Read MUKANDA WANZAMBI Sinulo 19 Bible Online

Sinulo 19 - MUKANDA WANZAMBI bible

Sinulo 19

¹Kulondela hayumiyi hinukutiya neyi izu datiyakana daluntu lwaluvulu mwiwulu, hiyakwila nawu, Aleluya! Wamwinu ni kulema niŋovu yambala yaNzambi yetu!

²Mwasompeshaŋayi mwalala mwaloŋa; muloŋa nasompeshi dehi chivumbi muneni watokeshelaŋa hanu hamaseki nawuvumbi windi. Nzambi natendi dehi mashi awambuŋindi.

³Hiyakwila kamuchiyedi nawu, Aleluya! Wishi windi wudi nakufwinda haya nyaka nanyaka.

⁴Owu awakulumpi makumi ayedi nawana, ninowu amomi awana, hiyakudinata chamesu heseki, hiyakudifukula kudi Nzambi washakamaŋa hetanda dawanta nawu, Amena! Aleluya!

⁵Mwitanda dawanta himukufuma izu nindi, Hamekenu Nzambi yetu, enu ambuŋindi ejima, enu mwa-mwakamaŋa, nianyanya niamaneni.

⁶Hinukutiya izu didi neyi daluntu lwaluvulu, neyi kuvuma kwameji amavulu, neyi yivumina yaŋovu, nakwila nawu, Aleluya! Muloŋa Yehova Nzambi yetu, Watwesha yejima, hakuyula.

⁷Tuzaŋalalenu, tutiyenu kuwaha nankashi, tumulemeshenu; muloŋa kusumbula kwaKana kamukoku kunashiki dehi, niŋodindi nadiloŋeshi dehi.

⁸Hiyakumwiteja mumbandowu kuvwala mahina amawahi atooka atamuka akadi hatama. Muloŋa mahina amawahi atooka hinyidimu yawakwakujila yaloŋa.

⁹Hakuŋila nindi, Sonekaku neyi, Anatambikuwu kumawija aKana kamukoku anakooleki. Hakuŋila nindi, Wenawa diwu mazu aNzambi alala.

¹⁰Hinukudinata chamesu heseki kunyendu yindi nami nidifukuli kudi yena. Hakuŋila nindi, Nehi, lekaku. Ami nimukwenu nduŋu neyi, ninduŋu hamu nawana kwetu ashimunaŋa Yesu; difukuli kudi Nzambi. Muloŋa kushimuna kwashimunaŋawu Yesu hispiritu yawuprofwetu.

¹¹Hinukumona mwiwulu munenzuluki dehi. Kutala hikudi kawalu katooka nimukwakwendelahu, anamuteni nawu, Washinshika, Walala. Wasompeshaŋa, waasaŋa njita mwaloŋa hohu.

¹²Mesu indi adi neyi chikwamuzuzu wakesi, kunamutu windi kudi yibaŋula yayivulu; wukweti ijina dakusoneka dehi, kwosi muntu wadilukaku chiŋa yomweni hohu.

¹³Wavwala ihina dakwombeka mumashi; ijina dindi aditenaŋa nawu, Izu daNzambi.

¹⁴Majita amwiwulu adi nakumulondela, adi nakwendela hatuwalu tutooka, anavwali mahina atooka akadi hatama.

¹⁵Mukanwa kindi himukwidika mpoku yakabali yatwa, kulonda akatapi nachu nyuza; wakayiyula nambwechi yachikuŋu. Hakudata wukamwinu wavinyu yakulendumuka kwalendu mukaŋa kuzuwa kwaNzambi Watwesha yejima.

¹⁶Hachikovwelu chindi nihekata dindi wukweti ijina dakusoneka nawu, Mwanta wawanyanta, Mukulumpi wawakulumpi.

¹⁷Hinukumona kaŋelu nemani mwitaŋwa. Hakubidika nezu datiyakana, hakuyila atujila ejima atúukaŋa hakachi kaluzwizu nindi, Inzenu mupompi kuchawija chaNzambi cheneni;

¹⁸mudyi mbiji yawanyanta ankanu, niyawawakulumpi anjita, niyawayilobu, niyawatuwalu nawakwakwendelahu, niyawantu ejima, hela abula wuduŋu hela anduŋu, hela anyanya hela amaneni.

¹⁹Hinukumona owu kanyama nianyanta ankanu ahanu hamaseki ninjita jawu, anapompi dehi hamu, akadasi njita nayenowu wudi nakwendela hakawalu, ninanjita yindi.

²⁰Owu kanyama hiyakumukwatila hamu nakaprofwetu wakutwamba, owu wakoŋelaŋa yinjikijilu kumesu akanyama, yadimbilaŋayi nachu antu afundiluwu mufunda wanowu kanyama, adifukwilaŋa kumukishi windi. Mwayedi wawu hiyakuyumbila amomi mwijiya dakesi dabutukaŋa kesi kaNzambi.

²¹Asheluhu hiyakuyŋahola nampoku yakabali yedikili mukanwa kayenowu wadiŋi nakwendela hakawalu. Atujila ejima hiyakwikuta mbiji yawu.