Read MUKANDA WANZAMBI Sinulo 6 Bible Online

Sinulo 6 - MUKANDA WANZAMBI bible

Sinulo 6

¹Hinukumona chalamwiniyi Kana kamukoku chilamiki chimu chanoyu yilamiki yitanu nayiyedi, hinukutiya mumi wumu wahadi amomi awanahakwila nezu dakudidima nindi, Inzaŋa wutali.

²Nami nitali, hinukumona kawalu katooka; mukwakwendelahu wasenda wuta wamukunji. Amwinka chibaaba,[2] hakuya nakwimika mushindu kulonda nawa akemikaŋa mushindu ho-o.

³Chalamwiniyi chilamiki chamuchiyedi, hinukutiya mumi wamuchiyedi hakwila nindi, Inzaŋa wutali.

⁴Hikukwidika kawalu kakwawu, kachinana; mukwakwendelahu amwinka jakufumisha kumwena hamaseki, kulonda antu ajahaŋani. Amwinka mpoku yakabali yeneni.

⁵Chalamwiniyi chilamiki chamuchisatu, hinukutiya mumi wamuchisatu hakwila nindi, Inzaŋa wutali. Nami nitali, hinukumona kawalu keyila; mukwakwendelahu wasenda pezu muchikasa chindi.

⁶Mukachi kawamomi awana hinukutiya neyi izu, hidikwila nindi, Chikopu chatidiku nedali dimu, niyikopu yabali yisatu nedali dimu; bayi wukisaŋana manji nivinyuku.

⁷Chalamwiniyi chilamiki chamuchiwana, hinukutiya izu damumi wamuchiwana hakwila nindi, Inzaŋa wutali.

⁸Nami nitali, hinukumona kawalu katookoloka; mukwakwendelahu wukweti ijina dindi diyi Kufwa, nikaluŋa kamulondela munyima. Hiyakuyinka wanta wakujaha chibalu champata yahanu hamaseki chamuchiwana, ajahi nampoku yakabali nanzala nayipupu nawanyama amwisaŋa ayisuma.

⁹Chalamwiniyi chilamiki chamuchitanu, hinukumona mwishina dakameŋa antu ajahiluwu, akooleli mazu aNzambi nikushimuna kwashimwinuwu.

¹⁰Hiyakubidika nezu datiyakana nawu, Eyi Mwanta wajila, walala, wamba kasompesha antu ashakama hamaseki mwakanyi, kulonda kututendela mashi etu?

¹¹Hiyakuyinka wejima wawu hamuntu hamuntu, yi kovwelu yakuluka yitooka, hiyakuyileja nawu, Nookenuhu kapinji kakwawu kanti, kulonda akwenu anduŋu nenu, niana kwenu akajahawu neyi chajahiluwu enu akawanini nawa.

¹²Chalamwiniyi chilamiki chamuchitanu nachimu, hikudi mutentanshi weneni; itaŋwa hidikubalumuka kwiyila bwi neyi chikeleyi chamavuji eyila; kakweji kejima hikakubalumuka nge neyi mashi;

¹³nitutumbwa twamwiwulu hitukuholoka hamaseki neyi yikuyu yayisu yinawulumuki chanakankaŋeshuwu mutondu nampepela yeneni.

¹⁴Iwulu hiyakudifumisha neyi mukanda wanavuŋavuŋuwu; nimapidi ejima niyitutu yejima hiyakuyitutulula muyadiŋi.

¹⁵Anyanta ankanu ahamaseki, niatulamba, niakulumpi janjita, niakwakuheta, niayilobu, nianduŋu ejima, niabula wuduŋu ejima, hiyakubatama mumayeŋu nimumalola akumapidi.

¹⁶Hiyakuyila mapidi namalola nawu, Tuhinukilenu, namutusweki tubuli kumwekana kumesu anowu washakama hetanda dawanta, abuli kutuzuwila kudi Kana kamukoku;

¹⁷muloŋa ifuku deneni dakuyizuwila dinashiki, wukutwesha kwimanaku hinyi?