Read MUKANDA WANZAMBI Baatuli 11 Bible Online

Baatuli 11 - MUKANDA WANZAMBI bible

Baatuli 11

¹Yefwata, muntu wamuGileyadi, wadiŋi chilobu mukwaŋovu, wadiŋi mwana kachivumbi. Gileyadi yowu wamuvweli Yefwata.

²Iŋoda Gileyadi wamuvweleleli anyana amayala; chakuliluwu anyanakapodindi, amuhaŋili Yefwata, nawu, Eyi kuswana mwitala datata yetu nehi, muloŋa eyi wumwana kamumbanda wacheŋi.

³Dichi Yefwatawate mukili ana kwindi, washakamini mwituŋa daToba; kwenoku amayala akuhemesha apompeli kudi Yefwata, hiyakukimbukaŋa nindi.

⁴Chimwahitili nyaka yantesha, anyana kaAmoni hiyakulwa nawaIsarela.

⁵Anyana kaAmoni chalwiluwu nawaIsarela, awakulumpi amuGileyadi hiyakuyana kumuleta Yefwata mwituŋa daToba.

⁶Amwilili Yefwata, nawu, Twaya wikali mukulumpi wetu, kulonda twakalwi nawanyana kaAmoni.

⁷Yefwata wayiiili awakulumpi amuGileyadi, nindi, Enu hiyenu mwanheleluku, hiyenu mwanhapili mwitala datata yamuku? Ndochu munamoni dehi kukala mukwinjiladi kudami?

⁸Akulumpi amuGileyadi amwilili Yefwata, nawu, Dichi chitukufunta cheŋi kudeyi, kulonda twakayi neyi, twakalwinawanyana kaAmoni, eyi yeyi wakekala mwanta wetwetu ejima twashakama muGileyadi.

⁹Yefwata wayilili awakulumpi amuGileyadi nindi, Neyi mukunfuntisha cheŋi kumukala wetu kulonda nakalwi nawanyana kaAmoni, neyi Yehova wakanyinkawu, ami nakekala mwanta wenu?

¹⁰Akulumpi amuGileyadi amwilili Yefwata, nawu, Yehova diyi wukwi kala chinsahu chetu; chalala mwejima muwukuhosha eyi, dimu tukwila.

¹¹Yefwata hakuya hamu nawakulumpi amuGileyadi amwilili nawu, Yeyi mwanta wetu, yeyi mukulumpi wetu. Yefwata wahosheli mazu indi ejima kumesu aYehova kuMizipa.

¹²Yefwata watemesheli antemesha kudi mwanta wawanyana kaAmoni, nindi, Indi eyi wukweti nsaŋwinyi nanami mwaka winzi kudami nakunletelanjita mwituŋa dami?

¹³Mwanta wawanyana kaAmoni wayakwili antemeshaja Yefwata, nindi, Muloŋa Isarela antambwili ituŋa dami hafuminuwu muEjipitu, kufumisha kuArinoni nakushika kuYaboki nikuYodana. Dichidinu kanfuntishili chakadi ndombu.

¹⁴Yefwata watemesheli cheŋi antemesha kudi mwanta wawanyana kaAmoni,

¹⁵wamwilili nindi, Tiya chanahoshiyi Yefwata, nindi, AIsarela hidiwu ayitambwili ituŋa daMowabi hela ituŋa dawanyana kaAmonuku.

¹⁶Chafuminuwu aIsarela muEjipitu, ahitili mwisaŋa nakuya kuKaluŋalwiji Kachinana, ashikili nikuKadeshi;

¹⁷aIsarela hohenohu atemesheli antemesha kudi mwanta wakuEdomi nawu, Nleki, mwani, nihiti mwituŋa deyi. Hakwila mwanta wakuEdomi kwitiyanehi. Choche nochu nawa atemesheli nikudi mwanta wakuMowabi; niyena kwonti kwindi; aIsarela ashakamini muKadeshi.

¹⁸Ahitili mwisaŋa, akulishili ituŋa daEdomi niituŋa daMowabi, ahitili nikumbadi yetuŋa daMowabi yamusela, atuŋili chilombu kwishinadi daArinoni, hiyamotokeli muŋinza yaMowabuku, muloŋa muArinoni dimu muŋinza yaMowabi.

¹⁹AIsarela atemesheli antemesha kudi Sihoni mwanta wawaAmori, mwanta wakuHeshiboni; aIsarela amwilili nawu, Tuleki mwani, tuhitimwituŋa deyi, tuyi kumpata yetu.

