Read MUKANDA WANZAMBI Sinulo 2 Bible Online

Sinulo 2 - MUKANDA WANZAMBI bible

Sinulo 2

¹Kaŋelu kachipompelu chakuEfwesesa musonekeli neyi: Nahoshi yumiyi, yowu wakwata tutumbwa tutanu natuyedi muchikasa chindi chachidiilu, wendaŋa mukachi kamanoŋu awuru atanu nayedi,

²nindi, Neluki nyidimu yeyi, nichiwakabakanaŋa, nichiwatatakenaŋa, nichiwabulaŋa kusha antu atama kumuchima, nichiwesekeli antu aditenaŋa nawu tuyapostolu, komana hiyapostoluku, wunayishinshiki neyi hiyantwambi.

³Wunatatakeni, wunakooli ijina dami, hiwunazeyuku.

⁴Hela chochu, nakumoni namuloŋa, nami wunaleki kukeŋa kweyi kwatachi.

⁵Dichi anukaku chiwadiŋi, wubalumuki mumuchima, wili nyidimu yiwelilaŋa hatachi. Neyi nehi, neyi wukubula kubalumuka mumuchima, nukwinza kudeyi nakufumisha inoŋu deyi hididi.

⁶Ilaŋa chuma chiwudi nachu, chiwahelaŋa nyidimu yawaNikolayitani yinahelaŋa ninami.

⁷Yowu wukweti matu atiyi mwakuhoshayi Spiritu nayipompelu. Yowu wukwimika mushindu nakamwiteja kudya kumutondu wawumi wekala muparadisa yaNzambi.

⁸Kaŋelu kachipompelu chakuSimirina musonekeli neyi. Nahoshi yumiyi, yowu Tachi, yowu Nkumininaku, wafwili wahandili cheŋi.

⁹Nindi, Neluki yihuŋu yeyi niwuzweŋi weyi, kutoŋa waheta, neluki nimatuka anowu elaŋa nawu tudi aYudeya, komana hiyaYudeyaku, hishikola yaSatana kwawu.

¹⁰Bayi wutiyaloŋa woma wayuma yiwukukeŋa kukaba nachuku. Tiya, diyabolu keŋa ashi akwenu amakwawu mukaleya, kulonda ayeseki; mwakamona yihuŋu mafuku ikumi. Ikalaku washinshika ndo nikukufwa, nakakwinka chibaaba chawumi.

¹¹Yowu wukweti matulo atiyi mwakuhoshayi Spiritu nayipompelu. Yowu wukwimika mushindu hiyakamukatisha nakufwa kwamu chiye duku.

¹²Kaŋelu kachipompelu chakuPeriŋamu musonekeli neyi: Nahoshi yumiyi, yowu wukweti mpoku yakabali yatwa yikweti wumwemukuyedi.

¹³Nindi, Neluki kuwashakama, kwokwekala itanda daSatana dawanta; eyi wakakela ijina dami mbe, kudikala kukuhwelela kuwankuhwelela nehi, hela mumafuku adiŋiyi chinsahu chami Antipasi, muntu wami washinshika, ajahiluwu mukachi kenu kwashakamayi Satana.

¹⁴Hela chochu, kudi yuma yantesha yinakumoni nachu namuloŋa, muloŋa wudi nawakwenu acheŋi kwenoku etejaŋa maana ayilejeluwu kudi Balami, walejeli Balaki mwakutila anyana kaIsarela muhetu akadyi yuma yanapeshuwu nachu akishi, akeli niwuvumbi.

¹⁵Wudi nawakwenu acheŋi nawa etejaŋa kuleja kwawaNikolayitani chochimu.

¹⁶Dichi balumukaku mumuchima. Neyi nehi, nukwinza swayi kudeyi, nakaasi nawu njita nampoku yakabali yamukanwa kami.

¹⁷Yowu wukweti matu atiyi mwakuhoshayi Spiritu nayipompelu. Yowu wukwimika mushindu nakamwinkahu manina adiŋi akusweka, nakamwinka niilola ditooka, helolodu asonekahu ijina dadiha, dabula kwilukawu antu, chiŋa yowu muntu wukuditambula.

¹⁸Kaŋelu kachipompelu chakuTiyatira musonekeli neyi: Nahoshi yumiyi, yowu Mwana kaNzambi, wukweti mesu adi neyimuzuzu wakesi, ninyendu yidi neyi wuneŋu wakekema.

¹⁹Nindi, Neluki nyidimu yeyi, nikukeŋa kweyi, nikukuhwelela kweyi, nikukalakala kweyi, nikutatakena kweyi, neluki nami nyidimu yeyi yakukuminina yinabadiki yakusambila.

²⁰Hela chochu, nakumoni nami wudi namuloŋa, wunamwiteji owu mumbanda Yezebeli, waditenaŋa nindi nikaprofwetu, hakuleja nakulumbula ambuŋami akoŋi wuvumbi, adiyi niyuma yanapeshuwu nachu akishi.

²¹Namushili mpinji yakubalumuka mumuchima, komana yena kwonti kwindi kubalumuka nakuleka wuvumbi windi.

²²Tiya, hinukumunatila hakadidi kakukata, ni akwawu elaŋa nindi wuvumbi nukuyumbila nawa muyihuŋu yasweja, chiŋa abalumuka mumuchima, aleka nyidimu yawu.

²³Nakajaha anyanindi nakufwa kwachipupu; niyipompelu yejima yakeluka nawu natalatalaŋa munyichima mwivumu; nakayinka wejima wenu hamuntu hamuntu mwesekela nyidimu yenu.

²⁴Ilaŋa enu yenu munashali muTiyatira, yenu ejima munabuli kwiteja maanawa, munabuli kwiluka yuma yaSatana yakunama, mwahoshaŋawu; nukuyila nami hinukuyitwika chiteli chacheŋuku.

²⁵Hela chochu, kakelenu chuma chimudi nachu nichinakenza, mbe.

²⁶Yowu wukwimika mushindu, wukukakela nyidimu yami ndo nikunsa, nakamwinka wanta wanyuza.

²⁷Wakayiyula nambwechi yachikuŋu, neyi chafumpaŋawu manuŋu akaŋemi, pwo-pwo kwayizanda hohu; mwomunatambuli ninami nawa kudi Tata yami.

²⁸Nakamwinka Ntanda.

²⁹Yowu wukweti matu atiyi mwakuhoshayi Spiritu nayipompelu.