Read MUKANDA WANZAMBI Sinulo 18 Bible Online

Sinulo 18 - MUKANDA WANZAMBI bible

Sinulo 18

¹Chiyakumini yumiyi hinukumona kaŋelu mukwawu hakusuluka mwiwulu, wudi nawanta waweni, niiseki hidikutamuka nalubanji lwakulema kwindi.

²Hakubidika nezu datiyakana nankashi nindi, Babiloni muneni nahumoki, nahumoki! Nabalumuki dehi kwikala muwushakaminu wawademoni, mwakudikaŋila ademoni azonda ejima, mwakudikaŋila nawa atujila azonda ejima atiyaloŋawu antu kutama.

³Muloŋa chananwuwu vinyu yandombu yawuvumbi windi, nyuza yejima yinaholoki. Anyanta ankanu elili nindi wuvumbi, niakwakulandulula ahanu heseki aheteli kuyuma yadiluŋishilaŋayi nachu.

⁴Hinukutiya izu di kwawu kwiwulu nindi, Enu antu ami, fumenu muŋandoyu, mubuli kutiyaloŋana nanyiloŋa yindi, mubuli kutambula nindi yipupu.

⁵Muloŋa nyiloŋa yindi yinatiyakani mwiwulu; Nzambi na anuki dehi mwaluwilaŋayi.

⁶Mwinkenu mwomwenkeleliyi akwawu, mushilenuku muyedi mwomwesekela nyidimu yindi; mulupasa mwafuŋililiyi akwawu mufuŋilenumu kayedi nawa.

⁷Mwejima mwadilemeshelaŋayi, nimwadiluŋishilaŋayi, mufuŋilumu nikumukatisha nikuneŋa; nanochu chelaŋayi mumuchima windi nindi, Ami nashakami nimwanta wamumbanda kwami, hininfwila kwamuku, hinamba kamona kuneŋaku.

⁸Dichi chakenjila yipupu yindi mwifuku dodimu, ni kufwa, nikuneŋa, ninzala; akamushita nakesi bwi, muloŋa Yehova Nzambi wukumusompesha himukwaŋovu.

⁹Anyanta ankanu aheseki aneli nindi wuvumbi, anadiluŋishi nindi, akadila makumbu nikutumpa naNsaŋu yindi, chakamonawu wishi wakesi kakumwochawu.

¹⁰Akemena hahalehi nawoma wayikatu yindi. Akela nawu, O yihuŋu! O yihuŋu! Eyi Babiloni, ŋanda yeneni, ŋanda yakola! Kusompesha kweyi kunakuwani dehi mumpinji yimu hohu.

¹¹Akwakulandisha aheseki hiyakumudila makumbu nikumuneŋela chikupu, muloŋa kwosi nawa wakulanda cheŋi yuma yawuku.

¹²Yuma yawuru, nisiliva, nitumalola twalema wuseya, nimperola; nimahina amawahi atooka niawusombu niashikima niachinana; ninyitondu yanunka chachiwahi yejima, niyuma yakutuŋa nambiŋa yanjamba yejima, niyuma yakutuŋa nanyitondu yalema wuseya yejima, niwuneŋu, niyikuŋu, nimalola amawahi;

¹³nisinamoni niyuma yanunka chachiwahi, niinsensi, nimalasha, nilibona, nivinyu, nimanji, niwuŋa walembuluka, nitidiku, ni aŋombi, nianyikoku, niatuwalu namakálu, nianduŋu, nimawumi awantu.

¹⁴Yuma yiwafwilili mumuchima weyi yinakufumi dehi, yuma yatowala yejima, niyuma yakuvwala yalema, yinakukisikili dehi, antu hiyamba kayimona nawa cheŋi nihantuku.

¹⁵Akwakulandisha nakulandulula yumiyi, aheteleli kudi yena, akemena hahalehi nawoma wayikatu yindi, nakudila makumbu nakuneŋa,

¹⁶nakwila nawu, O yihuŋu! O yihuŋu! ŋanda yeneni wavweli mahina amawahi atooka niawusombu niachinana. Wadileŋaleŋeli yuma yawuru nitumalola twalema wuseya, nimperola!

¹⁷Muloŋa mumpinji yimu hohu maheta asweja chi kuma hochu anakisiki dehi ji-i. Niakwakuyula maatu niantu ejima akwendelamu kwejima kwakukeŋa kuyawu, niakwakwendesha maatu, niantu ejima ahandilaŋa nyidimu yahakaluŋalwiji,

¹⁸hiyakwimena hahalehi nakukaloka nyiteti, chakumonawu wishi wakesi kakumwochawu, nawu, ŋandanyi yidi neyi ŋandiyi yeneni?

¹⁹Hiyakudisukwila lunkuŋu hanyitu yawu, hiyakukaloka nyiteti nikudila makumbu, nikuneŋa nawu, O yihuŋu! O yihuŋu! ŋanda yeneni, mwadiheteshelaŋawu antu ejima adiŋi namaatu hakaluŋalwiji nayuma yindi yasweja kulema wuseya! Muloŋa mumpinji yimu hohu anamubalumuni kwikala chihembi.

²⁰Enu mawulu, ninenu akwakujila, ninenu apostolu, ninenu atuprofwetu, muzaŋalelenu; muloŋa Nzambi namusompeshi dehi, nayitendi dehi.

²¹Kaŋelu waŋovu wumu hakunyamuna ilola didi neyi ilola deneni dakuhala, ilolodu hakudinatila mukaluŋalwiji nindi, Dichi chakanatilawu Babiloni, ŋanda yeneni, naŋovu heseki; hiyamba kayimona nawa cheŋi nihantuku.

²²Kuvuma kwatudada niyisanji nimahululu nimpùŋa hikwamba katiyakana nawa cheŋi mudeyi hela ifuku dimuku. Mudeyi himwamba kamwekana nawa cheŋi mukwawukalawenu hiwukalawenuku; hela lushindu lwakutwa mwiyanda hilwamba katiyakana nawa cheŋi mudeyi hela ifuku dimuku.

²³Hela chejeji chenoŋu hichamba katoŋeka nawa cheŋi mudeyi nichantuku. Hela izu dansumbuli hela dansumbuki hidamba katiyakana cheŋi mudeyi hela ifuku dimuku. Muloŋa antu eyi, akwakulandisha nakulandulula, adiŋi atulamba ahanu heseki; muloŋa wadimbili nyuza yejima nakupanda kweyi.

²⁴Mudi yena awenumu mashi awatuprofwetu niawakwakujila ni awantu ejima ajahiluwu hanu hamaseki.