Read MUKANDA WANZAMBI Sinulo 21 Bible Online

Sinulo 21 - MUKANDA WANZAMBI bible

Sinulo 21

¹Hinukumona iwulu dadiha niiseki dadiha; muloŋa iwulu dakusambila niiseki dakusambila ahita dehi, nikaluŋalwiji nawa kwosi.

²Hinukumona panda yajila, yowu Yerusalema yayiha, yidi nakusuluka kudi Nzambi kwiwulu, ayiloŋesha dehi neyi nsumbuki anawahishuwu kulonda asumbuki nanfumwindi.

³Hinukutiya izu datiyakana dikufuma mwitanda dawanta nindi, Tiya, tabanaka yaNzambi hiyidi nawantu; yena wakashakama nawu, niwena akekala antu indi; Nzambi yomweni wakekala nawu, wakekala Nzambi yawu.

⁴Wakayikombola madilu ejima kumesu awu; hikwakekala nawa cheŋi kufwaku; hikwakekala nawa cheŋi hela kuneŋa hela kudila hela kukataku. Yuma yakusambila yinahiti dehi.

⁵Owu washakama hetanda dawanta hakwila nindi, Tiya, hinukubalumuna yuma yejima yiikali yayiha. Hakuŋila nindi, Sonekaku, muloŋa mazu awa atela kwitiya, alala.

⁶Hakuŋila nindi, Yineli dehi yalala. Ami yami Alefwa, yami Omega; yami Wakusambila, yami Wakukuminina. Muntu wukutiya mpwila nakamwinkahu meji akukaseloki kameji awumi chakadi kulanda.

⁷Muntu wukwimika mushindu wakaswana yumiyi; nakekala Nzambi yindi, niyena wakekala mwanami.

⁸Hakwila akwawoma, niabulakwitiya, niatama nankashi, niambanji, niayivumbi, niakwakuhoŋa nakupanda, niakwakupesha, niakwakutwamba ejima, akwikalaŋa mwijiya dahaŋa nakesi ni kesi kaNzambi. Kweniku diku kufwa kwamuchiyedi.

⁹Hikukwinza kudami kaŋelu wumu wahadi awa aŋelu atanu nayedi, adiŋi nayeŋa yakunama yitanu nayiyedi, yenzala yipupu yakukuminina yitanu nayiyedi. Hakuhosha nanami nindi, Inzaŋa kunu nikuleji nsumbuki, iŋodaKana kamukoku.

¹⁰Hakunfumishahu mudi Spiritu, hakuntwala kumpidi yela nikutoha nikuleha, hakunleja ŋanda yajila yowu Yerusalema, yidi nakusuluka kudi Nzambi kwiwulu;

¹¹yidi nalubanji lwakulema kwaNzambi. Chejeji chayu chidi neyi ilola dasweja kulema wuseya, neyi njasiperi, ilola damwekana nikwishinadi to-o.

¹²Yidi nampwembu yeneni yayilehi; kumpwembu kudi yenzelu ikumi nayiyedi; kuyenzelu oyu kudi aŋelu ikumi nayedi. Hayenzelu oyu asonekahu majina anyichidi yawanyana kaIsarela ikumi nayiyedi.

¹³Kumusela yenzelu yisatu; kukabeta kakuchimunswa yenzelu yisatu; kukabeta kakuchidiilu yenzelu yisatu; kumuji ka yenzelu yisatu.

¹⁴Oyu mpwembu yaloŋanda yidi nayikuku ikumi nayiyedi, hadi nimajina ikumi nayedi awapostolu aKana kamukoku ikumi nayedi.

¹⁵Yena waduŋi nakuhosha nanami wadiŋi neteti dawuru, dakweseka nachu ŋanda niyenzelu yayu nimpwembu yayu.

¹⁶Oyu ŋanda yekala muwana, yela nikuleha nikutoha kwokumu. Yena hakweseka ŋanda nanodu iteti, makilometa makombakaji ayedi namakulakaji awana.[4] Nikuleha kwayu, nikutoha kwayu, nikuleha kwayu kwakwiwulu kwesekana.

¹⁷Hakweseka nimpwembu yayu munkulakaji yankotweli jachikasa namakumi awana najiwana, mwomwesekelaŋa muntu, kafwampi mwomwesekelaŋa kaŋelu.

¹⁸Oyu mpwembu ayituŋa nanjasiperi. Ŋanda yekala yawuru wakoseka, wamwekana nikwishinadi to-o.

¹⁹Yikuku yampwembu yaloŋanda ayiwahisha namalola ejima alema wuseya eŋi na eŋi. Chikuku chakusambila chadiŋi chanjasiperi; chamuchiyedi chasafira; chamuchisatu chachalisidoni; chamuchiwana chaemereladi;

²⁰chamuchitanu chasadonikisi; chamuchitanu nachimu chasaridini; chamuchitanu nachiyedi chakisoliti; chamuchitanu nachisatu chaberili; chamuchitanu nachiwana chantopaza; chamwikumi chakirisoparasi; chamwikumi nachimu chayakinita; chamwikumi nachiyedi chaametisiti.

²¹Oyu yenzelu ikumi nayiyedi himperola ikumi najiyedi, chenzelu mperola yimu, chenzelu mperola yimu, yenzelu yejima ikumi nayiyedi chochimu. Mukwakwa wanoyu ŋanda hiwuru wakoseka wamwekana nikwishinadi to-o.

²²Hinamwenumu tembeluku; muloŋa Yehova Nzambi Watwesha yejima, niKana kamukoku diwu tembeli yayu.

²³Oyu ŋanda hiyakeŋa hela itaŋwa hela kakweji kulonda yitoŋeki mwoku. Muloŋa lubanji lwakulema kwaNzambi dilu lwatoŋekaŋamu, niinoŋu dayu hiKana kamukoku.

²⁴Nyuza yakendelaŋa muchejeji chayu, nianyanta ankanu aheseki aletelaŋamu yuma yawu yayiwahi yalema.

²⁵Yenzelu yayu hiyamba kayenzela namwaanaku, muloŋa mwenomu wufuku mwosi.

²⁶Akaletelamu niyuma yanyuza yayiwahi yalema.

²⁷Himwakeŋa ila mwoku hela chuma nichimu chajilola, hela muntu welaŋa chishimashima hela kutwambaku; chiŋa wowu asonekawu dehi mumukanda wawumi waKana kamukoku hohu.