Read MUKANDA WANZAMBI Sinulo 4 Bible Online

Sinulo 4 - MUKANDA WANZAMBI bible

Sinulo 4

¹Chiyakumini yumiyi nami nitali, hinukumona chenzelu chinenzuluki mwiwulu; hinukutiya izu dinásambilili kutiya dadiŋi neyi mpùŋa, hidikuhosha nanami nindi, Inzaŋa munu mwiwulu, nikumwekesheli yuma yamba kenza kukukuminina.

²Hohenohu niikala nimudi Spiritu; kutala mwiwulu anashumu itanda dawanta; hetandodu dawanta hashakama wumu.

³Yena washakama, kumutala wudi neyi chikwelola danjasiperi nidasaridini. Kwitanda dawanta kwanyeŋumuka kasuluŋunda, kukatala kadi neyi emeraladi.

⁴Kwitandodu dawanta kwanyeŋumuka matanda awanta makumi ayedi nawana. Hamatandowu hashakama awakulumpi makumi ayedi nawana, anavwali mahina atooka; nikunyitu yawu kudi yibaaba yawuru.

⁵Mwitanda dawanta himukwidika ninzaji nimazu nikudidima. Kumesu etanda kudi nimanoyu abutuka atanu nayedi, wowu aspiritu aNzambi atanu nayedi.

⁶Kumesu etanda kudi neyi ŋiya dachibanjilu didi neyi krisitali. Nimukachi ketanda nikunyeŋumuka itanda kwi-ndo kudi amomi awana ela kwamesu hohu, nikwivumu nikunyima.

⁷Mumi wakusambila wudi neyi mutupa, mumi wamuchiyedi wudi neyi mwana kaŋombi, mumi wamuchisatu wudi namesu neyi amuntu, mumi wamuchiwana wudi neyi mbuulu wukutúuka.

⁸Awa amomi awana akweti mpuula, iwu jitanu nayimu, iwu jitanu nayimu, muyawana wawu; ela kwamesu hohu hejima kwi-ndo nimukachi. Nimwaana niwufuku; hiyanookaŋaku nakwila nawu, Wajila! Wajila! Wajila! Yehova Nzambi Watwesha yejima, wadiŋi kwoku, wekala kwoku, wamba kenza.

⁹Awa amomi chakutiyakeshawu kulema nimpuhu nakusakilila washakama hetanda, wahandaŋa haya nyaka nanyaka,

¹⁰awa awakulumpi makumi ayedi nawana hiyakudinata hamaseki kunyendu yanowu washakama hetanda dawanta, nakudifukula kudi yena wahandaŋa haya nyaka nanyaka. Hiyakunatila yibaaba yawu kumesu etanda dawanta,

¹¹nakwila nawu, Eyi Yehova wetu, eyi Nzambi yetu, wunateli kutambula kulema nimpuhu niŋovu. Muloŋa yeyi waleŋeli yuma yejima kulonda yili mwaya muchima weyi; dichi chiyekala, dichi chayileŋeluwu.