Read MUKANDA WANZAMBI Sinulo 20 Bible Online

Sinulo 20 - MUKANDA WANZAMBI bible

Sinulo 20

¹Hinukumona mwiwulu himukusuluka kaŋelu, wudi nansapi yekela niileŋi deneni muchikasa.

²Hakukwata owu chazaŋombi, yowu kapela mukulu, diyi Diyabolu, diyi Satana; hakumukasa ekali wakukasa ho-o ikombakaji danyaka.

³Hakumúumbila mwikela, hakumupatilamu, hakushilaku nichilamiki, kulonda abuli kudimba cheŋi nyuza, chiŋa ikombakaji danyaka dinamani dehi. Kulondela henohu chiŋa akamusubuli kapinji kanti.

⁴Hinukumona matanda awanta niashakamahu, anayinki dehi Ŋovu yakusompesha. Hinukumona niantu aketwiluwu nyitu kukoola kumushimuna Yesu nimazu aNzambi; hinukumona ninawa abulili kudifukula kudi owu kanyama hela kumukishi windi, abulili kufundawu hamahamawu nihamakasawu; hiyakuhanda, hiyakuyulila hamu naKristu ikombakaji danyaka.

⁵Afu asheluhu, kuhanda nehi chiŋa ikombakaji danyaka dinamani dehi. Diku kusaŋuka kwakusambila.

⁶Muntu wukusaŋuka nawu hakusaŋuka kwakusambila wakooleka, wajila. Kufwa kwamuchiyedi hikukwi kala naŋovu nawenaku; ilaŋa akekala atupristu ambala aNzambi niaKristu, akayulila hamu nindi ikombakaji danyaka.

⁷Chakamana ikombakaji danyaka, akamusubula Satana mwamupatililuwu;

⁸wakafumamu kulonda akayi nakudimba nyuza yekala kunsa jeseki jiwana, wowu aGogi naMgogi, hakuyipompesha akaasi njita. Kuyichinda adi neyi wusekulula wakukaluŋalwiji.

⁹Hiyakutandama mwatohela iseki dejima, hiyakukuchika musumba wawakwakujila niŋanda yakeŋewa. Wena hiyakuyinoŋesha nakesi kakufuma mwiwulu kudi Nzambi.

¹⁰Diyabolu wayidimbili hiyakumúumbila mwijiya dakesi ni kesi kaNzambi, mwekala owu kanyama nanowu kaprofwetu wakutwamba; akayikatishaŋa nimwaana niwufuku haya nyaka nanyaka.

¹¹Hinukumona itanda dawanta deneni ditooka, ninowu washakamahu; nimaseki nimawulu hiyakutemuka kumesu indi; hiyamweni kwakuyaku.

¹²Hinukumona afu, niamaneni nianyanya, hiyakwimena kumesu etanda dawanta; hiyakubakula nyikanda; hiyakubakula nimukanda wukwawu, wowu wawumi. Hiyakusompesha afu nansaŋu jayuma yelilaŋawu yasonekeluwu dehi munyikandoyu.

¹³Kaluŋalwiji hakulubula afu adiŋumu; kufwa nakaluŋa hiyakulubula afu adiŋumu; hiyakuyisompesha wejima wawu hamuntu hamuntu mwomwelililaŋawu nyidimu yawu.

¹⁴Kufwa nakaluŋa hiyakuyumbila mwijiya dakesi. Kweniku diku kufwa kwamuchiyedi, yowu ŋiya dakesi.

¹⁵Muntu abulili kuwanawu wakusoneka mumukanda wawumi, amuumbilili mwiriya dakesi.