Read MUKANDA WANZAMBI 1 Joani 3 Bible Online

1 Joani 3 - MUKANDA WANZAMBI bible

1 Joani 3

¹Tiyenu kukeŋa kwanatukeŋiyi Tata kwakutwiteja kututena nawuanyana kaNzambi; dichi chitwekala chi! Chabulaŋa kutwilukawu kudi antu ampata yamunu mwishina, chinafumi habulili kumwilukawu yena.

²Enu akwetu twakeŋa a, hohanu tudi anyana kaNzambi; chitwakekala kanda chimwekanuku, ilaŋa tuneluki netu chakamwekanayi twakafwana neyi yena, nanochu chitwakamumona chekalayi.

³Ejima akweti kuchiŋejoku chakumuchiŋeja yena, aditookeshaŋa neyi chatookayi yena.

⁴Ejima avulumunaŋa hiyakuputola, muloŋa kuvulumuna yowu kuputola.

⁵Muneluki chamumwekesheluwu yena, amumwekesheli kulonda afumishi nyiloŋa; mudi yena himwekala nshiduku.

⁶Muntu washakamaŋa mudi yena havulumunaŋaku; muntu wavulumunaŋa hanamumonuku, hela kumwiluka hanamwilukuku.

⁷Enu anyanami anyanya, bayi mwiteja kuyiluwaŋesha kudi muntuku; muntu welaŋa yaloŋa waloŋa, chochaloŋayi yomweni.

⁸Muntu wavulumunaŋa wakudi diyabolu kwindi; muloŋa diyabolu wavulumunaŋa ho-o kufumisha kutachi. Dichi chamumwekesheleluwu Mwana kaNzambi, kulonda akisaŋani nyidimu yadiyabolu.

⁹Muntu wavwalika kudi Nzambi havulumunaŋaku, muloŋa mudi yena mwekala chisemwa chakudi Nzambi; dichi hatweshaŋa kuvulumunaŋaku, muloŋa wavwalika kudi Nzambi.

¹⁰Kweniku diku kwamwekenaŋa anyana kaNzambi nianyana kadiyabolu; muntu wabulaŋa kwila yaloŋa, hela wabulaŋa kukeŋa mana kwindi, hiwakudi Nzambuku.

¹¹Diyi nsaŋu yimwatiyili kufumisha kutachi, nawu tukeŋaŋani.

¹²Tubuli kwikala neyi Kena wadiŋi wanowu watama, wajahili mana kwindi. Wamujahililidi? muloŋa nyidimu yindi yadiŋi yatama, yamana kwindi yaloŋa.

¹³Enu ana kwami, neyi akuyihela kudi antu amunu mwishina bayi muhayamaku.

¹⁴Tuneluki netu tunafumi mukufwa tunepili muwumi, nanochu chitwakeŋa aŋa ana kwetu. Muntu wabulaŋa kukeŋa washakamaŋa mukufwa.

¹⁵Muntu wahelaŋa mana kwindi himbanji; muneluki dehi mudi mbanji himwashakamaŋa wumi wahaya nyakaku.

¹⁶Chatutuliliyi wumi windi, diku kutunelukili kukeŋa; chachiwahi ninetu kutulila ana kwetu wumi wetu.

¹⁷Muntu wukweti yuma yampata yamunu mwishina, wukumona mana kwindi nayibuli, hakumúumina muchima windi mwivumu, kukeŋa kwaNzambi kukutwesha kushakama mudi yena ŋahi?

¹⁸Enu anyanami anyanya, bayi tukeŋa akwetu chamukanwa, hela chamukuhosha hohuku; chiŋa tuyikeŋi chalala nakwila mutwahoshaŋa.

¹⁹Kweniku diku kutukwilukila netu tudi akwansaŋu yalala, diku kutukudikoleshela munyichima yetu kumesu indi mwejima mukututanyishila nyichima yetu;

²⁰Muloŋa Nzambi wabadika nyichima yetu, weluka yuma yejima.

²¹Enu akwetu twakeŋa, neyi nyichima yetu yikubula kututanyisha, hitukwikala nawoma kumesu aNzambuku;

²²niyejima yitukulomba tukuyitambula kudi yena, Muloŋa twelaŋa mwatulejeliyi, twelaŋa yuma yamutiyishaŋa kuwaha.

²³Lushimbi lwindi nindi, twitiyi ijina daMwanindi Yesu Kristu, tukeŋaŋani neyi chatulejeliyi.

²⁴Antu elaŋa mwatulejeliyi, diwu ashakamaŋa mudi yena, niyena mudi wena. Kwiluka netu yena washakamaŋa mudetu, tuneluki naSpiritu atwinkeliyi.