Read MUKANDA WANZAMBI Sinulo 16 Bible Online

Sinulo 16 - MUKANDA WANZAMBI bible

Sinulo 16

¹Hinukutiya mutembeli izu datiyakana, hidikuyila owu aŋelu atanu nayedi nindi, Yenu musukwili hamaseki yeŋa yitanu nayiyedi yandombu yaNzambi.

²Wamuchimu hakuya, hakusukwila cheŋa chindi hamaseki. Antu adiŋi namufunda wakanyama, adifukwili kumukishi windi, hihakuyiholokela maboŋola anunka asweja kukata.

³Wamuchiyedi hakusukwila cheŋa chindi mukaluŋalwiji. Himukwila mashi neyi amufu, niyuma yejima yadiŋi mukaluŋalwiji yikweti wumi, hiyikufwa.

⁴Wamuchisatu hakusukwila cheŋa chindi namutuloŋa ninamutuseloki twameji amavulu, mwila nimashi.

⁵Hinukutiya kaŋelu kameji amavulu hakwila nindi, Eyi Waloŋa, eyi wekala kwoku, wadiŋi kwoku, eyi Wajila nanichi chiwunasompeshi mwenimu.

⁶Niwena nawa amwaŋili mashi awakwakujila nawatuprofwetu, nineyi nawa wunayinwishi mashi; chinayiteleli.

⁷Hinukutiya kameŋa hakwila nindi, Mwamweni, eyi Yehova Nzambi, Watwesha yejima, kusompa kweyi kuwasompeshaŋa kwalumbuluka kwaloŋa.

⁸Wamuchiwana hakusukwila cheŋa chindi hetaŋwa. Hiyakudinka Ŋovu yakubaba antu nakesi.

⁹Antu hiyakubabika neyena dasweja; hiyakutuka ijina daNzambi wukweti wanta wayipupu oyu. Kwonti kwawu kubalumuka munyichima amulemeshi yena.

¹⁰Wamu chitanu hakusukwila cheŋa chindi hetanda dakanyama dawanta. Muwanta windi mwiyila nibwi; hiyakutafunya madimi awu nayikatu yawu.

¹¹Hiyakutuka Nzambi wamwiwulu nayikatu yawu namaboŋolawu. Saŋa alekelawu kubalumuka munyichima aleki nimwelaŋawu.

¹²Wamu chitanu nachimu hakusukwila cheŋa chindi hakaloŋa keneni Yufurati. Meji indi oma nichau, kulonda kuloŋeshaŋahu dehi njila yakahitilawu anyanta ankanu akafuma kwatuntukilaŋa itaŋwa.

¹³Hinukumona mukanwa kachaza ŋombi, nimukanwa kakanyama, nimukanwa kakaprofwetu wakutwamba, himukwidika ademoni azonda asatu adi neyi yúula.

¹⁴Muloŋa wenowu hiyakishi awademoni, enda akoŋa yinjikijilu; enda aya kudi anyanta ankanu ampata yamunu mwishina yejima, kulonda akayipompeshi kunjita yefuku odu deneni daNzambi Watwesha yejima.

¹⁵Talenu, nakenza neyi chenzaŋa ikombi! Muntu wukutona, wukuhemba mahinindi, kulonda abuli kwenda nzekesi antu abuli kumona nsonyi yindi, nakooleki.

¹⁶Hiyakuyipompeshela kumu kwanatenuwu muHeberu nawu Amaŋedoni.

¹⁷Wamu chitanu nachiyedi hakusukwila cheŋa chindi haluzwizu. Mutembeli himukufuma izu datiyakana, dikufuma kwitanda dawanta nindi, Chinamani.

¹⁸Kwila ninzaji nimazu niyivumina. Hikukukanka mutentanshi weneni wakadi kumonaŋahu dehi mwashakaminawu antu hanu heseki. Kanda kukankaŋahu dehi mutentanshi wasweja wudi ochuku!

¹⁹Oyu ŋanda yeneni ayibalula nihasatu; niŋanda janyuza hijikuhumoka; niBabiloni muneni amwanuka nikudi Nzambi, kulonda amwinki lupasa lwavinyu lwakulendumuka kwandombu yindi.

²⁰Yitutu yejima yitemoka nikutemoka; mpidi jamaneni kumwekana nawa nehi.

²¹Ninvula yamalola amaneni, ilola dimu deseka nantalenta yimu, hiyikufuma mwiwulu hiyikunoka hadi antu. Antu hiyakunamutuka Nzambi nachipupu chanvula yamalola, muloŋa chipupu ochu chabadika nankashi kutoha.