Read MUKANDA WANZAMBI 1 Joani 2 Bible Online

1 Joani 2 - MUKANDA WANZAMBI bible

1 Joani 2

¹Enu anyanami anyanya, yuma yinukuyisonekela nalondi mubuli kuvulumuna. Neyi kudi muntu navulumuni, tukweti ihaku kwaTata, yowu Yesu Kristu waloŋa.

²Yena diyi ifutu danyiloŋa yetu; hinyiloŋa yetwetu hohuku, niyawantu ampata yamunu mwishina ejima.

³Neyi twahembaŋa mwatulejeliyi, kweniku diku kutukwilukila netu twamwiluka yena.

⁴Yowu wukwila nindi namwiluka, ilaŋa kuhemba mwatulejeliyi nehi, hintwambi, ninsaŋu yalala hiyekala mudi yenaku.

⁵Hakwinza muntu wahembaŋa mazu indi, chalala nikukeŋa kwaNzambi kunawanini chikupu mudi yena. Kweniku diku kutukwilukila netu twekala mudi yena.

⁶Muntu wukwila nindi nashakama mudi yena, endaŋ neyi chendeliyi yena.

⁷Enu akwetu twakeŋa, hinukuyisonekela lushimbi lwalwihaku, lwolwalukulu lumwadiŋi nalu kufumisha kutachi; lushimbi lwalukulu wowu mazu imwatiyili.

⁸Cheŋi nawa, hinukuyisonekela lushimbi lwalwiha, lwela dehi lwalala nimudi yena nimudetu, Muloŋa mwidima keŋa wuhiti, chejeji chalala chinatoŋeki dehi.

⁹Yowu wukwila nindi nidi muchejeji, iku wudi nakuhela mana kwindi, wuchidi mumwidima nihanu.

¹⁰Muntu wakeŋa a mana kwindi washakama muchejeji, hakweti chakuhukeshaku;

¹¹hakwinza muntu wahela mana kwindi wekala mumwidima, wendaŋ mumwidima, helukaŋ kwakuyayuku, Muloŋa mwidima wunamuputishi mesu.

¹²Enu anyanami anyanya, nidi nakuyisonekela nanichi chanayanakenuwu nyiloŋ yenu nejina dindi.

¹³Enu atata jawantu, nidi nakuyisonekela nanichi chimwamwiluka yena wekala kwoku kufumisha kutachi. Enu anyikwenzi, nidi nakuyisonekela nanichi chimunamwimiki dehi mukwakutama mushindu. Enu anyana anyanya, nayisonekeli nanichi chimwamwiluka Tata.

¹⁴Enu atata jawantu, nayisonekeli nanichi chimwamwiluka yena wekala kwoku kufumisha kutachi. Enu anyikwenzi, nayisonekeli nanichi chimukweti Ŋovu, nimazu aNzambi ashakama mudenu, nichimunamwimiki owu watama mushindu.

¹⁵Bayi mukeŋa mpata yamunu mwishina, hela yuma yamunu mwishinaku. Neyi muntu wukukeŋa mpata yamunu mwishina, kukeŋa kwaTata hikwekala mudi yenaku.

¹⁶Muloŋa yuma yampata yamunu mwishina yejima, kufwila kwachisemwa chaheseki, nikufwila kwamesu, nikudisamba kwamukunkulwayi kwawumi wunu, hiyakudi Tataku, yamumpata yamunu mwishina.

¹⁷Mpata yamunu mwishina yikuhita, nikufwila kwayu kwatama, hakwinza muntu welaŋa muchima waNzambi washakamaŋa haya nyaka.

¹⁸Enu anyana anyanya, mpinji yakukuminina yinashi ki dehi, yimwatiyili nawu mukwankunyi naKristu wukwinza; katataka kunamwekani dehi akwankunyi naKristu amavulu, dihu hitunelukili netu mpinji yakukuminina yinashi ki dehi.

¹⁹Afumini mukachi ketu, ilaŋa hiyadiŋi ayetuku; neyi adiŋi ayetu mutenowu tudi nawu nihanu; ilaŋa chafuminuwu, chinalondi kuyimwekesha nawu wejima wawu hiyadiŋi ayetuku.

²⁰Hakwila enu awayishawu dehi kudi Wajila, mweluka dehi yuma yejima.

²¹Hinayisonekeli nami munabuli kwiluka nsaŋu yalalaku, Muloŋa munayiluki nenu kunsaŋu yalala hikwekala kutwambaku.

²²Ntwambi hinyi? Yowu wadikalaŋa nindi Yesu hidiyi Kristuku. Yenowu wadikalaŋa nindi hikwekala Tata naMwanaku, diyi mukwankunyi naKristu.

²³Muntu wadikalaŋa Mwana hakweti Tataku; yowu wetejaŋa Mwana diyi wukweti niTata nawa.

²⁴Hakwinza enu aweni, ochu chimwatiyili kufumisha kutachi chishakami mudenu. Neyi ochu chimwatiyili kufumisha kutachi chikushakama mudenu, enu nawa mukushakama mudi Mwana nimudi Tata.

²⁵Chenichi dichi chikaninu chatukaniniyi, yowu wumi wahaya nyaka.

²⁶Yumiyi nayisonekeli hansaŋu yawena akukeŋa kuyilumbula.

²⁷Kuwaya kwayiwayishiluwu kudi yena kwekala mudenu; himunabuli wakuyilejaku. Chela kuwaya kwayiwayishiluwu kudi yena kwayilejaŋa mwaya yuma yejima, kwalala, hik watwambaŋaku, shakamenu mudi yena mwomwayilejeli kuwaya.

²⁸Dichi dinu, enu anyanami anyanya, shakamenu mudi yena, kulonda chakamwekanayi twakabuli kutiya woma ninsonyi kumesu indi hakenzayi.

²⁹Neyi muneluki nenu yena waloŋa, mukwiluka antu ejima elaŋa yaloŋa nenu anavwaliki kudi yena.