Read MUKANDA WANZAMBI 1 Joani 5 Bible Online

1 Joani 5 - MUKANDA WANZAMBI bible

1 Joani 5

¹Muntu wetiyaŋ nindi Yesu diyi Kristu, wavwalika kudi Nzambi; muntu wakeŋa a nvwali wakeŋa a ninowu wavwalika kudi yena.

²Kukeŋa Nzambi nakwila mwatulejaŋyi, diku kutukwilukila netu twakeŋa anyana kaNzambi.

³Kumukeŋa Nzambi yowu kwila mwatulejaŋayi; mwatule jaŋayi himwakalaku.

⁴Wavwalika kudi Nzambi wemikaŋa mpata yamunu mwishina mushindu; mushindu wunafwomoni mpata yamunu mwishina yowu kukuhwelela kwetu.

⁵Wemikaŋa mpata yamunu mwishina mushindu hinyi? Yowu wetiyaloŋa nindi Yesu diyi Mwana kaNzambi.

⁶Wenjili nameji namashi diyi Yesu Kristu; henjili nameji hohuku, wenjili nameji namashi.

⁷Spiritu diyi washimunaŋa wunsahu, muloŋa Spiritu diyi walala.

⁸Kudi ayinsahu asatu, iwu Spiritu, iwu meji, iwu mashi; mwasatu wawu atiyaloŋanaŋa mwomumu.

⁹Chitwetejaŋa wunsahu wawantu, wunsahu waNzambi wabadika; wunsahu waNzambi woweniwu wanashimuniyi Mwanindi.

¹⁰Muntu nakuhweleli Mwana kaNzambi wukweti wunsahu mumuchima windi; muntu nabuli kwitiya Nzambi, namutwambishi; muloŋa nabuli kwitiya wunsahu waNzambi wanateniyi Mwanindi.

¹¹Wunsahu diwu weniwu wakwila nawu Nzambi watwinkeli wumi wahaya nyaka, niwena wumi iwu wekala mudi Mwanindi.

¹²Muntu wukweti Mwana wukweti wumi iwu; wabula Mwana kaNzambi, hakweti wumi iwuku.

¹³Nayisonekeli yumiyi kulonda mwiluki nenu mukweti wumi wahaya nyaka, enu mwakuhwelelaŋa ijina daMwana kaNzambi.

¹⁴Dichi chitukubula kumutiya woma, tukwiluka netu neyi tukulomba chuma chamwaya muchima windi, wukututiya.

¹⁵Neyi tuneluki netu watutiyaloŋa namutukulomba mwejima, tuneluki netu tunatambuli dehi yitunamulombi.

¹⁶Neyi muntu wukumona mana kwindi navulumuni muloŋa wakadi kushikŋa nikukufwa, alombi; Nzambi wukumwinka wumi wawenowu anavulumuni chakadi kushikŋa nikukufwa. Kudi nshidi yashikaŋa nikukufwa, hidiyi yinateni nami ayilombeliyuku.

¹⁷Kuheŋa kwejima hinshidi; kudi nshidi yakadi kushika nikukufwa.

¹⁸Tuneluki netu muntu wavwalika kudi Nzambi havulumunaŋaku; muntu wavwalika kudi Nzambi wadihembaŋa, owu watama hakumukunkaku.

¹⁹Tuneluki netu tuyantu aNzambi; mpata yamunu mwishina yashakamaŋa mudi owu watama.

²⁰Tuneluki netu Mwana kaNzambi nenzi, natwinki dehi kashinshi kakumwiluka yena walala; ninetu tudi mudi yena walala, mwomudi Mwanindi Yesu Kristu. Yeniwu diyi Nzambi walala, niwumi wahaya nyaka.

²¹Enu anyanami anyanya, dihembenu kunsaŋu jawakishi.