Read MUKANDA WANZAMBI Sinulo 17 Bible Online

Sinulo 17 - MUKANDA WANZAMBI bible

Sinulo 17

¹Hikukwinza kaŋelu wumu wahadi aŋelu atanu nayedi, akweti yeŋa yakunama yitanu nayiyedi, hakuhosha nanami nindi, Inzaŋa kunu nikuleji chakusompeshawu owu chivumbi muneni, washakama hameji amavulu.

²Anyanta ankanu aheseki aneli nindi wuvumbi, ashakama heseki anasheti vinyu yawuvumbi windi.

³Hakunsenda mudi Spiritu, hakuntwala mwisaŋa. Hinukumona mumbanda nashakami hakanyama kachinana, kenzala majina akutuka Nzambi ho-o, kakweti nyitu yitanu nayiyedi ninseŋu ikumi.

⁴Mumbanda navwali mahina awusombu niachinana, wadileŋaleŋa nawuru natumalola twalema wuseya, nimperola. Kuchikasa chindi kudi lupasa lwawuru lwenzala yishimashima, yoyuma yawuzondu yawuvumbi windi.

⁵Hehama dindi ha nawu, Nsaŋu yakujinda, Babiloni muneni, mama yawayivumbi niyayishi mashima yaheseki.

⁶Hinukumona mumbanda nasheti dehi mashi awakwakujila, nimashi awayinsahu akukoola Yesu. Chinamumoni nihayama nikuhayama nankashi.

⁷Kaŋelu hakuŋila nindi, Wunahayaminidi? Tiya nikuleji nsaŋu yakujinda yamumbanda, niyakanyama kanamweleki kadi nanyitu yitanu nayiyedi ninseŋu ikumi.

⁸Aka kanyama wunamoni kadiŋuku, katataka kwosi, keŋa katupuki mwikela, keŋa kayi nakukisika. Antu ashakama heseki, anabuli kusonekawu majinawu mumukanda wawumi wasonekeluwu dehi kufumisha haaliluwu chikuku champata yamunu mwishina, akahayama chakamonawu kanyama kadiŋuku, katataka kwosi, hikakwinza.

⁹Mwenimu mudi yitoŋojoka yama ana. Oyu nyitu yitanu nayiyedi himpidi jitanu najiyedi hashakamaŋayi mumbanda.

¹⁰Hiyanyanta ankanu nawa atanu nayedi; atanu anaholoki dehi, wumu wekala kwoku, mukwawu kanda enzi; chakenzayi wakashakama kapinji kanti.

¹¹Owu kanyama kadiŋuku, katataka kwosi, yomwenindi diyi mwanta wamu chitanu nachisatu nawa, hiwumu wahadi akwawu atanu nayedi; hakuya nakukisika.

¹²Oju nseŋu ikumi ŋawunamoni hiyanyanta ankanu ikumi, achidi kanda atambuli wanta; ilaŋa akatambula wanta neyi anyanta ankanu, hamu nakanyama, mpinji yimu.

¹³Wenawa akweti muchima wawu wumu wakumwinka kanyama Ŋovu yawu niwanta wawu.

¹⁴Wenawa akaasa njita naKana kamukoku; Kana kamukoku wakayimika mushindu, muloŋa diyi Mukulumpi wawakulumpi, diyi Mwanta wawanyanta; ninawa adiyi nawu atambikewa, atondewa, ashinshika.

¹⁵Hakuŋila nindi, Meji amavulu iwamona hashakamaŋayi chivumbi, hiyantu amumatuŋa, himazaza, hinyuza, hiyakwamadimi.

¹⁶Ninoju nseŋu ikumi jiwamona, ninaka kanyama, akamuhela chivumbi, akamubalumuna kwikala chihembi hohu, akamuleka nzekesi, akadya mujimba windi, akamushita nakesi bwi.

¹⁷Muloŋa Nzambi nashi munyichima yawu jakwila mwafuukulayi, kulonda atiyaloŋani amwinki kanyama wanta wawu, ndo nichakalumbuluka mazu aNzambi.

¹⁸Mumbanda wamona hiŋanda yeneni yayulaŋa anyanta ankanu aheseki.