Read MUKANDA WANZAMBI Sinulo 14 Bible Online

Sinulo 14 - MUKANDA WANZAMBI bible

Sinulo 14

¹Nami nitali, hinukumona Kana kamukoku nemani hampidi yaZiyona, wudi nankulakaji yamakombakaji namakombakaji makumi awana nawana, fakweti ijina dindi niijina daTata yindi akusoneka liamahamawu.

²Hinukutiya izu kwiwulu, didi neyi kuvuma kwameji amavulu, didi neyi kuvuma kwachivumina chasweja. Izu odu dinatiyili dadiŋi neyi dawakwakwimba tudada twawu.

³Hiyakwimbila kaimina kakaha kumesu etanda ni kumesu awamomi awana niawawakulumpi. Hi kwadiŋi muntu watwesheli kudiza kaminokuku, chiŋa wowu nkulakaji yamakombakaji namakombakaji makumi awana nawana anakúuluwu mudi antu ahamaseki.

⁴Diwu abulili kudijilola nawambanda, muloŋa hiyajiki. Diwu alondaŋa Kana kamukoku kwayaloŋayi kwejima. Diwu akúuliluwu mukachi kawantu ekali nyikabu yaNzambi niyaKana kamukoku yatachi.

⁵Mukanwa kawu himwadiŋi makasuku, hiyakweti hataminawuku.

⁶Hinukumona kaŋelu mukwawu hakutúuka hakachi kaluzwizu, nasendi Nsaŋu yayiwahi yahaya nyaka, ashimuni kudi antu ejima ashakama heseki, ninyuza yejima, ninyichidi yejima, niakwamadimi ejima, niamumatuŋa ejima.

⁷Hakwila nezu datiyakana nindi, Akamenu Nzambi mumulemeshi; muloŋa mpinji yakusompeshayi yinashi ki dehi; difukulenu kudi waleŋeh niiwulu nimaseki nikaluŋalwiji nituseloki twameji.

⁸Himukulondela kaŋelu mukwawu, wamuchiyedi, nindi, Babiloni muneni nahumoki, nahumoki! Owu wanwishilaŋa nyuza yejima vinya yandombu yawuvumbi windi.

⁹Himukulondela nikaŋelu mukwawu, wamuchisatu, hakwila nezu datiyakana nindi, Muntu wukudifukula kudi owu kanyama nikumukishi windi, hakwiteja kumufunda hehama dindi hela hachikasa chindi,

¹⁰yena nawa wakanwa vinyu yandombu yaNzambi yemawu delii, yanahuŋununuwu mulupasa lwakuzuwa kwindi chakadi kufumpula. Akamumwesha yihuŋu nakesi ni kesi kaNzambi, iku aŋelu ajila adi nakutala, niKana kamukoku wudi nakutala nawa.

¹¹Wishi wayihuŋu yawu hiwukukakumuka haya nyaka nanyaka. Awa akadifukula kudi owu kanyama nikumukishi windi nakutambula mufunda wejina dindi, hiyakamona kunooka hela mwaana hela wufukuku.

¹²Kweniku diku kudi kutatakena kwawakwakujila, ahembaŋa mwayilejaŋawu kudi Nzambi nikukuhwelela kwamukuhwelelawu Yesu.

¹³Hinukutiya izu kwiwulu nindi, Sonekaku neyi, Kufumisha kulelu afu akufwa mudi Mwanta anakooleki. Spiritu nindi, Mwamweni, kulonda akanooki; kukabakana kwawu kunamani dehi, nyidimu yawu yakayilondela.

¹⁴Nami nitali, hinukumona ivu ditooka. Hevu odu hashakama wiunu wudi neyi mwana kamuntu; kunamutu windi kudi chibaaba chawuru, kuchikasa chindi kudi chikwakwa chatwa.

¹⁵Kaŋelu mukwawu hakwidika mutembeli nakubidika nezu datiyakana; hakubidika owu washakama hevu nindi, Shaku chikwakwa cheyi wumuni; muloŋa mpinji yakumuna yinashi ki dehi; muloŋa yuma yaheseki yakumunawu yasweja dehi kuha.

¹⁶Wáshakama hevu hakuzwiyazwiya chikwakwa chindi heseki; amuna niiseki.

¹⁷Kaŋelu mukwawu nawa hakwidika mutembeli yekala mwiwulu, niyena nawa wudi nachikwakwa chatwa.

¹⁸Kaŋelu mukwawu nawa hakufuma kukameŋa, wukweti Ŋovu nakesi; hakutambika owu wukweti chikwakwa chatwa nezu datiyakana nindi, Shaku chikwakwa cheyi chatwa, wukuŋuli nyikanji yamawundu amuvinyu waheseki; muloŋa mawundu awu asweja dehi kuha.

¹⁹Kaŋelu hakuzwiyazwiya chikwakwa chindi omu mwishina, hakukuŋula mawundu amuvinyu waheseki, hakunatila muwukamwinu, wowu wukamwinu weneni wandombu yaNzambi.

²⁰Wukamwinu wavinyu hiyakuwudatila kunsembwa yaloŋanda; muwukamwinu himukufuma mashi ashika nikuyikuŋu yakwendesha nachu atuwalu, kuleha neyi makilometa makulakaji asatu namakumi ayedi.