²⁰Sihoni welili nindi, aIsarela akundimba, hayi itiyili kuhita muŋinza yinduku. Sihoni hakupompesha antu indi ejima, hakutuŋa nichilombu muYahaza, hakulwa nawaIsarela.

²¹Yehova Nzambi yaIsarela waheni Sihoni niantu indi ejima kudi aIsarela, ayitapanikuyitapa; aIsarela atambula niituŋa dejima dawaAmori adiŋi ashakama mwituŋodu.

²²Atambwili ŋinza yejima yawaAmori kufumisha kuArinoni kushikŋa nikuYaboki, kufumisha kwisaŋa anamutuukishi kuYodana.

²³Ichidinu Yehova Nzambi yaIsarela natemuni dehi aAmori kumesu awantu indi aIsarela, eyi wuyitambuli ituŋa dawu?

²⁴Hiwukutambula ituŋa dakukwinkayi mukishi weyi Kemoshi, nindi tambulakuku? Ninetu tukutambula ituŋa danawa akututemwinawu kudi Yehova Nzambi yetu.

²⁵Ochu eyiwumubadiki Balaki mwana kaZipori, mwanta wakuMowabi hela hanti? Yena aIsarela wazuŋiluhu nawu? Hela kulwa walwiluhu nawu?

²⁶Mwashakamininuwu aIsarela muHeshiboni nimunyikala yawu, nimuArowenai nimunyikala yawu, nimunyikala yamumukulishu waArinoni yejima, nyakama kulakaji asatu, mwalekelelidi kuyitambula cheŋi kunyakoyu?

²⁷Ami kwami hinakuvulumunuku; eyiyeyi wukuŋilami chatama china chiwukulwa nanami. Yemweni Yehova, diyi Nsompeshi, lelu asompeshi mukachi kawanyana kaIsarela nawanyana kaAmoni.

²⁸Ilaŋa mwanta wawanyana kaAmoni hatiyililili mazu amutemesheleliyi Yefwataku.

²⁹Spiritu yaYehova enza nikwinza hadi Yefwata, yohita nimuGileyadi nimuManase, yohita nimuMizipa wakuGileyadi, yofuma kuMizipa wakuGileyadi yohita nikwadiŋuwu anyana kaAmoni.

³⁰Yefwata hakudishiila mukumesu aYehova, nindi, Neyi chalala wukunyinka anyana kaAmoni,

³¹ninami, chinakenza cheŋi kudi anyana kaAmoni kunukuya, kwamwena dehi, chochuma chakedika muyisu yami nakunkinkilila chakela chambala chaYehova, nakachilambula hihimulambu wakushita.

³²Nochu Yefwatawahitili nakuya kwadiŋuwu anyana kaAmoni, akalwi nawu; Yehova wamwinkeluwu.

³³Yofumisha nikuArowenai nichiwukushika kuMinitina kuyitapa hohu, nyikala makumi ayedi kwaamu, nikukachana kekalakumatempa anyivinyu, kuketwila dakujilumuna. Nochu anyana kaAmoni ayifwomokeleli anyana kaIsarela.

³⁴Yefwata wafuntili kwitala dindi kuMizipa nindi atali, mwanindi wamumbanda iwu wukwidika nakumukinkilila iwu, nandimba nakuhaŋana; wadiŋi mwanindi wumu hohu, hadiŋi namwanindi mukwawu helaweyala hela wamumbandaku.

³⁵Chamumweniyi, watabwili mahinindi, nindi, Yayo, eyi mwanami! Wunambayishi dehi kweyi, wunekali dehi mukwakunkabisha, muloŋa Yehova namwasamina dehi mukanwa kami, hinukutwesha kubalumuna mwokuku.

³⁶Yena wamwilili nindi, Eyi tatayami, wunamwasamini Yehova mukanwa keyi, ŋili mwejima munafumi mukanwa keyi, nanochu chanakutendiyi Yehova hadi ayilumbu jeyi, wowuanyana kaAmoni.

³⁷Wamwilili tata yindi nindi, Aŋili chumichi; anlekikwami tukweji tuyedi niyi nakwendola hamapidi nakudila wujiki wami, ninami niakwetu.

³⁸Wamwilili nindi, Yaŋa. Wamutemesheli nindi yaŋa atukweji ayedi. Nochu wayili niyena ni akwawu nakudila wujiki windihamapidi.

³⁹Cheliluwu atukweji ayedi anamani dehi, hakufunta kuditata yindi, hakumwila mwomwadishiililiyi; hadilukili kwindi neyalaku.

⁴⁰Chelili chila muIsarela, anyana awambanda aIsarela hiyakuya hamwakaha mwaka nakumudila mwana kaYefwata wakuGileyadi mafuku awanahamwaka.