¹³Hakwila etu twatalilaŋa mawulu amaha niiseki dadiha, mwakekala kuloŋa neyi chakaniniyi.

¹⁴Dichi enu akwetu twakeŋa a, chimwatalilaŋa yumiyi, dikwatishenu kulonda akayiwani munashakami chachiwahi zo-o, chakadi ihuji, nákubula hakuyinkela Muloŋa kumesu indi.

¹⁵Toŋojokenu nenu chakubula yi Mwanta kuzuwa swayi hiwamwinu; mwomwayisonekeleliyi nimana kwetu Pawulu twakeŋa a, nama ana amwinkeluwu.

¹⁶Watenaŋa yumiyi munyikanda yindi yejima; mudi niyuma yi kwawu yakala kwiluka, yenoyu antu akadi maana nikukola ayiheŋeshaŋi, neyi chaheŋeshaŋawu nyikanda yajila yi kwawu, hiyakudikisaŋana awenawu.

¹⁷Dichi enu akwetu twakeŋa i, chimuneli mweluka dehi, babalenu mubuli kuhuŋumuka nakuluwaŋesha kwawantu atama, mubuli kufuma mukukola kwenwenu aweni.

¹⁸Kulenu muluwi nimukumwiluka Mwanta wetu Chamwinu Yesu Kristu. Kulema kwikali kwindi nikatataka nihaya nyaka. Amena.