Read MUKANDA WANZAMBI Sinulo 11 Bible Online

Sinulo 11 - MUKANDA WANZAMBI bible

Sinulo 11

¹Hiyakunyinka iteti didi neyi mbwechi, nawu, Nyamukaku wupimitembeli yaNzambi nikameŋa niantu akwijila mu nakudifukula.

²Wushiyi chipaŋu chekala hanzi hatembeli, wuchilekeli hanzi nawa; bayi wuchipimaku, muloŋa anachihani chambala chawajentili. Ŋanda yajila akayidatola tukweji makumi awana natuyedi.

³Ayinsahu ami ayedi nakayiteja kuprofweta ikombakaji damafuku namakulakaji ayedi namakumi atanu nekumi dimu, iku saŋa avwela yikeleyi hohu.

⁴Wenawa diwu nyiolive yiyedi, diwu nawa manoŋu ayedi emanaŋa kumesu aMwanta weseki.

⁵Neyi muntu wakakeŋa kuyikatisha, mukanwa kawu mwakedika kesi kakadya ayilumbu jawu; muntu wakakeŋa kuyikatisha dimu mwakamujahilawu.

⁶Wenawa akweti Ŋovu yakujika iwulu, kulonda kukaŋesha nvula kunoka mukuhitila mafuku akuprofwetawu. Akweti niŋovu hameji amavulu kulonda kuyibalumuna ekali mashi, kulonda kweta iseki nayipupu yejima mwakukeŋelawu mwejima.

⁷Chakamanishawu wunsahu wawu, owu kanyama wakafuma mwikela, waka asa nawu njita, wakayimika mushindu, wakayijaha.

⁸Nyijimba yawu yafwa dehi yakashala mumukwakwa waŋandoyu yeneni yatenaŋawu muspiritu nawu, Sodoma naEjipitu, kwapopeleluwu Mwanta wawu kukulusu.

⁹Antu akumatuŋa, niakunyichidi, niakumadimi, niakunyuza, akatala nyijimba yawu yafwa dehi mafuku asatu nefuku dachiketu, kuyijiika mwijamu kwonti kwawu.

¹⁰Antu ashakama heseki akazaŋalala nansaŋu yawu, akasehaseha, akaditemeshela temeshela yamukunkulu, nanochu chadiŋi nakukabishawu antu ashakama heseki kudi wena atuprofwetu ayedi.

¹¹Kulondela hamafuku owu asatu nachiketu muuya wakudi Nzambi hiwukwijila mudi wena, hiyakwimana zululu; woma waweni wuyiholokela niwena adiŋi nakuyitala.

¹²Hiyakutiya izu datiyakana kwiwulu nindi, Kandamenu mwinzi kunu. Hiyakuya mwiwulu mwivu, iku adi nakuyitala kudi ayilumbu jawu.

¹³Hampinji oyu hikukukanka mutentanshi weneni, nichibalu chaŋanda chamwikumi chihumuka nikuhumuka. Mumutentanshi owu himukufwa antu makombakaji atanu namakombakaji ayedi. Akwawu asheluhu atiya niwoma, alemesha niNzambi wamwiwulu.

¹⁴Ihuŋu damu chiyedi dinahiti. Tiyenu, ihuŋu damu chisatu hidikwinza swayi.

¹⁵Kaŋelu wamu chitanu nachiyedi hakwimba, hikukulondela mazu akutiyakana mwiwulu nawu, Wanta wampata yamunu mwishina wunekali dehi wanta waMwanta wetu, niwaKristu windi; wakayula haya nyaka nanyaka.

¹⁶Owu awakulumpi makumi ayedi nawana ashakama kumesu aNzambi hamatandawu awanta, hiyakudinata chamesu hamaseki, hiyakudifukula kudi Nzambi,

¹⁷nawu, Tunakusakilili, eyi Yehova Nzambi, yeyi Watwesha yejima, wekala kwoku, wadiŋi kwoku, muloŋa wunatambuli Ŋovu jeyi jeneni hiwukuyula.

¹⁸Nyuza yazuwili, kuzuwa kweyi kwenjili; mwaka wunashiki dehi wakusompesha afu, nikufweta ambuŋeyi atuprofwetu niakwakujila niaakamaŋa ijina deyi, anyanya niamaneni; wowu mwaka wakujilumuna akukisaŋana iseki.

¹⁹Hiyakwenzulula kutembeli yaNzambi yekala mwiwulu; mutembeli yindi mumwekana nichimbaŋu chachitiyaŋenu chindi; mulondela ninzaji, nimazu, niyivumina, nimutentanshi, ninvula yeneni yamalola.