Read MUKANDA WANZAMBI Baatuli 21 Bible Online

Baatuli 21 - MUKANDA WANZAMBI bible

Baatuli 21

¹Dichi dinu henohu amayala awaIsarela asambila dehi kusanyika kuMizipa, nawu, Etu kwetu hosi wakanona mwanindi wamumbandanaku mwinkayi mukwaBenjamini asumbuluku.

²Nochu antu ayili kuBeteli, kwenoku ashakamini kumesu aNzambi shakame-e nikumelela, adilili nankashi makumbu aweni akudila.

³Nawu, Eyi Yehova Nzambi yaIsarela, muloŋanyi tunamoni chenichi munu mumpata yaIsarela? Lelu muchidiwumu wamunu muIsarela hikwosi!

⁴Chikwachili antu anyamukili budidi, atuŋili kameŋa kwenoku, alambwili nyilambu yakushita ninyilambu yakuwunda.

⁵Anyana kaIsarela elili nawu, Indi hanyichidi yaIsarela yejima wabulili kwinza nachipompelu kudi Yehova hinyi? Muloŋa henohu asanyika dehi kusanyika kwakweni, nakutena yenowu wakabula kwinza kuMizipa kudi Yehova, nawu akamujaha hohu chalala.

⁶Dichi anyana kaIsarela, atiyili kutama hansaŋu yamana kwawu Benjamini, nawu, Lelukudi Isarela muchidi wumu wunaketukuku ngwa!

⁷Awa anashali tukuyikeŋela kudihi ambanda? Nanochu chitunasanyiki Yehova netuhitukuyinka anyanetu asumbuluku.

⁸Nawu, Indi muchidi waIsarela wumu wudihi wabulili kwinza kuMizipa kudi Yehova? Nawu ashinshiki, komana kwosi muntu wakumukala waYabeshiGileyadi wayili kuchilombu kuchipompeluku.

⁹Muloŋa hachindiluwu antu kutala enimukala waYabeshi Gileyadi hosi.

¹⁰Dichi chipompelu chatemesheluku amayala makombakaji ikumi nayedi wowu asweja wulobu, ayilili nawu, Yenu katapenu enimukala waYabeshi Gileyadi nampokuyakabali, niambanda nianyana anyanya.

¹¹Tiyenu chimwakela. Mwakajilu munaji-i ni amayala ejima niambanda ejima akamahu dehi namayala.

¹²Wena aweni hadi enimukala waYabeshi Gileyadi ayaŋadima awajiki makulakaji awana abulili kudilukahu dehi nawamayala nakukama nawu. Ayitweli kuchilombu kuShilo mwomwituŋa daKenani.

¹³Chipompelu chejima chatemesheli nakuhosha nawanyana kaBenjamini adiŋi mwilola dakuRimoni, nakuyibidika nawu tunavumbiki dehi ikala.

¹⁴NiaBenjamini enjili cheŋi henohu, ayinka nikuyinka ana ambanda abulili kuja hawu hadi ambanda akuYabeshi Gileyadi. Hela chochu hiyawanininuku.

¹⁵Antu atiya nikutama hansaŋu yaBenjamini muloŋa Yehova wabuzili hakachi kanyichidi yaIsarela.

¹⁶Akulumpi achipompelu elili nawu, Indi awa anashali tukuyikeŋela kudihi ambanda? Nanochu chajilawu dehi to-o ambanda awaBenjamini.

¹⁷Nawu, Ana anapuluki awaBenjamini chiŋa kumwekana wuswana wawukulonda muchidi wumu wubuli kujiya munu muIsarela.

¹⁸Hakwinza etuhitukutwesha kuyinka anyanetu asumbuluku. Muloŋa henohu anyana kaIsarela anasanyiki dehi nawu, Yowu wakamwinkahu Benjamini mumbanda wakusumbula tunamushiŋi tu-u!

¹⁹Nawu, Hamwaka hamwaka kudichawija chaYehova kuShilo, wekala mbadi yaBeteli yakukabeta kakuchimunswa, hambadi yamusela yamukwakwa wukufuma kuBeteli nakuya kuShekemi, hambadi yakukabeta kakuchidiilu yaLebona.

²⁰Ayilejeli anyana kaBenjamini nawu, Yenu mwakabatamini mumatempa anyivinyu.

²¹Chimwakamona ambanda amuShilo hiyakuya nakuhaŋana, ninenumwakediki munyivinyu, mwakadikwatili aŋodi jenu, iwu windi, iwu windi, hadi ambanda amuShilo, himwakaya nikwituŋa daBenjamini.

²²Neyi twakamona atata jawu, indi kwiji ana kwawu hiyakwinza kudetu nakutuzuwila, twakayila netu, Twanakenenuwu tuhu; muloŋa kunjita hitwayi kwatila aŋodi jawuku. Ochu enu yenu munayinkuwu wanyi; neyi dichi mwela mwakeŋa a kumona tuhu muloŋa.

²³Anyana kaBenjamini dimu mweliluwu, adikwatilili aŋodi jawu, wowena ahaŋeni, adikwatilili awanina ni-ndo mwomwadiŋuwu wejima wawu, asenda nikusenda. Hiyakuya, afunta cheŋi nikuwuswana wawu. Atuŋa ninyikala, ashakamamu nikushakamamu.

²⁴Henahana anyana kaIsarela adimwaŋili kwawu nakuya iwu kumuchidi windi, iwu kuchisaka chindi. Wejima wawu ayili, iwu kuwuswana windi, iwu kuwuswana windi.

²⁵Mafuku ana mumpata yaIsarela himwadiŋi mwanta walukanuku. Antu ejima elilaŋa mwamwenuwu kuwaha awenawu kunyichima yawu.