Read MUKANDA WANZAMBI Sinulo 10 Bible Online

Sinulo 10 - MUKANDA WANZAMBI bible

Sinulo 10

¹Hinukumona kaŋelu waŋovu mukwawu hakusuluka kwiwulu, navwali ivu, nikasuluŋunda kadi kunamutu windi; kumesu indi kudi neyi itaŋwa; ninyendu yindi yidi neyi yishimi yakesi.

²Muchikasa chindi mudi kamukanda kanyanya kakubakula dehi. Hakusha mwendu windi wachidiilu hakaluŋalwiji, mwendu windi wachimunswa heseki.

³Hakubidika nezu datiyakana neyi chabulumaŋa mutupa. Chanabidikiyi yivumina yitanu nayiyedi yivuma nikuvuma.

⁴Chiyinavumi yivumina yitanu nayiyedi, hinukwila nami nisoneki, hinukutiya izu kwiwulu hidikwila nindi, Lamikaku yuma yinahoshi yivuminoyu yitanu nayiyedi nayilamiki, bayi wuyisonekaku.

⁵Kaŋelu namweni nakwimana hakaluŋalwiji niheseki, hakwolola chikasa chindi chachidiilu kwiwulu.

⁶Hakusanyika wahandaŋa haya nyaka nanyaka, waleŋeli iwulu niyuma yekalamu, niiseki niyuma yekalamu, nikaluŋalwiji niyuma yekalamu, nindi hiyakalaba nawaku.

⁷Ilaŋa mumafuku ezu dakaŋelu wamu chitanu nachiyedi hakakeŋa kwimbilayi, dihu hakamana Nsaŋu yaNzambi yakujinda, mwashimwiniyi nsaŋu yayiwahi kudi ambuŋindi atuprofwetu.

⁸Izu odu dinatiyili kwiwulu hinukuditiya cheŋi, hidikuhosha nanami nindi, Yaku wutambuli mukanda wakubakula wudi muchikasa chakaŋelu nemani hakaluŋalwiji niheseki.

⁹Hinukuya kudi kaŋelu, hinukumwila nami, Anyinki kamukandaka. Yena hakuŋila nindi, Tambulaku wukidyi kejima; kakululisha mwivumu deyi ilaŋa mukanwa keyi kakutowala neyi wuchi.

¹⁰Hinukutambula kamukandoku kuchikasa chakaŋelu, hinukukidya kejima. Mukanwa kami himukutowala neyi wuchi; chinadyi to, mwivumu mulula nikulula.

¹¹Hiyakuŋila nawu, chiŋa wakaprofwetelaŋa cheŋi antu amavulu ninyuza yayivulu niakwamadimi amavulu nianyanta ankanu amavulu.