Read MUKANDA WANZAMBI Sinulo 3 Bible Online

Sinulo 3 - MUKANDA WANZAMBI bible

Sinulo 3

¹Kaŋelu kachipompelu chakuSaradisa musonekeli neyi. Nahoshi yumiyi, yowu wukweti aspiritu aNzambi atanu nayedi, nitutumbwa tutanu natuyedi. Nindi, Neluki nyidimu yeyi, nichiwukweti ijina dakwila nawu wahanda, komana wafwa.

²Tonaku, wukoleshi yuma yinashali yinakeŋi kufwa; muloŋa hinamoni nyidimu yeyi kulumbuluka kumesu aNzambi yamuku.

³Dichi anukaku chiwatambwili nimuwatiyili, wukakelumu, wubalumuki mumuchima weyi. Dichi neyi wakabula kutona, nakenza neyi chenzaŋa ikombi, hiwakeluka mpinji yinakaku kasumwishaku.

⁴Hela chochu, wudi namajina antesha awantu muSaradisa anabuli kutamisha mahinawu; wena akenda nanami nakuvwala yitooka muloŋa anateli.

⁵Yowu wukwimika mushindu, diyi akavwikawu mahina atooka; hinakajimaŋesha ijina dindi mumukanda wawumuku, naketeja ijina dindi kumesu aTata yami ni kumesu awaŋelu jindi.

⁶Yowu wukweti matu atiyi mwakuhoshayi Spiritu nayipompelu.

⁷Kaŋelu kachipompelu chakuFwiladelifwiya musonekeli neyi. Nahoshi yumiyi, yowu wajila, yowu walala, yowu wukweti nsapi yaDavidi, yowu welaŋa chakwenzululayi, wacheŋi kutwesha kwenzelaku nehi; chakwenzelayi, wacheŋi kutwesha kwenzululaku nawa nehi.

⁸Nindi, Neluki nyidimu yeyi. Tiya, nakushili kumesu eyi chenzelu chachashi, hikwekala wakatwesha kuchenzelaku; eyi wudi naŋovu yantesha, wunahembi mazu ami, wunabuli kudikala ijina dami.

⁹Tiya, nukutembula akwashikola yaSatana elaŋa nawu twaYudeya, komana hiyaYudeyaku atwambaŋa kwawu, akenzi nakudifukula kunyendu yeyi, akeluki nawu ami nakukeŋa.

¹⁰Chiwunahembi mazu akutatakena kwami, ami nawa nakakuhemba wakabuli kumona mpinji yamba kenza nakushi ka mumpata yamunu mwishina yejima, yakuyeseka antu ashakama hamaseki.

¹¹Nukwinza swayi; kwataku chiwudi nachu mbe, kulonda abuli kukutambula chibaaba cheyi.

¹²Yowu wukwimika mushindu nakamubalumuna kwikala chishimi chamutembeli yaNzambi yami, hamba kedikamu cheŋuku. Nakasoneka hadi yena ijina daNzambi yami, niijina daŋanda yaNzambi yami, yowu Yerusalema yayiha yakasuluka mwiwulu nakufuma kudi Nzambi yami, niijina dami dadiha.

¹³Yowu wukweti matu atiyi mwakuhoshayi Spiritu nayipompelu.

¹⁴Kaŋelu kachipompelu chakuLayodikeya musonekeli neyi: Tiya mwanahoshiyi Amena, yowu chinsahu washinshika, yowu mukulumpi wayuma yaleŋeluwu kudi Nzambi.

¹⁵Nindi, Neluki nyidimu yeyi nami hiwutuuta hela kutataku; nakeŋi nami wikali wutuuta hela kutata.

¹⁶Chiwuneli wukanvuyenki hohu, hela kutúuta hela kutata nehi, nukukufwŋia kwami mukanwa.

¹⁷Chiwuneli neyi, Nimukwakuheta, nadi heteshi dehi, hinabuli chumaku; komana jakukuma dehi, wumulanda, wukazweŋi, wumputamesu, wudi nawuvu.

¹⁸Tiya maana inukukuleja, nami landaku kudami wuru wakoseka nakesi, wikali mukwakuheta; nimahina atooka, wuvwali kulonda wuvu weyi wubuli kumwekana, wubuli kutiya nsonyi; landaku niyitumbu, wukwiti kumesu wumoni nawa.

¹⁹Antu ami inakeŋa nayikonkololaŋa nakuyifumba; dichi shaku muchima wubalumuki.

²⁰Talenu, nemani nakudondomwena kuchisu; neyi kudi muntu wukutiya izu dami, hakwenzulula chenzelu, nukwijila mudi yena, nukudya nindi, niyena nawa wukudya nanami.

²¹Yowu wukwimika mushindu, nakamwiteja kushakama nanami hetanda dami dawanta, neyi chinemikili ami mushindu, nashakama naTata yami hetanda dindi dawanta nawa.

²²Yowu wukweti matu atiyi mwakuhoshayi Spiritu nayipompelu.