Read MUKANDA WANZAMBI 1 Joani 4 Bible Online

1 Joani 4 - MUKANDA WANZAMBI bible

1 Joani 4

¹Enu akwetu twakeŋa a, bayi mwitejaŋi aspiritu ejimaku, chiŋa kuyi-tompa mwiluki neyi akudi Nzambi; Muloŋa tuprofwetu akutwamba amavulu anayi nakutambatamba mukachi kawantu.

²Spiritu yaNzambi mukumwilukila hayumiyi; aspiritu ejima etejaŋi nawu Yesu Kristu wenjili mumujimba, diwu akudi Nzambi;

³niaspiritu ejima abulaŋa kwiteja Yesu, hiyakudi Nzambuku, akudi mukwankunyi naKristu imwatiyili nawu wukwinza, nochu katataka nekali dehi mumpata yamunu mwishina.

⁴Enu anyanami anyanya, muyantu ambala aNzambi, munayimiki mushindu; Muloŋa owu wudi mudenu wabadika iwu wudi mumpata yamunu mwishina.

⁵Wena hiyakwampata yamunu mwishina kwawu, dichi chahoshelaŋawu yamunu mwishina, niantu amunu mwishina ayitiyaŋi.

⁶Etu tuyantu ambala aNzambi; muntu weluka Nzambi watutiyaloŋa, wabula kwikala waNzambi hatutiyaŋiku. Kweniku diku kutunelukili nispiritu yansaŋu yalala, nispiritu yakuluwaŋesha.

⁷Enu akwetu twakeŋa a, tukeŋaŋnenu; Muloŋa kukeŋa kwambala kwaNzambi. Ejima akeŋaŋa avwalika kudi Nzambi, aneluki Nzambi.

⁸Muntu wabula kukeŋa hanamwiluki Nzambuku, Muloŋa Nzambi diyi kukeŋa.

⁹Kukeŋi kwatukeŋayi Nzambi kwamwekeni hatemesheliyi Nzambi Mwanindi wumu hohu mumpata yamunu mwishina, kulonda tuhandili mudi yena.

¹⁰Kweniku diku kukeŋa; hiyetu twakeŋa eli Nzambuku, yena diyi watukeŋeletu, hakutemesha Mwanindi ekali ifutu danyiloŋa yetu.

¹¹Enu akwetu twakeŋa i, chatukeŋeluwu kudi Nzambi chochochu, ninetu twadi kukeŋaŋana nawa.

¹²Hikwekala muntu wamonahu dehi Nzambuku; neyi twakeŋa aŋanaŋa, Nzambi washakama mudetu, nikukeŋa kwindi kunawanini chikupu mudetu.

¹³Kwiluka netu twashakama mudi yena niyena washakama mudetu hohanatwinkiyi yaSpiritu yindi.

¹⁴Etu tunamoni, hitukushimuna wunsahu, netu Tata watemesheli Mwana ekali Chamwinu chawantu ampata yamunu mwishina.

¹⁵Muntu wukwiteja nindi Yesu hiMwana kaNzambi, Nzambi washakama mudi yena, niyena washakama mudi Nzambi.

¹⁶Etu tuneluki, tunetiyi kukeŋa kwaNzambi kwanatukeŋiyi. Nzambi diyi kukeŋa; muntu washakamaŋa mukukeŋa washakamaŋa mudi Nzambi, niNzambi washakamaŋa mudi yena.

¹⁷Diku kunawanini kukeŋa mudetu chikupu, kulonda tubuli woma mwifuku dakusompesha; Muloŋa chadiyi yena, dichi chitudi ninetu munu mwishina.

¹⁸Mukukeŋa himwekala womaku; kukeŋa kwalala chikupu kwafumishaŋa woma, Muloŋa woma wababeshaŋa. Muntu watiyaloŋa woma hanashiki mukukeŋa chalala chikupuku.

¹⁹Etu twamukeŋa yena nanochu chásambililiyi yena kutukeŋetu.

²⁰Muntu wukwila nindi, Ami nakeŋa Nzambi; iku saŋi ahelelayi mana kwindi, hintwambi; Muloŋa muntu wukubula kukeŋa mana kwindi anamoniyi, hakutwesha kukeŋa Nzambi anabuli kumonayuku.

²¹Lushimbi lwindi lwanatulejiyi, natuleji nindi muntu wakeŋa a Nzambi akeŋi nimana kwindi nawa.