Read MUKANDA WANZAMBI 2 Joani 1 Bible Online

2 Joani 1 - MUKANDA WANZAMBI bible

2 Joani 1

¹Ami mukulumpi nidi nakusoneka mukanda weyeyi mama watondewa, nawanyaneyi inakeŋa mwalala; hiyami hohuku, niantu ejima eluka nsaŋu yalala;

²hansaŋu yalala yashakamaŋa mudetu, yakekala nanetu haya nyaka.

³Luwi, nikwanakena, nikuwunda kwikali nanetu, kwakufuma kudi Nzambi Tata, nikudi Yesu Kristu Mwana kaTata, munsaŋu yalala nimukukeŋa.

⁴Nazaŋalali nankashi chinamoni anyaneyi amakwawu hiyakwenda mwaya nsaŋu yalala, mwomwatulejeluwu kudi Tata.

⁵Ichi dinu eyi mama, nakulembeleli nami tukeŋaŋanenu; hichidi neyi nidi nakukusonekela lushimbi lwalwihaku, lwolwatulejeluwu dehi kufumisha kutachi.

⁶Kukeŋa yowu kwenda mwatulejaŋayi mwejima. Lwenilu dilu lushimbi lumwatiyili kufumisha kutachi nindi mwendumu.

⁷Muloŋakwakudimbana amavulu anayi nakutambatamba mukachi kawantu, alekaŋa kwiteja nawu Yesu Kristu wenjili mumujimba. Diyi mukwakudimbana, diyi mukwankunyi naKristu.

⁸Babalenu mubuli kujimbesha yuma yitwaŋeli, kulonda mwakatambuli wufwetu washikamu chikupu.

⁹Muntu wamotokaŋa nákubula kushakama mwatulejeliyi Kristu, hakweti Nzambuku; muntu washakama mwatulejeliyi, diyi wukweti niTata ni mwana.

¹⁰Neyi kudenu kukwinza muntu wukubula kuyileja mwenimu, bayi mumutambula mwitala, hela kumwimwishaku.

¹¹Muntu wukumwimwisha natiyaloŋani dehi nindi munyidimu yindi yatama.

¹²Ni kweti yuma yayivulu yakuyisonekela, ilaŋa hinakeŋi kuyisoneka hachipapilu nawulombuku; nakuhweleli nami nakenza kudenu twakahanjiki nenu mesu namesu, kulonda muzaŋalu wetu wakawanini chikupu.

¹³Anyana kamana kweyi wamumbanda watondewa anakwimwishi.