Read MUKANDA WANZAMBI Sinulo 22 Bible Online

Sinulo 22 - MUKANDA WANZAMBI bible

Sinulo 22

¹Hakunleja kaloŋa kameji awumi, kakekema neyi chibanjilu, kadi nakufuma mwitanda daNzambi dawanta, dodaKana kamukoku.

²Mukachi kamukwakwa wayu, niishinadi niishinadi dakaloŋa, hadi mutondu wawumi, wasoŋaŋa nyikabu ikumi nayiyedi; wasoŋaŋa nyikabu yawu hakakweji hakakweji. Mafu anowu mutondu akuuka nachu nyuza.

³Hikwamba kekala nawa cheŋi ishiŋuku. Itanda daNzambi dawanta, dodaKana kamukoku, dakekalaŋa mwenomu.

⁴Ambuŋindi amba kamukala kelaŋa, amba kamumonaŋa kumesu; niijina dindi dakekalaŋa hamahamawu.

⁵Hikwamba kekala cheŋi wufukuku; hiyakakeŋa nawa hela chejeji chenoŋu hela mwaana wetaŋwaku; Yehova Nzambi diyi wakayitoŋekelaŋa chejeji to-o. Akayulaŋa haya nyaka nanyaka.

⁶Hakuŋila nindi, Mazu awa atela kwitiya, alala. Yehova Nzambi yawaspiritu awatuprofwetu natemeshi kaŋelu aleji ambuŋindi yuma yikukeŋa kwinza swayi.

⁷Talenu, yami nukwinzowu swayi. Muntu wukuhemba mazu awuprofwetu wamukandiwu nakooleki.

⁸Yami Yowanu nela nikutiya nikumona yumiyi. Chinelili nikutiya nikumona, hinukudinata chamesu heseki nakudifukula kunyendu yayenowu kaŋelu wanlejeli yumiyi.

⁹Hakuŋila nindi, Nehi, lekaku. Ami nimukwenu nduŋu neyi; ninduŋu kwami neyi eyi, hamu nawana kwetu atuprofwetu ninawa ahembaŋa mazu amukandiwu; difukuli kudi Nzambi.

¹⁰Hakuŋila nindi, Bayi wulamika mazu awuprofwetu wamukandiwuku; muloŋa mpinji keŋa yishiki.

¹¹Muntu waheŋa aheŋaŋa kwindi; muntu wamajilu ekalaŋa wamajilu kwindi; muntu waloŋa aloŋaŋa kwindi; muntu wajila ajilaŋa kwindi.

¹²Talenu, yami nukwinzowu swayi; nidi nawufwetu wami wakwinka antu ejima mwesekela nyidimu yawu.

¹³Ami yami Alefwa, yami Omega; yami Tachi, yami Insa; yami Wakusambila, yami Wakukuminina.

¹⁴Akukosa mahinawu kulonda akatweshi kushika kumutondu wawumi, kulonda akeŋili muyisu yaloŋanda, anakooleki.

¹⁵Atuwa, niakwakuhoŋa nakupanda, niayivumbi, niambanji, niakwakupesha, niejima akeŋaŋa nielaŋa yakutwamba hiyekala muŋandaku.

¹⁶Ami Yesu natemeshi kaŋelu kami kulonda ashimwini yipompelu yumiyi. Yami muji, yami wamutaŋa waDavidi, yami Ntanda, katumbwa katoŋeka nabudidi.

¹⁷NiSpiritu ninsumbuki hiyakwila nawu, Inzaŋa. Muntu wukutiya niyena eli nindi, Inzaŋa. Muntu wudi nampwila enzi, yowu wukukeŋa kutambula, atambuli meji awumi chakadi kulanda.

¹⁸Hinukukonkomwena antu ejima akutiya mazu awuprofwetu wamukandiwu, nami, neyi muntu wakalunjika kumazu awa, Nzambi wakamulunjikila yipupu yanasonekuwu mumukandiwu.

¹⁹Neyi muntu wakafumisha kumazu amukanda wawuprofwetu iwu, Nzambi wakamufumisha mwadiŋi nakudiilayi kumutondu wawumi, nimwakeŋa eli kushakamayi muŋanda yajila, eŋa, nikuyuma yanasonekuwu mumukandiwu.

²⁰Wukushimuna yumiyi nindi, Eŋa, yami nukwinzowu swayi. Amena, inzaŋa Mwanta Yesu.

²¹Luwi lwaMwanta Yesu Iwikali nawakwakujila. Amena.